LAGANG:- Myenmung kaw nga pra sa wa ai bum nga masha ni hte pa layang na myen amyu ni yawng gaw shanglawt lu ai shani kaw nna dai ni du hkra simsa ai namchyim rai n hkam sha yu ma ai hpe hkaja yu ai shaloi aten langai hte langai a mabyin masa n bung ai hpe mu lu ai. Rai yang dai ni na manghkang gaw kaning re ai ladat lang nga ma ai kun, shara shagu jawt hkawm nga ai Salang Pyilan kaw na hpyan dan na matu hpyi shawn ai.
PYILAN:- Satan a yaw shada ai gaw bum nga masha ni a nga sat nga sa lam, amyu htunghking hte amyu bawsang a amying shingteng hpe masat dingsat galaw tawn ai kaw na shamyit kau na matu rai nga ai. Aten langai hte langai hta lang sa wa ai ladat n bung timung, yaw shada ai shingdu lam gaw galai shai ai lam n nga ai. Wunpawng Myusha ni hte KIO hpe shamyit kau lu na matu satan wa gaw gade daram shakut ai hpe mu wa saga ai. Satan gaw kaga rawt malan hpung ni hpe hkalem la nna gap hkat lam shazim kau lu sai raitim, jet ai simsa lam n re majaw hpu nau rawt malan hpung ni gaw hkalem kau hkrum ai hpe dum wa nna kade nna ai laman bai matut gasat wa na mara ai. Dai shaloi byin wa na majan kaba hta awngbadang shu la lu na matu rawt malan hpung shagu hte mungmasha bawsang shagu gaw mungdan kata kaw mung, maigan mungdan hkan e mung, dangdi dangdep ai atsam yawng hte kahkyin gumdin lam ngangkang wa hkra jawm shakut ra manu ai.
PRANGTAI:- KIO hte KNO gaw aten du wa ai shaloi ahkyak la na matu bungli garan nna laksan rai shakut wa masai. Dai ni gaw grup yin a masa hta hkan nna Ginjaw langai, matsun langai a npu kaw uphkang lam, majan lam, mungmasa lam ni hta Wunpawng Myusha ni a labau kaw tsaw htum ai n-gun hpe 2012 June 27-28 shani ngangkang htum ai kahkyin gumdin lam gaw-gap dat masai. Alu ai shani du sai. Anhte nam na dusat dumyeng malen pyen u numji numjoi ni yawng kaw nna ahkum ara madi shadaw la ga ai law. KIO hte KNO a woi awn ai awngdang masing a majaw sum mat ai anhte a ahkaw ahkang ni yawng bai lu wa na rai sai law.
Satan a labau lam hkaja yu yang myit hpraw san ai hte galaw wa ai hpe rai n mu yu ai. Lai wa sai ten hta hpu nau Miwa ni gaw satan wa hpe shanhte a lata kata na hka zawn nawn wa masai raitim, dai ni na ten hta Miwa ni mahtang satan a lata kata na hka zawn tai nga masai. Matut byin wa na mahtai gaw Yehowa jaw da ya ai hpaji hpe jahtuk lang chye ai wa a matu rai wa na re. Mungkan kaw satan wa gaw shi a myiman pa nna arawng mala lu na matu Ma Kaw jan hpe jahtuk lang nga ai ten re. Raitimung, madang langai kaw du ai shaloi Ma Kaw jan hpe lam numshe de shalen bang dat chyalu rai na re. Dai shani satan wa gaw shi mayoi tawn ai masawn kaw shi nan abraw la ai nhtoi du wa na re.
LAGANG:- Salang Prangtai a ningmu gaw grai dam lada ai majaw lachyum nkau asan sha n chye na ai. Shing re ai majaw, asan sha jawm chye na hkra "brang" ngu nna kadun tawk hku tsun dan na hpe ra sharawng ai.
PRANGTAI:- Masha kaga wa hpe garum hpyi ai hta, tinang galaw sa wa nga ai lam gaw tinang a matu akyu rawng ai zawn masha wa a matu mung akyu rawng ai lam dingtawk hku hte gawai ai hku nna chye shangun ai lam rai nga ai. Majan pa kaw nang si ngai si n ju n dawng ai myit tsa htam hpring hte sat hkat ai raitimung, mungmasa lam tsun shaga ai hkinjang kaw du ai shaloi dam lada ai ningmu lang nna jahtuk tsun ai gaw htap htuk ai lam rai na re.
Mungkan ting hta chyam bra sa wa nga ai Wunpawng Myusha ni gaw tinang amyu a lawt lu lam masing hta byin mai ai yi-ngam kaw shang tsap nhtawm dangdi dangdep ai atsam hte arang shang lawm nga masai. Ndai hkrun lam hta shanhte a myit daw hten mat hkra galaw na matu gaw satan a lit rai nna, daw dan tawn sai hte maren awngdang wa lu hkra shakut sa wa na matu gaw Wunpawng Myusha ni a lit rai nga ai. Wunpawng Myusha ni yaw shada sa wa ai pandung kaw teng teng du wa lu mu ga matu, anhte a zuphpawng kaw nna aja awa madi shadaw dat ga ai law. Puk Dun
30/6/2012
0 comments:
Post a Comment