Slideshow Image 2

SHINGRAN YU GA

Gada jada nga ai hte maren tsun shaga ai lam yawng hpe manu dan dan myit dik yu nna shaga ra nga ai re, grau nna masha kaba tai ai ni yawng gaw sadi dik ai hte tsun shaga ra ai. Ga lai yang shaw nmai, jum lai yang hka jat naw mai ai nga ai hte maren myu hte mungdan a akyu rawng ai ga ni hpe tsun shaga shapraw  sa ai hta grau nna sadi ra ai.

Myen a simsa dat kasa Salangg ni gaw ga rawng rawng hkawm ai n'gup gaw bawlaw lata gaw lagyaw ngu ai lachyum shapraw ai, la chyau chyau yang gaw sha, num chyau chyau yang gaw hka nga ai hte maren, la ga kalang dat lau ze kalang hkat nga ai lachyum zawn ga hpe grai sadi manu shadan nna shaga ra ai. Lani jan hta sha pyi simsa lam uhpung law law hte 6 lang bawngban ai ngu gaw lang shalaw nna namnak n'nga ai ga  laban tsun hkawm ai hte maren rai nga ai. Kaja sha wa masing jahkrat tawn da nna dawdan galaw ai rai yang kalang mi hte sha mahkrun jaw jaw mahkyen jaw masing jahkrat nna bawngban shangut la mai ai re. Myen gaw bawsang law law hte simsa lam lu la hkra shakut hkawm nga ai gaw tinang galaw ai simsa lam hpe madi shadaw garum na matu ga kaba sawn hkawm ai hte bung nga ai zawn mungkan hpe sumpan hpraw ka laka grang tawn masu nna asan masu nga ai jan n'du ai masu n'dum galaw hkawm nga ai lachyum sha re.

Myen gaw teng simsa lam n'ra ai dat kasa ni hpe maram yu na chye mai ai zawn maga mi de ten garawt nna annau ni hpe masu hkalem nga ai, ten shama ga laban shaga nga ai, bawngban shagu hpyen masa grau shaja wa ai gaw myen a simsa lam n'ra ai kumla re hte myu shamyit masa re ngu asan mu lu nga sai.  Ya hkyak hkyak simsa Slg. Awng Min wa gaw Thai mungdan kaw lani mi hte 6 lang simsa lam bawngban ai ngu gaw masu hkawm nga ai ga laban tsun hkawm nga ai hte maren sha re. Mungdan a la kaba ni teng, la du yang simsa lam ra teng yang ga laban law law tsun n'ra ai lang law law lang bawngban n'ra ai kalang dat anhte bawsang ginra kaw htu tawn ai hpyen dap dawm kau yang bawngban nra simsa lam lu chyalu re hte, teng simsa mayu ai lachyum rai na re. Jinghku kaja htingbu kaja langai hku teng nga mayu yang tsaw ra myit shawng madun ra ai hte simsa ai kumla hpe shawng hkrang shapraw ra ai, la kaba lachyum shapraw ra ai. Simsa lam hta hkra machyi chye ai mabyin mahkyen hpe shawng koi gam kau ra ai hte simsa lam hta hkra machyi chye ai ga manaw tsun shaga lam hte galaw sa wa ai mabyin ni hpe shawng koiyen kau yang she shada da kam hpa hkat nna simsa lam lu ai de shawng de myitmu myit hkut ngwi pyaw ai kumla hpe mu lu na re. Bawngban ai lang shalaw nna ga laban tsun nna moi na mau mwi dingsa hkai dan hkawm nga yang kara hku simsa lam ra ai ngu mai sawn na ta? Myen galaw shapraw nga ai sinat mahku sha a ngoi nga dingsa  simsa lam hte naw tsan gan ra na sha re.

Ya hkyak hkyak Hpunau Rawang ni hpe uhpung ga garan hkra galaw ai gaw simsa lam teng n'ra ai kumla nan rai nga ai. Munghpawm shadang ta masat htu tawn lu sai RCSS/SSA-PPSS/SSA ni hte hpa rai gasat hkat ra ai kun? N'htang myit yu ra ai. Shaning 60 ning hkawt  rawt malan gasat wa ai lachyum hpe kara mahtai shapraw la na kun? Mungkan hta dinghku majan galu dik ai mungdan langai hku hpa majaw naw tsap ra nga ai kun? Laknak lang nna rawt malan ai u hpung law dik ai mungdan langai hpa majaw tai nga ra ai kun? Shaning 60 ning jan ga laban tsun nna masha n'sawn ai hku nga lai wa ai, masu hkalem wa ai myen hpe hpa hpe madi shatai nna kam mai na ta? Shingna mu shingnyip yu nna pyi myen a kata lam hpe asan mu mai sai re.

1-Mungkan hpe simsa lam tara shang n'dau na hkrit ai.
2-Mungkan de kasu kabrawng hpung ngu nna n'dau shaprai kau na hkrit nga ai.
3-Mungkan de Panglung ga sadi hpe manu shadan nna mahta galaw sa wa na hpe hkrit nga ai.
4-Mungkan de munghpawm mungdan langai hku shapoi n'dau na hkrit nga ai.
5-Mungkan de hpyen majan hpe jahkring lam n'dau na hkrit nga ai.
N'dai zawn re masa kaba mu nga ai kaw myen hte hpa baw gabaw dat nna bawngban na ta?

2008 gawda ai hpe grai kalai ai kaw bawngban yang gaw shaning galu rawt malan ai arang kaba hpe lani jan hte kabai kau ai hte bung na re. Shada mahku mara hkungga lara lam n'nga ai kaw bawngban ai gaw myen a kata de myen a lahpran de magyi 2 a lahpran de du baw htu bang sa ai hte she bung na re. Ndai ram du, dating gasat wa saga ai matut gasat tik tik sha mai sai. N'dai ram lang bawngban wa yu saga ai, masa n'kalai shai ai kaw kara hku mung bawngban jahkrup n'mai sai. Lapran Salang ni hte jang htinglet jahkrup nna mahtai tam mung masa hpyen masa num shawn shaw yang  she kaja na sai.

Baren Numraw
30/6/2012

2 comments:

Dan BW said...

Jaw dik, hkra dik ai ga ngau, ga si ni nan rai sai.

Dan BW said...

Jaw dik, hkra dik ai ga ngau, ga si ni nan rai sai.

Post a Comment