SHAJA DA RAI AI

Dai majaw Democracy hpewoi-awn galaw nga ai myen ningbaw ni a role gaw rawt she rawt mat sai, maigan mungdan ni mung amyu bawsang ni hpyi nga ai mung democracy sha rai nga ma ai ngu shadu nna democracy woi hpyi ai myen ningbaw ni hpe jahtum jalai du hkra garum madi shadaw nga ma sai.

Rai yang myen mungdan democracy de gale bang wa magang nga sai ngu masha yawng tsu nga ru nga ai ten hta anhte bawsang ni hkrai kri kri rai ngam nga saga ai.

Ya daini anhte bawsang ni a rawt malan gaw mung masa hta mung sum, hpyen masa hta mung sum re ai kum la pru nga sai.

Myenni a mung masa shamu shamawt ai lam ma hkra gaw n dai policy ni hta madung mahta nga ai: Myen Ga Langai Sha Lang Na, Myen Laika Langai Sha Lang Na,  Buddha Makam Langai Sha Lang Na, Myen Amyu Ni Sha Up Ai Mungdan Gawgap Na, dai majaw myen ningbaw ni gaw 1947 ning hta gin shapraw ai Panglong ga shaka hpe jahten kau sai, dai majaw Federal Union gaw gap na hpe jahten kau sai, dai majaw Myanmar Unitary State hpe gaw gap sai, dai majaw dawnghkawn langai hpang langai dawm kau nna Shagan langai sha kap ai Dawnghkawn hpe lang nga sai.

N dai policy ni gaw ya sha jahkrat da ai policy ni n rai, moi Myen Jawngma ni English a lata na Shawnglawt la na matu shamu shamawt wa ai kawn hpang da sai policy ni rai nga ai, n dai lam ni hpe Rakyaing n ka ai laika lang ai hta mu hti shachyaw la hkrup ai shaloi, Myen ningbaw langai rai nga ai Takhin Ku Daw Maing ka ai laika hta, Kayin ni hpe kaji pi hkum hkyem sa jaw lani mi Myen ni hpe kaup la na ra ai, Kachin ni hpe hkum hkyemsa jaw Panglai na nga sha na nga ai ni rai ma ai, kaga bawsang ni hpe mung hkum hkyemsa jaw, n dai ni baw n lu sharawt hkra shamyit kau ra ai ngu da nu ai.

Hpa majaw nga yang, English ni up ai ten hta raitim Kachi nhpyenla ni reng nga ma ai, Kayin hpyenla ni reng nga ma ai, Myen, Kachin, Shan, Chin, Rakyaing, Mon, Karenni, Karen ni pawng nna shanglawt la wa ai ten hta raitim Union of Burma ngu ai hta Hpyen Dap a Commader-in-Chief gaw Kayin kasha Samitdon ngu ai wa rai nga ai, e n dai zawn rai reng nga ai hpe mu hkrit nna Myen ni bawsang ni hpe kaup lu ai Mungdan gaw gap yang she shanhte Myen ni asak luhkrung na ngu hkam la ma ai re. Dai majaw anhte Kachin hte bawsang ni hpe shani shana shamyit zingri nga ai rai nga ai.

Dai majaw n dai lawu na recommendation n kau hpe kaja hkrat dat n ngai,

o   Federal lu mayu ai, Democracy lu may uai lam tsep kawp hkum jahta manu,

o   Awmdawm Shanglawt a matu majan shang nna Democratic Republic of Kachinland gaw gap na de jasat sa wa ga

o   Lahta No. 2 hpe shakut sa wa ai ten hta tinang rawt malan hpyen dap kawn mare masha ni hpe roirip ai, num ma ni hpe roirip ai, mungchying mung shawa ni hpe majoi shagyeng shagang galaw ai lam tsep kawp n galaw ga, galaw hkrup mat jang mung shut kau ai hpyenla-du ni hpe gara hku ahkyak la sai ngu ai lam ni hpe English hku nna mungkan ting chyehkra statement ka shapraw ga.

o   Awmdawm Shanglawt a matu shakut ai ten hta “simsa lam a matu” tsep kawp akyu nhpyi ga, Awmdawm Shangalwt lu na matu sha Wunpawng Aha ni yawng Karai kaw akyu hpyi ga.

Nhpaw Mung Ban