(1) Lawt pru mungmasa ngu ai hpe chye na lu na matu gaw, myen asuya a yaw shada ai masing hpe shawng tau hkrau mu mada kau ya ai gaw ahkyak dik rai nga ai. Dai shaloi she Annau ni galaw sa ra ai bungli hpe jawm myit yu ladat shaw nna lawt pru lam mungmasa hpe chye na lu na re. Lachyum gaw hpyen wa a ra rawng gawngkya ai lam hpe shawng chye kau ya ra nga ai. Bai langai mi ahkyak ai gaw hpyen wa a ra rawng gawngkya ai hpe chye ya lu ai hte sha nngut ai, tinang hta ra rawng gawngkya ai lam hpe tinang nan mung chye tawn chyalu rai ra nga ai. Bai langai mi gaw hpyen wa a dawn jan ai lam hpe mung chye ya let ladat shaw mat wa ra nga ai. Bai langai mi annau ni hkumtingdek chye na hkamla ra ai gaw, Annau ni myen amyu ni daram masha jahpan nlaw tim myen amyu ni hta grau dawnjan ai lam ni grai nga ai. Ndai hpe chye jailang na gaw Annau ni hta ahkyak dik htum rai nga ai.
(2) Lawt pru mungmasa ngu ai hta mungkan( UN ) hte mungdan kaba langai ngai a madi shadaw ai lam mung ra nga ai. Gashadawn American hte England rai yang gaw Annau ni a matu htap htuk dik rai nga ai. Lachyum gaw, Amyu hte Mungdan langai mi lawt pru na lam manghkang hta TARA SHAWN hte TARA HKAM shanlahkawng hkrai hparan nna nngut mai nga ai. Tsun mayu ai gaw myen asuya hte Annau ni hkrai hparan nna nmai ngut na re. Hpa majaw nga yang myen asuya gaw shut ai wa ( Tara hkam ) raitim n-gun grau kaba ai wa rai nna, Annau ni gaw tengman ai lam hta tsap ai wa (Tara shawn) raitim n-gun grau kaji ai wa rai nga ga ai. Dai majaw myen asuya hte Annau ni a lapran hta byin taw nga ai manghkang hpe tengman ai hku hparan la lu na matu gaw mungkan UN hte mungdan kaba langai ngai a man kaw hparan ai gaw Annau ni a LAWT PRU MUNGMASA CHYINGHKA nan rai nga ai.
(3) Ndai LAWT PRU MUNGMASA CHYINGHKA kaw du lu na matu n-gup aga hte sha tsun shaga tangshawn taw nga yang tsep kawp du lu na masa nnga ai. Hpa majaw nga yang myen amyu ni gaw shinggyim masha myit ai hku nmyit ai ni rai ma ai. La ma mi myen amyu ni shinggyim masha myit ai hku myit ai rai yang 1960 jan ning hta Annau ni Awmdawm ahkaw ahkang lu ngut sana re. Dai majaw daini Annau ni GA MUNG SHAGA HKA LI MUNG ASHAP ra sai. Tsun mayu ai gaw mungmasa ga mung ding yang shaga let sinat lashawng gang ai lam mung tsep kawp nmai shayawm ai. Lachyum gaw Annau ni myen asuya hpe htim gasat nna dang lu na daram n-gun nkaba ga ai raitim gap gasat jahkring myit hkrum ta masat hpe tsep kawp nmai htu ai.
(4) Myu hte mungdan shanglawt lu na hkrunlam hta, n-gun kaji kaba hte hpa nseng ai. Ahkyak ai gaw nganggrin ai myit akri hte tengman ai majan hta gwi gwi daw dan shakut mat wa na sha ahkyak madung rai nga ai. Mungkan Wunpawng hpung (UN) ngu ai gaw tengman ai majan hta ja ja tsap nga lu ai ni a AWNG PADANG DIP LA LU AI SHARA (Rapdaw) she re. Shing nrai, Tara nlang ai ni, dip lu dip sha ai ni, Amyu shamyit majan hpaw ai ni, Shinggyim ahkaw ahkang tawt lai ai ni, Hpyen gumshem asuya ni, yawng ma hkra hkrat sum ai shara mung re.
(5) Annau ni myen asuya a ntsa e du krung kaw lung dung taw nga sai ten re. Du krung kaw dung nna UN rung shawng de gang shading gang shading di woi mat wa na sha rai sai. Ndai gaw myen asuya ni Annau ni hta grau n-gun kaba tim mungmasa lam yan hta gaw hkrat sum ninghpang nan rai nga sai. Myen mungdan kata kaw laknak lang rawt malan ai uhpung ni yawng ma hkra hte gap hkat jahkring lu tim Annau ni hte nmai jahkring lu ai lam gaw mungkan wunpawng hpung (UN) hte American kawn san jep mayu wa ai ga-san kaba langai mi rai taw nga sai.
(a) Hpyen asuya hte pyi gap gasat jahkring tawn ai KIO/KIA hpe hpa majaw, mungmasha asuya re nga ai ni bai htim gasat wa ai i?.
(b) KIO/KIA kawn hpyi shawn ai , mungdan ting kalangta tara shang ai gap gasat jahkring lam hpe hpa majaw nhkap la ai i?. hpa majaw tara shang ndau shabra n-gwi ai i?.
(c) Jarit sin (BGF) hpe nhkap la ai majaw htim gasat ai re nga yang, Ya ten hta gap gasat jahkring tawn sai ni yawng gaw BGF hpe hkap la na nga ma ai i?
(d) Gumsan magam Thein Sein wa kawn KIO/KIA hpe nhtim gasat na matu ngu ai shiga hpe mungmasha shiga hku sha na shangun nna, shi a lata masat lawm ai sakse laika hpe hpa majaw KIO/KIA ni hpang de tara shang n-ap ya lu ai i?. (Ndai gaw nshawp nkap ai hte myit magyi magaw rawng ai gumsan magam re lam grai dandawng nga ai.)
(e) Pang lung gasadi hte maren lu la ging ai Awmdawm ahkaw ahkang hpe hpyi shawn taw nga ai KIO/KIA gaw shut ai i? Shing nrai mara lu ai i?.
(f) Pang lung ga sadi a majaw byin pru wa ai mungmasa manghkang hpe mungmasa hte nkam hparan ai gumshem asuya hpe asuya kaja ngu na i?.
(6) Daini Annau ni hpe lata tut lam woi awn nga ai Wunpawng Mungdan Shanglawt Asuya KIO/KIA gaw ra lata poi shang shingjawng lawm na matu hpaw da ai Party Uhpung nre. Annau ni lu nan lu ra ai Awmdawm ahkaw ahkang hpe lu hkra woi awn nga ai laknak lang rawt malan ai mungmasa hpung re. Laknak lang nan lang ra ai majaw lang ai re. Myen hte gaw Laknak nlang ra ai ladat hte nan nmai ai majaw re. Democracy nga tim myen amyu ni woi awn ai kata kaw nga ra ai democracy hpe gaw tsep kawp nra sharawng ga ai. Annau ni a myu hte Annau ni a mungdan hpe Annau ni nan dawdan hparan la lu ai awmdawm ahkaw ahkang hte gawgap la ai Democracy gaw Annau ni a LAWT PRU MUNGMASA CHYINGHKA nan rai nga ai law.
Sau Nan Du
31/07/2012
1 comments:
Laika ka ai myit su wa hpe madi shadaw dat n-ngai law. Hpyen n-gun n-kaba ai nga na awng dawm shanglawt lu na n-mai byin ai nga nna tsep kawp myit n-mai shayawm ai. Lu gying ai hpe gaw lu na chyalu re, lama wa sagu hpawng kata kaw na chyahkyawn ni dingbai dingna n-jaw ai rai yang gaw awng dawm shanglawt mungdan lu na lam gaw anhte a lata hta rai nga ai. KIO/A kata hta kaichyan shalaw na mung ahkyak rai sai....tingyeng myit rawng ai, wunpawng hpyi hpun nna wunpawng mungdan hpe dut sa nga ai hte dut sha hkyen taw ai ni yawng hpe htawng bang da ra ai. Dai jawn re ai ni hpe dai hku sha da yang dan re ai ni grau grau law wa na re.
Post a Comment