Slideshow Image 2

NGANG GRIN NA SIMSA LAM DE

Daini annau ni gaw ngang grin ai simsa lam a jet hpe she ra sharawng mat sai. Bai hten mat na simsa lam hpe gaw tsep kawp nra mat sai. Shagri pyi madawn na daram myit masin machyi mat sai. Dai rai yang ngang grin ai simsa lam a jet lu na matu gaw jet ai mung masha asuya hte sha mung masa mai jahta na re ngu mu mada ai. Ndai ten hta hkrum jahta tim ngang grin ai simsa lam ajet gaw lu mai na masa nnga ai. Hpa majaw nga yang...

(1) Ya woi awn taw nga ai asuya gaw mung masha hpyi dagraw tawn ai hpyen dap na ningbaw ni hkrai ahkyak ai shara shagu jum tek tawn ai re majaw ntsa lam yu yang she mung masha zawn rai tim ta tut galaw sa wa ai lam ni gaw grai shai nga ai. Ga shadawn gap gasat jahkring myit hkrum ta masat htu tawn sai RCSS/SSA, SSPP/SSA, KNPP, KNU ni hpe hpa majaw bai htim gap wa ai. Ndai mabyin ni gaw lata lai lagaw lai nna byin ai nre da sang nan htim gap ai re. Ga shadawn tsun ga nga yang langu hpun kaw gaw sanghpaw si nmai si ai zawn, a-si hpe yu nna hpa baw hpun re ngu ai hpe mai chye ginghka la mai nga ai.

(2) 2008 ning hta shanhte hpyen asuya ni ra ai hku ka lajang tawn ai mungdan npawt nhpang gaw gap tara (Constitution) a kata kaw she bawngban jahkrup yang gaw annau ni a pandung shadaw rai nga ai ngang grin ai simsa lam ajet hpe tsep kawp nmai lu ai, Hpa majaw nga yang ndai Constitution gaw aten nlata ai mungdan a daru magam ahkaw ahkang hpe hpyendap kawn bai mai jum tek la mat wa nga ai. Dai hta n-ga ndai Constitution hta grai nhtan shai ai langai mi gaw, myen mungdan kata kaw laknak lang ai hpyen dap langai sha nga ra ai ngu ai ndai gaw annau ni tsep kawp nmai hkap la ai manghkang kaba rai nga ai.

(3) Annau ni ra sharawng ai simsa lam a jet hte myen asuya ni yaw shada ai simsa lam gaw grai shai hkat nga ai. Hpa majaw nga yang myen asuya ni annau ni a ntsa e yaw shada ai simsa lam gaw gap gasat shawng jahkring nna gau ngwi ngwi laknak dawm mat wa shangun na masing rai nga malu ai. Dai hpang ra lata poi shang lawm na matu parti hpung hpaw shangun masing rai nga ai. Annau ni ra sharawng ai gaw, Annau ni a mungdan hpe mung masa, sut masa, hpyen masa, htunghking laili laika masa, makam masham masa, mahkra hpe annau ni a shaman chyeju hte annau ni dawdan la lu ai awmdawm ahkaw ahkang rai nga ai.

Dai majaw ngai hku nna mu mada ai gaw 2015 ra lata poi ngut ai hpang jet ai mung masha asuya byin pru wa jang she mung masa a majaw byin pru wa ai mung masa manghkang hpe mung masa hte mai hparan la mat wa na re ngu mu mada nngai. Hpa majaw nga yang 2015 ning ra lata poi hta gaw, ya na hpyen asuya rai nga ai chyant hkaing hpunt hpyu ye parti gaw tengtup hkrat sum mat chyalu re ngu ngai hku nna tsa htam tup tsun lu ai. 2015 ning gaw myen hpyen asuya a jan shang mat na shaning re. Gara parti mi lung lung dai shaloi gaw mung masa ga mai shaga na re. Shut ai lam nga yang shading sharai la hkat ga.

Sau Nan Du
05/07/2012

0 comments:

Post a Comment