Grup grup de n'na n'gun kaba hte htu matep dip gamyet apyet tawn ai kaw na, baw sumhpa hpan hkum hkra ladat hkum hkra hte sharu shatsang duhka jaw tawn nga ai kaw na myit mada shara kachyi sha re ninghtoi hkuwat kaw na pat tawn ai ningsin chyinghka kaw na kara hku matep pru lu hkra shakut na rai ta? Myit mada shara kachyi mi sha nga ai kaw na htu malawk pru lu na matu gaw kaba dik ai ja dik ai myit atsam marai rai nga ai hte ja dik ai arang kaba gaw annau ni a lata lahpum n'gun atsam rai nga ai. Htauli htaula myit shen shachyaw maram masing jahkrat ai gaw annau ni a kamhpa tawn ai pandung hpe shading sharai ya ai lam rai nga ai.
Kaning rai nna kabai kau sai maza hpe ja tai hkra kara hku galaw na, lu nga ai hkying ten hpe manu shadan chye nna n'gut n'dawt n'tsam ai myit hpe shaja nna shawng de gwi gwi ganawt sa wa yang teng awmdawm lawt lu ai de du na re. Tengman tara ai n'gang kaba hpe ja ja jum tek lu yang teng shanglawt lu na, Karai hte rau rai nga yang hpa hkrit tsang naw ra na ta? Dai ni annau ni ra kaba rai yang she shakum gumba n'gang hku Karai hpe jai lang shaga nga ga ai gaw myit tsang hpa n'gam, pat tawn ai chyinghka rai nga ai. Machyi makaw hkrum wa jang, duhka jamjau hkrum wa jang, matsan tsin yam hkrum wa jang, lu sha shahpa n'lu jang, ra ahkyak wa jang she Karai wa hpe shaga nna n'ra jang makau kaw tawn kau chye nga ga ai, hkying ten shagu Shi Madu hpe sha kamsham shamyet shanat ai rai yang ten shanglawt gaw hpawt ni jang lu chyalu re. Duhka arang bang tawn ai kaw na annau ni rau sha lawt pru wa ra sai.
Up hkang ritkawp tara langai a kata n'pu kaw masha madang hkum hkra, masha utsang hkum hkra rau, lam langai de masing langai de lata gindun nna sa lu na matu, mayak mahka duhka jamjau myithki litli lam ni law law hpe rau hkam sharang nna myit galu kaba hte chyena chyetau ai myit ,magam myit madu myit hte rau sa wa yang teng shanglawt gaw kade nna yang lu chyalu re. Uhpung uhpawng hte sa ai kaw tara ripkawp gaw kara hku mung n'mai shayawm ai. Tara shaja ra ai. Law dik ai mayak kaba kata kaw na annau ni hpe arang kaba bang n'na hkam sharang dik ai hte myu sha a lawt lam hta share shagan shakut shaja ap nawng woi awn ya nga ai ningbaw ningla hpyen ma kaji kaba yawng hpe nachying chyeju dum shakawn shagrau kamhpa dik nga ga ai.
Moi de myen gaw makau grup yin mungdan htingbu htingbyen ni hpe grai chye dum, grai lak dum, grai byin dum grai gawngba dum rai, n'san seng dik ai myit jasat hte mayun mayoi masu magaw mawlu mawsha, da shatawt galaw sha lai wa sai hpe makau grup yin htingbu htingbyen mungdan ni gaw myu kaba la kaba myit jasat hte chye nga ninglen sharang shalai kau ya lu sai re tim, nau ladu shalai wa ai majaw dai ni gaw makau grup yin ni hpaga yumga ni hte hpaji n'htang jaw nga sai re. Moi gaw hpa ra tim miwa kaw kagat gat re ya gaw miwa mung Mali hka madim bai galaw lu hkra hte yenan Gas dumlawng shimlum ai hte lu shalai hkra KIO/KIA ni hpe lawan shazim ya nga aming kaba jahkrat jaw sai re. Pale palau sadi n'dung ai myen gaw Miwa hpe udi htingba tawn tawn mayu sai majaw hkangkawp tai n'hkrit, sinna hkran de marit shamai lu na matu uhka shayi, sinna ni grai tsaw ra ai Aung San Kaw a bahkang matu gang nna sinna shanhpraw brang ni a myit masin hpe gang ashun lu hkra galaw mayu ai raitim, lapran htinglek sakse tai ya na matu ra nga ai majaw, kaya n'su Thai tsawm shayi Yingluck Shinawatra bahkang matu gang shaja hkyen la rit law da. Raitim sinna brang ni hte htingbu Miwa, Kala gaw yawng jaw na yawng karum ya na tim n'dai naw shawng galaw u nga aming kaba jahkrat tawn sai.
1-Mali hka madim ninghkap.
2-Htawng rawng masha dat ya na ninghkap.
3-Yenan Gas ninghkap.
4-Bungli galaw masha ninghkap.
5-Wan shadaw ninghkap.
6-Lamu ga zing madu ninghkap
7-Myu bawsang ninghkap.
8-Arakhine makam masham myu ninghkap.
9-Simsa lam ningra ninghkap.
10-Matsan masha ninghkap.
11-Tara jeyang ninghkap.
Ndai zawn ninghkap garu nga ai hpe shazim lu yang nanhte ra ai yawng jaw na re. Anhte gaw sadi dung ai. Ya ndai lam ni simsa wa lu na matu nrau n'htau masu manaw garan ginhka hkawm nga ma tim ahkyak hta pausi di byin nga ai gaw hpa majaw ta? Simsa kasa shangun ma Aung Min wa sahka she gama shakut hkawm tim shani tup gatek tim, di gaw langai sha rai nga ai hpa majaw ta? Hpung shagu hpe garum hpyi, Num hpung hpe mung ga saw, 88 jawngma ni hpe mung hpaji hpyi, ya kalang bai Thein Sein wa 88 jawng ma ni hte hkrum na da oi? hpa majaw ta?
Sinna brang ni gaw lahta na lam yawng simsa hkra galaw sai kun da? Miwa mung nye hka galoi wa na, yenan Gas dumlawng galoi lu lai na, mali hka madim bai galaw na sai. N'hprang rai galoi lu htu shaw na, nanhte hte hpaga arang bang nna chyawm galaw ai ya hkang n'hkang nga sai. KIO/KIA hpe shamyit ya ngu ai ya kara kaw ta? Nang tsun ai yawng galaw ya sai le nga jahkrit hkrum nga sai.
Simsa lam lu na mung annau ni KIO/KIA kaw dang taw nga ai. Myen sum kaba sum taw nga ai hte myiman kaji kaya hkrum taw nga ai kade majaw ta? Annau ni gaw ya ten ahkyak dik ai bum pungding kaw kabye nga lu sai, hpyen masa n'mai shayawm ai. Simsa lam gabaw n'mai dat ai. Shara ra kaw du hkra annau ni shada kam hkra hte Miwa sinna dan makau grup yin htingbu htingbyen ni kam hkra myen hpe htu matsun hkindit shachyut kau ra sai gaw annau ni a Awmdawm Shanglawt na lam rai sai. Langai sha ngam tim myu tsaw mungtsaw sai n'mai shayawm ai. Ma ni a myiman hpraw ningsam hpe ja ja azi yu ga.
Baren Numraw
4 comments:
grai hkrak ai mungga re law... Madi shadaw ga ai....
Baren num raw hpe grai madi shadaw ai law. Myen gaw nau le dum, nau chye dum, nau chyai dum ai majaw, nau chyai ai leng maza katut ai ngu ai gaw dai ni myen na bai ni rai maw sai.Annau ni a matu gaw yup tung lai nna n htoi maga de rai nga sai. annau ni manu dan maw sai. manu hkum shayawm lu. manu manat dik dik di da ga.Annau ni hte sha n sim sa ding sa sinna brang ni myen ra n hkan ai gaw. Ya yang kachyi mi jum jaw ai she re. Dai hpang gaw myen na bai ni mayen mayu nna,sinna brang ni hpa nga tim hkraw mat sana re. Madu jan pyi shap marit nga yang shap na. kasha jaw rit nga yang jaw na ten gaw myen na bai ni kaw du wa sana ra ai.Annau ni gaw lahpawk dum let, ra lata la nna, lahpyaw hpyaw let padang manau nau sana re. Aw le le ohhwi......
Myen gaw masu magaw manai makai maw lanyet gasup ai hpe mung masa ladat shaw ai zen ai ngu nna htai la ai lam rai nga ai. Masu magaw ai hpe mung masa hku sawn htai la nna galaw ai prat mungkan hta htum mat sai hpe n chye nga ma ai. Dai ni na mungkan hta yawng ra sharawng ai sai kaba ai mung masa ngu ai gaw: tengman ai, rap ra ai shinggyim ahkaw ahkang jaw let woi awn ai mungmasa prat she rai nga sai. N tengman n tara ai, masu magaw, n hkru n shawp ai hpe mung masa hku sawn nn galaw ai ni teng teng hkrat na prat du sai. Tengman tara rap ra lam shinggyim ahkaw ahkang hpe jaw ya let woi awn ai an nau ni a mung masa gaw awng padang lu na sha rai sai law. Baren Numraw hpe madi shadaw dat ai.
Baren Numraw tsun ai hpe madi shadaw ai. Ya yang an nau ni Jinghpaw mung hpe gap di na masing lawan galaw ra sai. Gap di da nna ga shaga ra sai. Dai n rai jang hpang hkrat mat na. Myen hpyen hpe Lai Za kaw hkap shadaw gasat ai hku sha n rai, Myen hpyen ni Jinghpaw mung de rap shang wa na jarit mayan de mahtang hkap shamyit kau ai gaw kaja htum rai na re ngu mu mada ai. Dai n rai, Myitkyina hte Manmaw kaw na nnan rawt pru wa ai hte rau hkap gap shamyit kau ra ai re. Woi awn nga ai du kaba ni myit yu mu.
Post a Comment