Slideshow Image 2

GALOI DU MASU NA (VIII)

Lai mu n'mai ai hkying ten prat ladaw ni hpe bai shabai n'mai ai zawn, annau ni a shawng lam hkyen lajang sa wa na mung masa hpyen masa lamang yawng hpe sung sung jaw jaw lahkam htawt sit sa lu na gaw annau ni yawng a ahkyak dik ai asak janmau rai nga ai re. Kalang myit malai lu yu saga ai. Kalang masu ai hkam mana sha wa yu saga ai. Lahkawng lang masu ai hpe bai kam ai wa gaw masu katut ai wa madaw mana kaba nan rai nga ai zawn mungdan hte myu sha yawng hte seng ai magam lit re majaw dai ni annau ni dawdan shut kau yang gaw tsaban law law sum machyi mat chyalu re zawn ndai zawn re ten hpe bai lu na n'loi sai.
                          
Dai ni myen a rapdaw Slg ni hpe laning mi annau ni maram yu wa saga ai. Democracy tara rapdaw slg ni nga mying gaw gum hkawng dik nga ai tim, poi sa yu ai Slg ni hte she bung nga ai. Rapdaw zahpawng galaw ai ten hta gaw le ra n'jaw ai n'dai naw ra ai nga nang shoi nang sha rai, dang rang madi madun, madi shadaw hkat rai rapdaw zahpawng ten gaw bungli law dik ai zawn rapdaw zahpawng ngut ai hte rau gaw hpa bungli nlu ai ni tai nga ai hte hpa daru ahkaw hkang n'nga ai Slg ni tai nga ai. UDSP party hpyen gumshem ni a U shoi dun nna shangun sha ai masha u hpung ni zawn rai nga ai re.
                            
Dai hte maren Thein Sein mung sumla hte bung ai Gumsan langai sha re hpe asan mu chye mai nga ai. Hpyen dap hte langai sha re, hpyen dap a madi shadaw ai  hpyen hpyi raw kalai nna Gumsan byin wa ai re majaw hpyen dap hpe lai  nna hpa lu galaw ai lam n'nga ai. Dai majaw laning mi ladu hkrum wa tim Thein sein tsun ai hta hpyen dap galaw sa nga ai gaw laga ga rai nga ai hpe yu nna hpyen dap hte Thein Sein asuya gaw langai sha re hte, Thein Sein Gumsan magam byin ai, Democracy Tara hku sa ai rapadaw re nga shamu shamawt hpang wa ai kaw na majan gaw byin hpang sai hta n'ga annau ni hpe mung lani jan gasat shamyit kau lu ai nga tsun dakak ai. Hpunau Rawang ni hte annau ni shada sai hka lwi na mahkyen hpe mung sum prat dawk shapraw ya sai re. Dai re ai majaw dai ni na simsa lam tam ai hpung ni hpe mung kara hku mung mai kam na lam n'nga ai.
                            
Dai ni myen mung a mung up masa masing hkrang gaw Tara kanu hkrang a n'tsa e, up hkang sha ai daru magam ahkaw ahkang jum tek ai masha u tsang ni up hkang sha nga ai mungdan byin nga ai re, up hkang sha ai masha ni kata kaw Tara kanu hpe ra ai hku gang kayin nna je yang up hkang ai, arawng aya lu ai ni a n'gup kaw tara kanu kap noi ai ladat, tara je yang ai masa hta mung Gumhpraw hpe yu nna tara je yang ai, laknak hte hpyen dap a ra ai hku gang gayin up hkang ai n'pu kaw tara kanu madaw nga taw ai re majaw Democracy tara hte sa ai Tara rap ra ai ngu kara hku mung n'mai tsun ai zawn up hkang ai kata hpe hting grum kata e  hpyen gumshem a u shoi dun nna up hkang nga ai re hpe asan sha mu chye mai nga ai re. Dai zawn masa naw byin taw nga ai kata kaw mung masa bawngban ga ngu ai gaw shingran yu yang tsawm na re tim hpaw dat yu yang lapu kaba a n'gup kaw shang mat chyalu re.
                           
Hpyen yen tsin yam ni hpe garum ningtum  na lam hpe pat shing dang tawn ai gaw Thein sein asuya gaw hpyen asuya re lam asam madi madun nga ai lam re. Democracy tara hkrang hte hkrat sa ai mung masa rapdaw asuya rai yang hpa majaw shing gyin ahkaw ahkang hpe tawt lai ai mabyin mahkyen ni hpe dip pat shingdang na ta? Bai hpa majaw masha sat mare nat kasu kabrawng hpung tai nga na ta? Dai ni myit n'san seng ai Tara hpe n'hkungga ai myen mung asuya gaw shara magup n'dai hta grau naw kasu kabrawng na lam mahkyen nga ai. Dai ni 88 jawng ma hpung ni gaw shan kya tam ashun hkawm nga ai  wan wut hkawm nga ai, myen mung shing grup nna manghkang shachyi tam wut hkawm nga ai re, myihprat wan n'lu ai lam, bungli galaw masha ni shabrai n'law sha ai manghkang, lamu ga zing madu ai manghkang, ya rahkaing manghkang, hta n'ga nna, kade nna yang mung masa party la ni a manghkang bai, myu lakung shada sai garan ai manghkang ni, Lahu Ahka, Padawng, Pa U, Yaw zawn re ni manghkang gaw myit san seng ai lam n'nga ai tara hkungga ai masa n'nga ai myen asuya hpe magup sum hpa hku manghkang kaba ni mai shabyin nga ai re.
                             
Hpaji jawng manghkang Tara Slg tara jeyang ai tara rung manghkang, hkam ja dap manghkang, magam gun dap manghkang ni hte, sut hpaga manghkang, Miwa, Gala manghkang hte ya ahkyak kaba rahkaing myu sha manghkang hte  Mun 10,000 dan maisau Gumhpraw pa htuk shapraw ai gaw myen mung a gumhpraw manu grai hpa mat na manghkang kaba rai nga ai zawn myen asuya gaw mawhpyi kunyawn hpyi sha ai asuya hte bung nga sai lam madi madun nga ai hte maren re. Tsam daw hkyen nga sai hpun kaba hte bung taw nga sai myen hpe hpa rai na naw hkrit nga ra na ta? N'bung n'gawut tim pyi daw hkyeng sai, n'gap tim pyi shi a pala hte shi si na sha rai sai ten annau ni sadi dung dung mai wang hkap taw sha ra sai, sawn kaba sumgawn kaba hkap nna la taw nga sha rai sai ten hte, bawngban na hpe mung grat dagra re lam n'mu yang masa gin sup ai hku lapran Slg, ni hte laika hte htinglet jahkrup ai gaw grau naw hkrat na re.
                             
Dai annau ni hpaw ai jawng hkan myen jawng kaw lang ai bu hpun palawng ni hpe jawngma ni hpe nlang shangun yang grau kaja na re, byin mai yang jawng ma ni hpe hkahku labu palang hpraw zawn re jahtuk hpun mat wa lu yang mungkan na yu tim grau htap htuk manu na re zawn annau ni gaw Jinghpaw WP myu sha re mungkan de n'dau ai hte bung na re. Jawngma ni hpe ya kaw nna ningnan kaw na myu sha lam ni hpe dawk bang mat wa lu yang she htawm hpang myu tsaw ai share ningbaw ningla ninghkring ni tai lu na re. Jawng kaji lawu tsang kaw nna ningawn mung masa lam ni hte myu sha lam yan hpe sharin hpang mat wa lu yang kaja na re.
                                 
Htunghking lam yan hpe lamang langai hku sharin nan sharin ya ra sai re, dai ni annau ni a kashu kasha ni jinghpaw laika nçhye hti nçhye ka ai ni jinghpaw ga pyi atsawm nçhye ga mat wa ai ni grai she law mat wa ai gaw myu a matu hkrat sum hkra machyi dik ai lam re zawn masha ni a sum prat dawk bang loi dik ai gaw dai masa kaba ni nan re. Makyit ngang mahkri ngang gyit shawn tawn lu na matu myu sha ru sai, shachyen shaga lam, htunghking laili laika ga gaw madung nan re hte annau ni a labau hpe chye nan chye hkra dawk sam bang ya ra ai.
                                
Myen a hpyen masa kalai shai sa wa ai lam n'mu ai kaw kachi mi mung n'bawngban yang kaja na re. Masa kaba hpe ja ja la yu nna, jut shara ra hpe myen a sai chyam yu ai hte hpawn  htu htim gasat yu ra sai. Myen gaw gumhpraw mang hkang da, manghkang grup grup de na byin hpang nga sai hpe yu nna lahkam kaba langai htawt shapraw  chyam yu ra ai ngu sawn dum ai.

Hkrun lam galu majan chyinghkraw galu hpe dai ni gaw shangut majan shakre majan de she yawng yang kaja na sai law.

Baren Numraw

2 comments:

Mau Jin mau Jin said...

Laika sara wa aq ning mu, ga si hta lawm ai yawng , kio ningbaw ni hpe wunkat jaw ra na tai ai. Hpa majaw nga yang, ning baw ni! Laika sara wa aq ning mu madang langai hpe pyi a tsawm chye chyang ai lam n nga ai gaw a san sha re. Ma nan wp aq myu rai nga ai kaw gwi si sa wa hpe kawa di shatai ti, wp jawng ma ni hpe labu tsit- palawng hpraw! Madu shara jawng shagu hta hpung shakap sha- ngun da ai gaw, tsep kawp myu tsaw myit n- rawng ai hpe madun dan nga ai re. Dai re majaw hka hku labu, shing n-rai man maw htingnai hking ni hpe hpun ai gaw grai kaja ai. Ningbaw ni e teng myen hpe hkrit ai rai yang, n ta wa mat mu, an-hte gwi ai ni mungdan hte myu sha yawng hpe hke shaw na ga ai. N-gup gaw baw law, ta gaw lagyaw rai, n sha u aq manu dan ai hpa!! Kachin myu aq matu manu ndan ai she rai mat sai law...

Larin said...

Laika sara wa a ningmu jaw ai, teng ai...madi shadaw ai comment jaw ai myit su Mau jin tsun ai mung jaw ai. Aga!!!!! Shanglawt ginra na jawng hkan e mung myen ni masat ai bu hpun palawng lang taw ai lam daini she chye lu n-ngai...kajawng sai. Dai zawn rai taw nga na gaw shadu pyi n-shadu ai rai sa. Shanglawt shanglawt nga na gade shakut shaja nga tim shamu shamawt ai lam n-jaw jang gaw mjoi aten ma asak ma she rai na re. Dai majaw annau ni wunpawng asuya hta ningra taw ai, shut taw ai lam ni ning re mu ai shaloi, dum ai shaloi shadum jahprang hkat ga. Mung masa, shanglawt hkrunlam nga yang ga jarit, up hkang ginra, ahkaw ahkang hta chyu htu ai n-re....hpyen wa a laika, htunghkring ni hpang n-hkan sa na hku di na mung ahkyak re.

Post a Comment