Nu a myi sha n'pu kata kaw nna sumtsan shagawng bum maling kaw shanu, Nu nga ai buga de myi man yawng myit du tsawm htap dik ai Nu a sari sadang si mani ai ningsam, Nu a hpraw san seng ai mani sumsai myiman hpe shingran let Ka Nu ni masat n'htoi kaba ten ngai hpe shangai chyinghkai ai Nu hpe chyeju dum shakawn hkungga jaw dat n ngai chyinghkai Nu e.......!
Nu hkam kaja u ga, Nu ngwi pyaw u ga, Nu simsa u ga, Nu hkum myit kaji. Nu hkum myit tsang yaw. Jit hkyi yawng hpe gawn mazang ya, yisa yiwa magam bungli shachyen shaja ai ten, n'rau nhtau, marung mashi she gayaw puba ai ten, marang htu jan ja tim, kashung tim madi manyap rai tim, aput a ngun n'nga, Ma hpe pawnba kaba hpaji hparat sharin ya ai tsaw ra ai Nu e... yupra garen, nga shara garen, lusha sha n'mu ai ten, Nu a shimlum ai dum nta de ngai bai wa mayu, garen gari myit mada kam hpa shara n'mu, yawn hkyen hkrum ai ten Nu a lahpyen shama de bai shang rawng mayu, kawsi hpang gara shut hpyit lamdam shawng lam mada yu n'mu n'pru ai ten Nu a sharin shaga ai n'sen hpe ya ngai bai na mayu. Nu e lam naw madaun la rit, kamhpa shara naw jaw rit, hpaji naw jaw rit Nu .. Nu.... e.!
Nu a shawang tsawra myit kaba hte sharin a chyin dawk sam bang ya ai, myu tsaw n'gun Nu a n gun, lapyin lahpaw n'gun atsam lagaw lata myit jasat yawng hte myu sha yawng hpe zingri roirip sat ai hpyen hpe Nu jaw ya ai atsam kaba hte gasat shamyit nga ai ten shana yup ra shang wa shagu Nu kyu hpyi ya ai hpe dum dat shagu chyalai a tsam marai rawng ai zawn nga n'gun lu ai Nu. Nu kyu hpyi myit dum ya nga a dawng, Nu, Ma wa na lam de yu nna myisha n'grip la nga a dawng...... Nu e !
Shut hpyit lam hpe sharai let, yawn hkyen myi prwi gatsut let, shabai myit hpe shading let, shawng lam n'gun hpe awai let, ru yak jamjau ai hpe hkam sharang let, Nu hpang bai wa na, awng padang dawnghkawn sharawt let Nu hpang de du hkra bai wa na yaw, Nu chying hkai Nu e...!
Ka Nu ni yawng ngwi pyaw hkam kaja u ga, Ka Nu ni yawng hpe shakawn hkungga ai. Yawng hta grau ai, yawng hta tsawm ai, yawng hta kaba ai, yawng hta atsam rawng ai, yawng hta grau tsaw ai Nu ngu nna shakram shaga dat nngai.... NU
Galoi shaga dat tim n'gun lu ai, tsaw tsaw ra dik ai chying hkai Nu e..........!
Baren Numraw
3 comments:
Grai myit n.gun lu ai..n.nga mat sai nye a chyinghkai NU hpe myit dum ai..myi prwi hte NU hpe shakram let shawng lam majan pa hta tsap nga ai WP myu tsaw share shagan ni a matu kyu hpyi myit dum ya nga ai..
nu shut hpyit ai mara ni hpe raw ya u yaw nu....
nu shut hpyit ai mara ni hpe raw ya u yaw nu....
Post a Comment