Slideshow Image 2

KALAI KAU GA

Mu lu ai atsam marai hta n'mu lu ai atsam marai gaw grau n'gun ja nga ai hte grau hkrit hpa kaba re. Kalang mi sinna mungdan a mare kaba langai mi kaw ngai masa a majaw sa hkawm du ai shaloi, lana de mi wang leng daru kaba langai kaw ngai mu maram dat yu yang asak 75/80 daram re dwi dinggai langai mi gaw baw kara hpraw taw sai hte n'kung n'kang tin shapun rai hkawm shamu nga ai. La hkra lata de rai bang ai htingpa kaba langai mi hpe n'dang n'la rai dun, la pai lahpa hta gaw ram daw kaba ai tingsan mung noi tawn rai, wanlng de lung jawn na hkyen ai tim shi gun ai htingpa kaba hpe n'dang n'la dun shalun la yak nga ai hpe mu n'na wan len mung rawt mahka rai sai. Yu matsan dum ai a jaw, ngai gaw dwi hpe [chyeju hte ngai garum la yang mai na kun?] ngu san dat ai hte shi a htingpa hpe dun garum na matu nye lata hpe mung ladawn dat ai shaloi shi gaw hkrit n'tsen ai myi man n'sam hte yu dat nna n'gup de na mung {Ngai Kade garum ai mung grai n'ra shi ai} nga tsun n'htang dat ai hte myit grai n'gut ai n'sam hte yu dat ai hpe mu yang ngai mung mau dik ai hte hpa rai nye a ahkyak la matsan dum tsawra myit hte garum mayu ai hpe n'dai zawn n'hkap la ai kun? n'htang myit yu na grai mau kau ai.
  
Aw... Masha langai mi a lu gin lu taw ai ahkaw ahkang hpe dingbai dingna jaw ai, masha langai mi a atsam marai hte n'gun hpe shadaw ya ai, masha langai mi a ja dik ai kata n'gun myit marai atsam hpe jahten ya ai, masha langai mi a kamsham myit mada dating  tawn ai kata myit makru myit jasat hpe matu n'ding hkra myit anut ya ai, jahten ya ai hte bung nga ai. Masha langai mi a n'gun ja dik ai kata lam myit marai myit jasat atsam hpe n'tsen ai n'kam shangun ai masa de she kale mat ai, matut nna masha langai mi a shawng de n'gun hte hkawm sa lu na hkam kaja ai hte asak galu madu hkum hpe kam hpa ai myit atsam grau lu na matu, madu hkum hpe wanglu wanglang dawdan  galaw lu ai ahkaw ahkang n'mu lu ai kata n'gun gaw mungkan hpe rawt jat ngwi pyaw ai hte sa lu na simsa ai mungkan byin lu na matu madu lu ai atsam hpe madu ra ai hku dawdan sa ai gaw ahkyak dik masa re. Mungkan a ana zinli hpe hkam jan dang kau lu na mung masha yu n'mu lu ai kata lam myit n'gun rai nga ai. Masha law malawng gaw n'tsa lam hpe yu nna masha hpe dawdan galaw mu chye ai majaw hkrat sum chye nga ga ai.
     
Mungkan hte shinggyin masha ni hpe rawt jat galu kaba dik shangun ai gaw masha a n mu lu ai kata lam myit a tsam marai re zawn, mungkan hta masha a hkrit tsang ra dik ai mung masha a kata na myit jasat myit atsam marai rai nga ai . Masha a kata na n'mu lu ai n'rut n'ra laswi lasa sai lam bawnu n'soi n'sa myit atsam gaw masha langai mi a asak galu na n'gun kaba rai nga ai zawn masha hpe si shangun lu ai hte hkrung shangun lu nga ai. Kalang mi Rangon myi n'mu  jawng kaw na, myi n'mu ai jawngma langai mi gaw ngai kaw 3-4 ya wa manam ai, shi hpe ngai hte rau manang ni n'ta hkan nawku jawng hkan woi hkawn chyai chyai rai n'ngai, lana de mi n'rim rim wa ten ngai manang wa n'ta de lam hkawm chyai ai hte hpawn bungli mung loi bawng ra ai majaw ngai pru hkawm sa na hkyen nga yang dai myi n'mu ai jawngma  mung ngai hte rau hkan na matu tsun ai majaw rau sha hkawm sa wa ai tsawm ra na hkawm du ai shaloi a kajang sha {Sara sadi u shawng kaw n'hkun kasha langai mi nga ai lu} nga myitmu samsi ndum shami rai hkawm nga ai ngai a kajawng sha hkawm nga ai kaw na lagaw lahkam hpe jahkring kau nna yu dat yang kaja sha wa nye a shawng e nga hkang hta grau kaba ai dawng jan sung ai n'hkun hpe mu dat majaw kajawng mau dik ai hte aw ngai myi 2 mu ai wa pyi n'dum mu chye ai n'dai zawn re hpe myi n'mu ai wa madaw ngai hpe lam madun lu ai ngu mau ai hte n'kam ai myit ngai hta hpring nga ai jaw, [taw-- Naw San hpa rai n'dai n'hkun nga ai hpe nang kara hku chye n'ta? ngu san dat n'ngai. {Sara anhte myi n'mu ai ni a matu gaw ana latsun su ra ai, makau grup yin a n'sen hpe madat shingram chye ra ai, bai lagaw lahkam htawt ai hpe chye shingram hti tawn ra ai hte ladi hpe mung makau grup yin a abat sama manam ai hpe manam ginghka shingram chye ra ai hte n'gup hta na mung n'hkring n'sa makau grup yin a lam hte hkrun lam a nyi ai tsan ai hpe san shatsang ra ai re. Myit masin bawnu hpe mung myit lawm dik ai hte myit shim dik ai hte ahkyak la nna maram matsing chye lu hkra shakut matsing ra ai re zawn kalang mi mung n'du ga yu ai shara hkan rai yang grau nna myit masin bawnu, makau grup yin a nsen sama, lagaw lahkam ni hpe ahkyak tawn n'na sawn madat maram hkawm sa chye ra ai gaw anhte myi n'mu ai ni a matu lam kaba nan rai nga ai. Kata lam myit n'gun marai atsam gaw anhte matu awng dang ai hkrun lam masing re. Aw kata myit marai atsam wa myi mu ai ni hta pyi grau nga ai.

1-Tsaw ra myit ngu ai gaw dinggai dingla si ten du jaw ya mai ai zawn hkam la mai nga ai.
2-Hpaji hparat mung dinggai dingla ten du hkra sharin ya mai ai zawn sharin la mai nga ai.
3-Magam bungli hpe mung si ai ten, lup sung hku du ai shani du hkra galaw shangut kau da ra ai re.

Sali Wunli Dashi
1-Kanu Kawa ni lusu ai marang e nang hpe sutsu ai masha langai byin hkra dashi wunli garan jaw sai tim nang n'kaja yang masha ni hpe jamjau jaw ai, masha sat ai, masha ni hpe jahten ai, madu hkum madu jahten nga wa wa sha tai na re.
2-Hpaji hparat dashi garan jaw ai hte Nuwa ni n'chye ai a jaw jamjau hkrum lai wa sai kaw na lawt tinang kasha ni lawt lu u ga ngai lu malu ahkrawk dut lu malu atsam dat nna nang hpe hpaji chye hkra shakut ya sai majaw janmau gup lu sai, masha kaba, sara wun kaba, hpyen du kaba tai sai tim nang n'kaja yang masha hpe jamjau jaw ai, masha jahten ai, masha sat, masha hpe masu ai wa re zawn madu hkum madu masu ai wa sha tai na re.
3-Kaja ai sali wunli hkam la lu na matu Kanu a hkritung kaw naw rawng ai ten kaw na madu Yesu hte kyu hpyi shachyen ya ra ai zawn shangai ten gup n'na ningnan ninghtoi mu dat ai hte, Madu a U Dang sumla hpe shawng shachyen ya ra ai hte chye tsun, chyena, chye shaga ai kaw na Madu Yesu hpe ja ja shachyen ya ra ai zawn ngwi pyaw tsit tsawm ai anhte buga dailup daihpang ga hpe shachyen ya ra ai. Byin mai yang ma shangai ai ten madu buga dailup daihpang shara kaw shangai lu yang kaja dik re. Mungga tara kata kaw dinghku a ritkawp tara kata kaw chye nga chye pyaw hkra sharin achyin sambang ra ai. Kaja ai sali wunli hkam la lu na gaw ahkyak dik ai, myusha ni a rusai labau, maumwi, htunghking shachyen shaga lam hte shinggyin nauna myit kanu yan kawa a lahpyen shingma kaw nna sharin ya ra nga ai. Lani mi tup na madu a tinggyen galaw ra ai ritkawp tara ni hpe ka jahkrat tawn ya nna sharin a chyin ra ai.

Jau jau rawt shaman ai kyang lailen hpe sharin ya ra ai. Yup rawt yup hprang ai ten shagu kyu hpyi ra ai, de hpang yup ra gumba ra ai hkum tsan kau ra ai hkum jasan jaseng chye ra ai. Kaji ai kaw na madu hkum madu lit la chye hkra, madu myit magam myit hte bungli chye galaw wa hkra, myu tsaw mung tsaw ai myit jasat kyang lailen ni hpe sharin ya lu yang si tim lam yit na n'rai sai re majaw naw kaji ai ten gaw masha langai mi matu n'pawt gawgap la na ten kaba kata myit, n'gun kaba nan re. N'pawt ngang ra ai. Kaji ai ten gaw prat tup na hkrun lam a n'pawt re majaw ahkyak dik ai hte kaja ai sali wunli hkam la chye na ten re.

Dai ni annau ni rawt jat galu kaba ai masha uhpung uhpawng langai hta madang nga nga, prat dep dep bawngring sa wa lu na matu
a-Ten hpe manu chye shadan ra ai.
b-Ritkawp tara  hkungga ai masha tai ra ai.
c-Madu mungdan hte myusha ni hpe tsaw chye ra ai.
d-Madu myit, magam myit hte bungli chye shachyen shaja ra ai.
e-Dam lada ai myit masa galu kaba ai shawang myit rawng ra ai.
f-Madu masin madu ladi, madu lahtan na myit sha n'mai myit ai, manang wa ladi hte n'sa sa ai n'gun atsam hpe n'mai kam ai.
g-Lam shagu hta pandung mahkyen masing lamang shawng jahkrat tawn nna galaw hpang u.
h-Grai n'galaw yang shawng myit jahkrut u, galaw sai hpang hkum hkrit, bungli hte mahkrum madup ten masa ladaw  gaw nang hpe sharin ya ai.
i-Ten mi hta bungli lahkawng chye galaw hkra shaman u, kalang kahtam yang 2 di ngu lachyum shapraw u.
j-Hpu dik ai hkying hkum 24 hpe manu shadan u.
k-Ram ten hte janmau 1 lu hkra hte grat dagra re bungli langai lu hkra masing jahkrat  u.
l-Manang wa hta shawng hkra, jawng sa bungli galaw sa yang jau du hkra shakut u. m-Kata myit masa hpe san seng hkra shakut chye wa yang shinggan hkrang masa shi hkrai tsawm htap rawt jat wa lu na re.
n- Lagawn lamawn manawn masham myit n'mai rawng ai, myit galu galang tawn chye ra ai zawn hkam kaja ai hte bungli law law lu galaw nna simsa ngwi pyaw ai prat langai hpe lu la na re.

Dai ni annau ni myit jasat kyang lailen ni hpe kalai kau ra nga ga ai.
I-Malu masha ni hpe kalai sha chye ra nga ga ai. N'gun hpe akyu n'jaw ai malu masha ni hpe koi gam kau ra nga ga ai zawn kan sha hkru nna n'gun jaw ai malu masha ni hpe kalai sha chye ra sai.
II-Nga sat ngasa galaw lu galaw sha lam hpe prat madang hta hkan nna chye galaw sha ra sai. Madu lamu ga hte madu masa hte htuk manu ai bungli hpe chye tam galaw ra sai.
III-Num La ganawn mazum ai hpe prat madang hta hkan nna kalai shai ra ai, dinghku de sai kaw nna ma lu ra ai gaw shingra htung re ngu ai hku n're sha prat langai mi a madu tai wa na sali wunli kashu kasha hpe ningnan grai n'la ai kaw na'n'gun atsam krung krung hkru hkru kanu yan kawa myit jahkrut tawn nna hpaji chye n'gun atsam rawng ai hkam kaja ai kasha langai byin tai wa lu na matu madu jan madu wa jau jau kaw nna bawng jahkrup ai hte ma la ra nga ga ai.
Labu hpun palawng hpun tawn tim num/la gaw hpa re ngu ai hpe chye nga saga ai hte maren hpang de zetlet kunghpan ai atsam marai rawng ai myu hte mungdan a n'tsa e sadi dung ai, makam kri dung ai hpaji chye ai ningbaw tai wa lu na ma a matu hkyen lajang na gaw kanu yan kawa a lit rai nga ai zawn, da shatawt n'mai ai. Sari sadang hpring ai tara hte ding hpring ai hpe hkungga ai dinghku de sa ra ai.

Dai ni annau ni hpaw ai jawng ni hta jawngma ni a buhpun palawng ni hpe myu htung hking buhpun palawng ni hte jahtuk jahpun sa lu yang kaja dik ai. Jawng shagu hta lawu na ga shaka ni hpe tsun shangun yang kaja na re.
1-Anhte gaw Karai Kasang a Tara, Myu hte Mungdan a Tara, Nu Wa hte Jawng a Tara ni hpe galoi mung hkunga let hkan sa nga na ga ai.
2-Anhte gaw Karai Kasang hte Myu hte Mungdan Nu Wa ningbaw ningla sara/sarama ni hpe galoi mung tsaw ra nga na ga ai.
3-Anhte gaw Karai Kasang hte Myu hte Mungdan NUWA Ningbaw Ningla Sara/ Sarama ni hpe galoi mung hkungga nga na ga ai.
4-Anhte gaw Karai Kasang a Makam masham hte Myu hte Mungdan Nu Wa Ningbaw Ningla Sara Sarama ni hpe galoi mung makawp maga nga na ga ai.
5-Anhte gaw Karai Kasang a makam masham, Myu hte Mung dan Hpaji Hparat galu kaba bawngring rawt jat wa hkra galoi mung shakut nga na ga ai.
Ga shaka n'dai ni hpe jawng grai nlung shi yang hti tsun shangun lu yang kaja na re ngu mu ai.
Laika ga yan ni hpe gaw matut nna htuk manu hkra ka lajang la yang mai na re, n'dai gaw ngai langai mi a ningmu sha re. Zetlet kunghpan ai rawt jat galu kaba bawngring ai Myu htunghking Mungdan hpe manu shadan ai tsaw ra chye ai ni byin hkra galoi mung kata n'gun hpe chyoi pra san seng ai myit jasat myit marai tawn lu hkra ten hpe ahkyak la akyu jashawn lu yang shim lum rawt jat galu kaba dik ai mungkan hta dan hkung ai myu kaba langai tai wa lu na re law.

N'lung bawlung htawng dan ga, Zai bru sumri rit dan ga, Kala sum pyi dum ga.

Baren Numraw
28/6/2012

1 comments:

htan nuk said...

hkung ga ai,baren numraw a lai ka lu hti ai majaw grai gabu ai sha n ga n gun mung grai lu ai,htawm hpang de mung,matut manoi n gun jaw let ka mara ya rit ngu,matut nna hpyi lajin dat nngai law.

Post a Comment