June (13) bat Masum
Jinghpaw Mungdaw KIA hte myen hpyen ni gasat ai majan a majaw Samaw mare de hprawng du wa ai hpyen yen masha (4) hpe June (7) ya shana hkying (12:00am) ten hta Balik ni rim woi mat wa ai lam na chye lu ai. Matut nna Balik du hte balik n gun (30) gaw Samaw Hkalup Hpung Nawku jawng de du wa nna Nawku Jawng kata hkan shang jep ai lam ni galaw lai wa sai lam, Nawku Jawng kaw shang jep ngut nna Samaw Lawk (2) kaw shanu nga ai Slg. Dabang La nta na Shd. Dabang Ma Put (tsang 8 jawngma) hte rau lawk na Slg. Maru Awng, Slg. Labya Ma Di hte Sam Salang langai hpe rim woi mat wa ai lam na chye lu ai. June (9) ya shana yup tung hten hta mung Slg. Dabang La (asak 87), Slg. Brang Hkum yen hpe bai sa rim la nan Slg. Dabang La hpe gaw hpang shani bai dat ya sai lam na chye lu ai. Buga masha ni gaw hpa majaw n dai zawn rim ai, rim na gara kaw tawn da ai lam hpe gadai n chye ai majaw myit tsang nga ai lam buga masha ni kawn na chye lu ai. Lai wa sai bat lahkawng ram hta Sut Len Yang mare hta KIA myu tsaw share ninghkring ni hte myen hpyen hpung ni gap gasat wa ai majaw buga masha ni gaw ya na zawn Samaw mare, Mohgaung mare ni de hprawng du wa ai re lam hpe matut chye lu ai.
1 comments:
13 June shani Mogaung Balik dap kaw rawng da ai nga shiga na ai majaw rimhkrum ai ni a n'ta masha ni hte jinghku ni sa jahkrum yang Balik ni gaw hpyen dap de sa kau sai nga nna n-jahkrum ya ma ai.
Bai mogaung kaw du nga ai Hpyen Yen ni hpe hkyek hkyek karum la ra nga sai. Karum na masha/ uhpung uhpawng ni grai ndu shi ai majaw Hkap la da ai Buga hpung na Hpung Woi ni hte lit hkam ni myit ru nga.
Hpyen yen yawng Mahkawng Buga Hkalup Hpung kaw (60)jan, Mogaung Buga Hkalup Hpung kaw (60) jan hte Mogaung Sinna Buga Hkalup Hpung (ChyunTaw) kaw (80) jan re.
Post a Comment