2011-06-09 SHANI HPANG WA AI MAJAN GAW

Karai kasang gaw, myen gumshem satan a kata kaw rawng nga ai Kachin Wunpawng Sha ni yawng hpe asan sha garan ginghka shaw la na matu shabyin dat ai majan rai nga ai.Hpa majaw nga yang 1994 ning hta myit hkrum tawn da ai gap gasat jahkring ndai sha nhten mat yang gaw myen satan a kata kaw annau ni naw matut rawng nga ra na re. Ndai 1994 ning na gap gasat jahkring ta masat hpe jahten kau na matu Karai Kasang gaw myen asuya (satan) hpe jai lang nna jahten shangun dat ai re. Karai Kasang a kasha ni hpe gaw jahten sharun bungli galaw shangun tim galaw na nre hpe mung Karai Kasang shi nan mung chye ai hte maren satan hpe myen asuya kaw shang na ahkang jaw dat sai. Shi a kasha rai nga ga ai Annau ni a ntsa e mara n-nga hkra makawp maga na matu hkam sharang lu ai n-gun jaw ya sai. Galu kaba ai myit jaw ya ai. 2001 ning, 2005 ning, 2006 ning ni hta Annau ni hpe myen satan ni mara kata wa sat sharu kau ya tim Wunpawng Mungdan Shanglawt Asuya KIO/KIA gaw matai nhtang ai,1994 na gap gasat jahkring myit hkrum lam hpe njahten ai. Ngai na myit hku rai yang gaw dai shaloi n-jang majan wan bai shachyi dat na hku re.

Ngai nan mung KIO/KIA a ntsa e loi mi myit machyi na zawn nga hkam sha lai mat wa yu sai. Ndai zawn Wunpawng Mungdan Shanglawt Asuya KIO/KIA a myit galu kaba ai shawang myit gaw Annau ni myen satan a kata kaw nna asan sha lawt pru lu na matu Karai Kasang jaw ya ai lak nak gaba nan rai nga ai.
                           
Dai majaw Wunpawng Mungdan Shanglawt Asuya KIO/KIA Ningbaw Ningla, Hpushawng Hpuba ni hku nna ndai lang myen asuya hte bai hkrum shaga jang MAYAM LAK MAT gaw nwoi htu sana re ngu kam ai. Gap gasat jahkring nna mungmasa bawngban mat wa ga ngu ai lachyum gaw Annau ni hpe gyit hkintum tawn nna, MAYAM ZAWN kam ai hku shangun sha na ngu ai lachyum re. GAP GASAT JAHKRING LAK MAT BAI GAHTAP HTU DAT JANG...
(1) Karai Kasang a ga hpe nmadat nmara ai.
(2) Annau ni nan myen satan a kata kaw MAYAM TAI NA GA AI ngu nna hkamla ai hte bung na.
(3) 1961 ning February 5 ya shani kawn lang hpang wa ai Annau ni a lak nak sinat gaw HPUN TAWNG byin mat na.
                           
Bai nna, myen asuya a ntsa e Annau ni grai sadi ra ai lam ni nga ai. Ga shadawn Awng San wa galaw da ai bungli gaw Awng San wa nnga mat jang dai bungli mung tara nshang mat sai. Dai re majaw ndai lang bai hkrum bawngban ai shaloi U Thein Sein, Aung San Kaw, U Aung Myinn, U Sai Mauk, ndai ni kadai mi woi awn awn, nmai kam ai. Lapran sakse hku nna UN hte mungdan kaba langai ngai shang dung lawm ra na re. Myen asuya hku nna gap gasat shawng jahkring nna she mung masa bawngban ga ngu nna tsun na lam nnga ai. Lachyum gaw shanhte wa htim gap dat ai re majaw gap hkat let bawngban ra ai sha re. N-gap hkat ai sha sim sim sa sa bawngban mayu yang gaw shanhte htu ganawng bang tawn ai hpyendap ni ma hkra htingnut la mat wa ra ai. Bai ahkyak ai langai mi gaw Wunpawng Mungdan kata kaw myen hpyendap sha a nga dingsa, KIA a sinat lak nak gaw aten n lata ai mai ngoi kapaw wa ai lak nak rai ra ai. Myen asuya hte galaw da ai gap gasat jahkring gaw mai sau pa ntsa kaw na sha re. Shanhte gaw gap mayu ai shaloi mai gap ai. Anhte gaw gap ra tim nmai gap ai. Anhte na sinat ni gaw hpun tawng byin mat ai majaw nmai ngoi ai hte bung mat sai. Myen asuya hte gaw gara asuya mi galai yang galai, atsawm hkrak n rai shi yang shi hte chyu sha lak mat nmai htu ai.
                           
Bai nna langai gaw ndai ten hta hkan nang hkan sa nga ai mungchying sha ni mung grai ahkyak ai ten rai sai. Nkau mi Egudu de nhtang nna mayam bai wa tai na matu Mawshe hpe lam lapran kaw mara tam ai ni mung naw lawm nga ga ai hpe mu lu ai. Ndai ten kaw nna gaw tsaw ra ai Chyurum Wunpawng sha annau ni gaw myit hkrum mang rum ai hte Wunpawng Mungdan Shanglawt Asuya KIO/KIA a woi awn hkrun lam Hkanan Mungdan de ta gindun nna lahkrip ra ra hte rawt sa saga ngu nna lajin dat ai.

Sau Nan Du
3/6/2012