Slideshow Image 2

MYIT NUMSHE HKUM SHANG

Kahkin gumdin lam hpe shareng ra ai ngu ai majaw teng byin nga ai lam ni hpe n tsun ai, n htai lai nna n gup pat let nga nga n ngai, KIO hpe kam mu, KIO gaw J.W sha ni hpe woi shalawt na re nga ya sha ya sha tsun nga ai, ya hte na n dau laika raitim kaga Jinghpaw laknak hpung ni KIO/KIA de shang wa na matu sharawng ai majaw awmdawm a matu shakut sa wa ai hkrun lam hta ngu ga yan shakap dat ma ai. KNO a UKA hpe mung dawm nna KIA langai sha di sai ngu mung n dau dat ma ai. Anhte mung shawa ni mung la nga ga ai, galoi wa awmdawm shanglawt pandung de sa saga lo ngu n dau wa na kun?.

Raitim kade la nga tim KIO kawn shanglawt n dau nna rawt woi galaw wa ai lam mung n nga ai, myen hte pawng hkyen ai zawn zawn rai nna myen hte chyu jahta a ten na garawt nga sai, federal ngu ai gabaw n pu e sha lagat nga sai.

Anhte a gawngkya ai lam hpe n tsun na ngu tim, J.W sha ni langai hpang langai myen i shaw sha kau ya, garawt sha kau ya di ai hpe mu myit machyi wa jang, KIO hpa galaw nga ai kun? ngu san mayu wa ai, hpa majaw KIO tsun ga ai shanhte hpe kam myit KIO woi shalawt na re da. Ya yu yang KBC she woi galaw nga ai, awmdawm a matu akyu hpyi ai mung KBC rai taw ai, makam a kanu kawa ni she woi share nga ai, ya yang byin nga ai Lahtaw Brang Shawng a lam hta mung KBC she kanu kawa tai nna Brang Shawng hpe shalawt na shakut nga ai.

Myen hpyendap hte Yuzana Company ni Hugawng Danai pa mayan lam na wunpawng sha ni a yi sun hkauna ni hpe zing magawn la mat wa yang KIO ni gahkaw mi n shaga ya ai, Mali N Mai Zup hta Hkadim gap hpang wa yang KIO ni ninghkap ai lam gahkaw mi n shakra ai. Sam Mung Sisa Pa hta KIA hpyenla ni hpe Myen hpyenla ni kawn majoi sat sharu kau yang Ningbaw Kaba Lamung Tai a rawtmalan mungga hta mung shawa ni myit hkum kahtet mi nga ai sha lawm wa ai, gara hku ahkyak la na re ngu ai lam n lawm nga ai. KIA du jawng hta tim awmdawm shanglawt ngu ai mungmasa policy hpe n sharin ai nga na lu ai. N dai gaw hpabaw lachyum i?

Lawu tsang na hpyendu hpyenma ni jam jau tim Ningbaw n kau ni a akyu a ra hpe a hpum let 1994 ning a simsa lam hpe n hten hkra hkang zing tik tik rai nga sai. Raitim jahtum e Ningbaw ni a shimlam hpe ahtu hkra shangun mai ai, n dai Border Guard Force ngu ai proposal hpe hkapla na Myen dap ni hpyi shadut bang wa ai hte KIO ningbaw salang ni myi tu wa sai, hpa majaw n dai BGF gaw KIO Du kaba ni hpe wushoi shoi nna sat wa na rai nga sai gaw, dai majaw shanhte a asak hpe hkra na rai wa jang she Myen hpyen wa a BGF hpe n dai anhte n hkapla lu ai ngu ningdang wa ma ai.

De hpang gaw Du Kaba Gunhtang Gam Shawng zawn re ai myu hpe kaja tsawra ai du kaba ni a majaw anhte myen hpe ja ja ninghkap ai lam ni byin wa sai, dai majaw ya yang byin nga ai majan hpe bai baw dat lu nna KIO/KIA a stand hpe kaji mi bai shangang wa sai.  

Ratitim dai ni na Ramma ni, Kanu tai nga n ngai Kawa tai nga n ngai ngu ai ni hpe chyu sha kam nga n mai na sai, mungkan hta kanu myitsu kawa myit grai law nga ai zawn kanu myit n su kawa myti n su mung grai law nga ai. Ningbaw Kaba Zawnghkra hpe du wa Bawm Wang La Raw awmdawm shanglawt de woi sa mi ngu san jahkrup ai shaloi, Ningbaw Kaba tsun ai tinang ra ai hkrai tsun ai hpan n re nga bai htai nga ai, n dai a lachyum gaw myen hte pawng ra ai, federal gaw gap ra ai ngu lachyum gale nga ai.

N dai ram sat zingri ai, hpyalu hpyasha taw nga ai myen hpyen wa hpe myidi nna jinghku tai mayu ai gaw kaning re ai super myit masin rai kun n chye na sai.

Dai ni na ramma ni mungkan ting na ramma ni, KIO/KIA kata na myit su ai Du kaba ni, hpyendu hpyenla ni hte lata gindun let n dai myen dap ni i zingri ai, sat nat ai kata na lawt lu na matu ti-nang nga ai shara kawn htim kasat mat ra sai, jinghpaw mung ting na myen hpyenla ni hpe kasat gawt shale kau nna awmdawm ai shanglawt mungdan hpe gaw gap la ra sai, n rai yang anhte ni hpe langai hpang langai gabaw amyu myu shatu mara tam let sat shama kau na, shagri shabreb kau na ra ai, anhte myen hpe ap n nga gwi hkra galaw kau na mara ai.

Anhte KIA du kaba ni gaw myen bawng lu rim jang samyit n chyan pi n achyaw hkra hkra di, raitim myen hpyenla ni KIA hpyenla hte mungshawa ni hpe lu rim jang, masha zawn pi n rai hkra zingri adup agrawp kau, shagri breb mat hkra zingri kau nga sai. N dai lam ni gaw anhte J.W Myu sha ni hpe awmdawm shalawt la na matu shadut nga sai kumla ni rai nga ai, Democratic Republic of Kachinland hpe gawgap na shadut taw nga sai.

Ramma ni ramma ni, marai langai ngai uhpung langai ngai hpe sha kam nga n mai sai, awmdawm shanglawt n dau nna n gun rawng ai ni yawng myen hyendap hpe kasat gawt shale kau sa ga, wunpawng sha ni a pandung gaw awmdawm shalawt rai jang, ya ga garan nga ai, jinghpaw laknak lang hpung ni yawng langai sha bai pawng zum wa na ra ai, kadai mung san san jut mi kaw sha matsut nga na nrai sai ngu kam ai. Ya dai ni laknak hpai nga ai ni ung ang nga ai gaw J.W sha ni yawng myit hkrum ai pandung langai hpe n gran ya lu ai majaw, shada she gaphkat ra na zawn zawn byin nga ai re.

N dai awmdawm shanglawt ngu ai gabaw e n kam hkan ai ni gaw J.W mungmasa labau hta ngam kau da hkrum na ni rai sai, hpa majaw n dai hku tsun ai i? kaji ai ni mung, dingla ni mung, hpung up hpung sara ni, amyu shayi ni, KIA hpyenla ni, ramma ni yawng gaw awmdawm shanglawt la na sha tsun nga sai gaw.  

Shinggyim masha hku sawn yang anhte wunpawng sha ni gaw wan mi grupyin sha nga ai, n dai n gun hte wan sumshi jan nga ai myen ni hpe n dang na re, raitim awmdawm shanglawt jaw na gaw Karai Kasang sha re, anhte chyawm gaw karai hpe n ninghkap ai sha tatut galaw sa na sha ra nga sai, shi jaw nan jaw na ra ai, kam u, ya du hkra anhte n lu ai gaw mungshawa ni sa mayu ai gaw kaga, KIO ningbaw ni woi sa ai gaw kaga rai taw ai majaw rai nga ai.

Galati 5: 1, anthe shanglawt tai na matu Hkristu gaw anhte hpe shalawt dat mi ai: dai re ai majaw a grin nga nna, dai mayam a kandang npu e bai hkum a hkang nga myit.

Nhpaw Mung Ban

8 comments:

Jatawng Naw said...

Umm.. bau dum bau waw ga tsun yang ga law she re law. Myit mada ai bandung nbung, myitsawn yu myitmangai lam ni nbung wa yang gaw hka wa bra wa ai baw re. Shing gim masha yawng gaw lam sha gu hta, shadawn sharam ai ngu nga mali ai law. Shaning (50) ning jan namrawng hkriba apnawng let shanglawt lu na matu shakut yu sa ga ai. Shata 13 ting, hpyen hprawng hkawm , jam jau hkawm kau sa ga ai. Hpawt ni na ninghtoi ni hta lu wa na mahtai gaw hpabaw rai ta? Anhte Pawngyawng sha ni hpa hpe myit mada ra na ga ta??
Kanu / kawa shara kaw tsap ai ningbaw kaba ni, du kaba/slg kaba ni, sara/num ni lawan mahtai jaw la marit law.
Ngai gaw bumlang de mada yu na n ngai, ngai hpe garum na wa gaw kanang na pru na a ta??.. Lamu hte aga hpe hpan tawn da ai wa Yehowa kaw na ngai hpe garum ai lam pru wa ai.
Anhte Shapawngyaw myu ni kam hpa na gaw Karai Kasang Yehowa, Wa sha rai nga ai law.

HKrunlam Brang said...

Yawng ra ai myit mada ai hte hkam la ai lam gaw ndai laika ka ai wa hku sha rai nga ai. Raitim kaja wa Ahte awm dawm ai, anhte mundan ga garan pru sana ngu ndau dat yang anhte hpe kadai madi shadaw na ? ndai ni hpe mundan jaw ging ai nga madi shadaw na nlaw htum mungdan masum a madi shadaw (recommendation) ra ai, kadai mungdan ni anhte hpe madi shadaw na ? American i? Miwa i ? gala i? jinghpaw ni hpe mungdan jaw ging ai nga tsun na kadai nga na rai? Gashadaawn, Israel ni ga pru wa na shaloi American ni ndai ni hpe jaw ging ai nga tsun ai hpe kaga mungdan ni mung madi shadaw ai lawm ai. Dai ni anhte dai zawn ndau dat yang anhte hpe kadai madi shadaw na? Ndai mung naw myit yu mai ai lam langai rai na re ngu mu ai, shang lawt ni mung ya majan she byin tim majan a matu kaja wa lu hkyen dat ai laning mi jan sha re dai hte ndai ram ting hkam jan taw nga ma ai, 2009 ningram du hkra gaw KIA/O mung lau ban wuhpung zawn zawn, hpun lawk kashun hkat, ja maw kashun hkat rai, Ting Ying ni, hkun myat ni ni hte hpa nshai ai zawn nga ai wuhpung she re, hpamajaw??? kaja wa dai ni na masa (context), hpe nlu hkan nang ai ningbaw ni decision maker kaw nga taw ai majaw re. Raitim dai ni na context, media hpe lu jum ai ningbaw ni decision maker ni ramdaw lu woi shakut nga masai shanhte ma myit nga ma ai, shakut nga ma ai, aten loi jaw nna kyu hpyi let naw da ting nga ga. Gap nna sha mung nngut ai, lam magup sumhpa hku nna hkyen lajang ra ai lam mung galaw ga, sut masa lam, mungasa lam hte kaga uphkang hparan hpaji ni hte seng ai hku nna maga mi de hkyen nna hka ja sharin nga ga.

Larin said...

Laika ka ai wa hpe madi shadaw n-gun jaw mayu n-ngai. Awnmdawm shanglawt mungdan ra ai lam n-dau dat ai hte rau gasat nga dingyang rai yang she byin nga ai masa shai na ra ai. woi awn nga ai ningbaw ningla ni hpe wunpawng sha ni yawng ra sharawng ai hte myit mada nga ai lam shadum let support galaw nga na ten re. Myen hte pawng nna gara hku tim simsa lam hpe sha madung dat nga yang Kachin ni hpe shanglawt mungdan jaw ra ai jaw gying ai nga na gara mungdan mung shawng e tsap shaga ya na n-re. Dai zawn kaga mungdan ni Kachin ni a gawng malai tai ya nna kadai kaw mung hpyi shawn na mung n-re. KIO/KIA ma rai rai, hpung sara ni ma rai rai, kaga du salang ni ma rai rai, wunpawng sai lawm ai ni yawng gaw tinang a matu hpawtni na lam sha myit ai n-rai nna daini jamjau hkrum taw ai mung shawa masha ni a prat hpe yu ra ai. Daini ning re jamjau hkrum sha ai, roi rip hkrum sha ai....daina malai kanu kawa tai na woi awn nga ai ni hpa jaw lu na ta? Dai dram rai nna byin mat ai hpang myen hte bai myit hkrum pawng na hku myit nga ai rai yang kadai wa myit pyaw na ta? Kachin ni yawng KIO/A hpe madi shadaw kashu kabrawng wa yang myen asuya dai ni yawng hpe gap shakrip kau na i? Dai hpe hkrit nna hpa n-seng ai zawn nga ai ni dani myen a zingri n-hkrum sha ai kun? Mayam tai taw na matu galoi n-myit saga.....myu hte mungdan a matu si hkam ra sai. Kaja wa dan nga myit hte ap nawng ai ramma sahyi shadang ni, du salang ni rawt wa jang masa shai wa na re...masa shai wa ai shani "Political dialogue" na matu lam hpaw wa na re....dai byin ai shani federal system kun, awngdawm sahnlawt mungdan kun daw dan na ten rai na re. Myen mungdan kata hta sha ya hkrum ya hkrum re mung masa lam bawngban ai nga na tinang a myi man shagrit shaywm la ai lam hta mung KIO koi ra yen ra sai. Laknak n-gun hte hpyen n-gun shagrau na lam hta madung dat na ten re..... Myit hkrum yang awng dang na gaw chyalu.

Anonymous said...

Myen amyu ni gaw shinggyim masha myit ai hku nmyit ai re majaw awmdawm de sa ai hkrunlam hta federel de sa ai hkrunlam gaw grau hkyemsa na kun? Ngu nna tsun na lam nnga ai.Lam lapran kaw jamjau ai gaw maren sha re.Dai rai yang gara de madaw sa na?

Larin said...

your point is to be noted Mr. Anonymous. N-dai lam woi awn taw nga ai ningbaw ningla, kanu kawa ni chye na ya ra ai i....

la la shadau said...

anhte byin ma yu ai hpe ngup ga hte tsun na tatut ga law sa wa ra ai.ndau sha na ai lam nnga yang mungkan mungdan hkum tsun anhte jw mungdan na laga myu bawsang ni pi chye na nre.hkrit nga yang gaw myu mat na lam sha nga sai.aka law...hkum ma chyi ai hta myit ma chyi ai grau ndang hkam mat sai law.

Dan BW said...

Laika ka ai wa a ningmu hpe grai madi shadaw ai. Hkrun Lam Brang tsun ai mung grai myit yu hpa rai nga ai. Rai tim masha kaga wa njaw na re ngu nna tinang a mungdan hpe nhpyi sa na kun? Labau hpe myit yu ga, Awmdawm Shanglawt Mungdan ngu ai Bandung kaw na MSL (Myanma Socialist Party) single party system Asuya hpe mung hkap la nna bawngban yu sai. Dai hpang hpyen Asuya hpe mung madi shadaw nna bawngban yu sai. J.W sha ni a akyu ara ahkaw ahkang langai mi pyi nlawm ai 2008 constitution hpe mung Dr. Tuja nan sa madi shadaw lawm ya sai. Dai hpang anhte hpe gyit hkang da ai constitution kata hta ra lata poi shang lawm na mung maw lanyan yu sai. Hpang jahtum Dr. Tuja nan gaya nsu Hkanghkyi party de shang na matu mung hpyi shawn yu sai. Anhte KIO/KIA hku nna gaw tinang a shari sadang yawng hpe jahkrat let Myan hpyen wa ra ai lam yawng ngu na daram hkan nang yu sa ga ai. Rai tim anhte lu wa ai mahtai gaw hpa baw ta?
Simsa lam la ai ten hta mung tinang a hpyen ma ni hpe majoi rim adup sat kau ya tim makawp maga lu ai lam hpa nnga. Amyu sha ni jam jau nga ai ten hta Du salang ningbaw ningla nkau mi gaw Myo ga de dum nta jahkrik bang wa, Myen hpyen du ni rau golf sha gayat rai pyaw len ai ten ni mung nga lai wa sa ga ai.
Ya hpang jahtum gaw hpyen yen tsinyam masha 80,000 de du wa ai akyu sha lu, tinang a amyu sha ni hkrup mara roi rip, zingri ai kaw she kye wa nga ai.
Hkrun Lam Brang tsun ai zawn gap hkat nna sha mung nmai nga ai. Lam amyu myu hku shajin ra nga ga ai. Rai tim njin shi ai majaw nla shi ga nga yang mung nmai na re. Kadai mung yawng shajin da nna she mungdan la ai nrai ma ai. Shajin lu ai daram shajin da ra ai lam gaw teng nga ai. Myit yu ra ai lam gaw shajin na matu ahkaw ahkang pyi nnga nga yang gaw dai jin ai hpe naw lat taw na kun?
Bawngban ai mung lagaw she kadun, gumbawp she gama, hpyi hpyi yu ai mung hti pyi ndang rai na sai. Tinang hpang maga shayawm ra mat ai chyu, shanhte maga na jaw ya ai gaw hpa nnga (ningbaw nkau mi hpe hpaga ga na ahkang hta lai nna). Dai re majaw ya ten hta KIO/KIA hku nna woi awn let kaga laknak lang ai amyu sha baw sang ni hpe mung tsawra myit madun shara jaw let woi zinlum nna Shanglawt Mungdan ndau nna woi gasat ra sai. Hpa majaw nga yang Mungdan ndau di la na rai tim gasat ra, rau jawm nga na matu rai tim gasat ra rai nga ai majaw Awmdawm Shanglawt Mungdan ndau nna gasat yang gaw grau n'gun lu na rai nga ga ai. KIO/KIA hku nna majan mung gasat ra, amyu sha tsinyam masha ni hpe mung yu laku ra re ai majaw yak hkak ai lam ni grai nga na re. Aten law law ya na zawn sha galaw lu na mung n loi nga ai. Dai majaw ya ten gaw amyu sha ni a shawng lam a matu gwi gwi daw dan ra sa ga ai. Rau naw nga nna Myen hpyen wa a shingna katsing naw mana sha na lam hta gaw ntsap sa ga!

U MA BUM said...

UM..GA GARAN SAI AWM DAWM W.P MUNG DAN NGU N DAU DAT YANG GAW SAM,MON,KAREN,KARENI,CHIN....RAWT MALAN HPUNG NI HTE MUNG SHAWA YAWNG GAW NA SHE JAWNG,GAJAWNG RAWT WA NA RE...MYEN SAWA MYU NI YAWNG AGRU HKRAP WA.MAU SI MA NA RE LU....AN HTE A AWNG PADANG YEHOWA KARAI KASANG MUNG MUNG KAN MUNG DAN KABA NI HPE KACHIN LAND A MATU SHADUT WA NA RE LU..HPYEN N GUN,LAK NAK N GUN,JA GUM HPRAW N GUN NI YAWNG MUNG KARAI KASANG LAJANG YA WA NA RE LU.AN HTE W.P MYU SHA NI KABAI KAU RA NA LAM LANGAI GAW TSANG AI MYIT(HKRIT MYIT).DAI HPE AWNG DANG YANG AN HTE A AWNG PADANG YEHOWA KARAI KASANG HTE RAU AN HTE W.P MYU SHA NI AWM DAWM W.P MUNG DAN DE DU SAI....

Post a Comment