Karai Kasang a Shaman Chyeju jaw e, JINGHPAW KASA BLOG (3) NING du hkra ngang grin nga lu ai re hpe kam ai.
JINGHPAW KASA BLOG hta n hkum n tsup ai lam, ra rawng ai lam ni law law nga ai rai tim myit galu kaba ai hte sa du n gun jaw nga ai Nu Wa Mung Chying Shawa masha yawng hpe mung JINGHPAW KASA BLOG kawn n dang tsun hkra chyeju dum n ngai. Wunpawng Myu Sha ni yawng n gun jaw la nga ai majaw JINGHPAW KASA BLOG ngang grin nga ai re lam hpe yin la n ngai. Dai ni ten du hkra n gun jaw nga ai majaw mung grai kabu myit dik, chyeju dum ai.
JINGHPAW KASA kawn lak san chyeju dum shagrau ging ai chyeju madu ni mung nga ai. Chyeju dum mayu n ngai.
1. JINGHPAW KASA BLOG hpe Shiga hti shawa masha ni myit shang sha hkra galaw gram lajang ya ai hte Blog hte seng nna ra wa ai a ten shagu garum ya nga ai Manang wa Tsumhpawng Ja La hpe n dang tsun hkra chyeju dum ai.
2. JINGHPAW KASA BLOG hta Computer machye machyang ni hpe ka mara ya ai sha n ga, JINGHPAW KASA BLOG kaw mara na matu Jinghpaw Yungwi mahkawn ni hpe grai tsawm htap hkra galaw ya ai Manang wa Shd. Mut Tsawm hpe mung chyeju dum la n ngai.
3. JINGHPAW KASA BLOG kawn Mungkan shara shagu de chyam bra nga ai Wunpawng Myu Sha ni Jinghpaw Mung kata byin nga ai lam ni hpe a ten dep chye lu, hti la lu na matu Shiga ni hpe shalai ya nga ai Jinghpaw Mung kata Shawnglam majan pa hta du nga ai Myu Tsaw, Mung Tsaw Share Ninghkring ni hte magam gun ni yawng hpe mung chyeju dum dat n ngai.
4. JINGHPAW KASA BLOG kawn Wunpawng Myu Sha ni chye ging ai, chye da ra ai lam ni hpe laika gasi hte ka nna shadum, sharin ya nga ai Mungdan shara shagu na Hkawp Myitsu Salang ni ma hkra hpe mung chyeju dum ai lam tsun shana mayu n ngai.
5. JINGHPAW KASA BLOG na Shiga ni hpe Maigan myu sha ni mung hti la lu hkra, grai n rau ai lapran kaw na Shiga ni hpe English hku ka gale ya ai Hkau Williams Maran Naw Di hpe mung n dang tsun hkra chyeju dum n ngai.
6. JINGHPAW KASA BLOG hpe sa du n gun jaw nga ai Nu Wa Mung Chying Sha ni yawng hte JINGHPAW KASA hpe hpaji jaw lam madun garum ya nga ai Chyeju Madu ni yawng hpe mung na chying wa chyeju dum n ngai.
JINGHPAW KASA hku nna myit dik ai lam langai mi nga ai, dai gaw, n chye n kaw ai rai tim Wunpawng Myu Sha ni a matu jut shara mi kawn lu ap nawng taw ai majaw re. Matut nna mung Wunpawng Myu Sha ni yawng a matu dang di dang dep ai made shakut mat wa na n ngai. JINGHPAW KASA BLOG a Shiga hti Kanu Kawa, Kahpu Kanau myitsu ji nban yawng mung JINGHPAW KASA hpe hpaji jaw, n gun jaw, lam madun ya na matu ja ja garum hpyi dat lu n ngai law.
Yawng hpe tut nawng chyeju dum nga let,
Jinghpaw Kasa
25/5/2012
2 comments:
W P mung dan grin nga ding sang JINGHPAW KASA tut agrin nga u ga.shang lawm nga ai yawng hpe KK grau nna shaman ya nga u ga.grau nna shakut shaja ya rit.myu sha ni yawng shakawn sha grau hkrum kum hpa mung tut lu u ga ngu chye ju dum nga let,MADU KK hta kyu hpyi ya nga ga ai oi.hkam kaja sim sa nga u ga.
w p myu sha yawng a gawng malai jinghpaw kasa hpe chyeju dum dik ai.w p mungdan gawgap ai jut shara mi hta jinghpaw kasa hpe ra ahkyak ai.myu hte mungdan a matu galoi mung dawjau lu u ga ngu chyeju dum shakawn shagru dat ai.
Post a Comment