THEIN SEIN ASUYA A YAW SHADA AI MASING KABA (3)

Thein Sein asuya hku nna mu mada ai myen mungdan kata kaw na manghkang kaba ni gaw.....

(1) Matsan chyaren mat wa ai shanhte myen amyu ni a sut masa gaw sharawt ya na matu.....

(2) Myen mungdan hpe shanhte myen amyu ni uphkang ai democracy (myanmar democracy) mungdan gawgap na matu...

(3) Laknak lang rawt malan ai ni yawng a laknak yawng dawm kau ya lu na matu....

(1) Ndai lahta na masing (3) gaw Thein Sein asuya a yaw shada ai pandung shadaw rai nga malu ai. Ndai manghkang (3) hpe hparan lu na matu nambat 1 ahkyak dik gaw, shanhte myen amyu masha ni a sut masa shawng gaw sharawt ya ra nga ai. Lachyum gaw laga amyu bawsang ni a ntsa e mungmasa/ sutmasa/ hpyen masa hte dang lu na matu masha jahpan grau law ai shanhte shada da gahkyin gumdin ai lam shawng lu hkra shakut ai hku rai nga ai. Hpyendap laknak hte uphkang yang laga amyu bawsang ni hpe dip sha lu tim shanhte shada da ga bra ayai taw nga ai gaw hkrat sum kaba nan rai taw nga malu ai. Hpa majaw nga yang shanhte a kata kaw sut masa a majaw kasu kabrawng, nru nra rai taw nga yang gaw laga amyu bawsang ni hpe amyu shamyit ai hkrun lam hta lagaw gang dingbai ding-na jaw ai manghkang kaba langai mi rai nga malu ai. Lai wa sai 2011 ning a shawng maga de byin lai mat wa ai ninghkap n-gun madun manghkang kaji kaba yawng ma hkra gaw shanhte myen amyu ni hkrai re lam hpe mung U Thein Sein chye chyalu rai nga lu ai. Ndai nambat 1 manghkang hpe hparan lu na matu gaw mungkan kawn sut masa chyinghka hpaw dat ya ra ai gaw ahkyak dik rai nga malu ai. Dai majaw ya ten hta Thein Sein asuya gaw mungkan kawn sut masa chyinghka wanglu wanglang hpaw dat ya na matu gaya pyi nchye hkra hpyi aput taw nga ai ten re. Mungkan kawn sut masa chyinghka wanglu wanglang rai nhpaw ya shi ai laman asak matut la lu na matu gumhpraw lap 10000/-tan mung dip shapraw taw nga ding-yang rai nga masai.

(2) Myen mungdan hpe shanhte myen amyu ni uphkang ai democracy gaw gap na matu hta.....

Mung masha tsawp dagraw tawn ai hpyen asuya a ntsa e mungdan kata mung masha/ laknak lang rawt malan hpung hte mungkan kawn tsep kawp nkam ai mung manghkang kaba langai mi rai nga malu ai. Dai majaw mungdan kata/ shinggan yawng kaw na kam hpa ai lam lu la na matu Aung San Suu kyi hpe lu hkra ladat shaw nna jai lang taw nga sai. Dai hpe Aung San Suu kyi mung chye chyalu nan HKA KATA KAW SHANG TSAP nna nga dawn ai hte bung mat sai. Panau kaw nna pru ai byet panau kata de bai shang mat wa ai hku mung rai nga ai. Ndai gaw Thein Sein asuya a yaw shada ai myanmar democracy masing a matu awng padang ninggam langai mi mung rai nga sai. Dai majaw Thein Sein wa mungdan gumsan magam shara lu ai hte kalang ta lawan ladan Aung San Suu kyi hpang de shawng gagat hkrum ai re. Ndai lam hpe mungdan kata/shinggan media kawn tsun gabrawng pru wa ai shaloi Aung San Suu Kyi bai tsun ai gaw mungdan a matu jai lang hkrum ai hpe arawng la ai nga nna bai tsun htai dat yu sai. Lachyum gaw myen amyu ni uphkang ai democracy masing hta ngai shang tsap lawm na ngu ai lachyum re. Kawa Aung San wa masu da ai hpe kasha Ma Kaw jan bai masu shakre na hku rai nga ai. Thein Sein asuya hku nna mung anhte laknak lang rawt malan hpung ni hpe gang gayin bang la na matu Aung San Suu Kyi hpe bai jailang na hkyen nga ai hpe mung na lu ai. Ndai kaw annau ni chye na ra na gaw, Annau ni gaw democracy hpyi shawn taw nga ai ni nre. Democracy gaw annau ni kaw nga chyalu, lu chyalu ni rai ga ai. Democracy ra sharawng taw nga ai gaw shanhte myen amyu ni she re. Shinggyim ahkaw ahkang tawt lai ai, tara nlang ai mung shanhte myen asuya ni sha re. Annau ni hta ra taw nga ai gaw Awmdawm ahkaw ahkang she re. Annau ni a shaman chyeju hte annau ni a shawnglam hpe dawdan hparan la lu ai Awmdawm ahkaw ahkang she re hpe yawng chyena hkamla ga.

(3) Laknak lang rawt malan ai ni yawng a laknak yawng dawm kau ya lu na matu hta.....

Thein Sein asuya a yaw shada ai masing 3 hta na ndai hpang jahtum nambat 3 gaw yawng hta grau yak dik ai manghkang kaba dik htum rai nga ai. Dai hta n-ga Thein Sein asuya bawnu hkraw nga ai mung ndai rai nga ai.Hpa majaw nga yang annau ni Panglung Ga Sadi a majaw lang wa ai lanak re majaw rai nga ai. Laknak lang ai ni hpe laknak hte gasat shamyit nlu mai ai mung shahte chye chyalu rai sai. Dai majaw 2008 Constitution hta, Myen mungdan kata kaw laknak lang ai hpung langai sha nga ra na hku ka lajang da masai. Ndai gaw tsepkawp nmai byin ai.

Hpa jaw nga yang madu uphkang ai mungdaw/ mungdan hte tinang a hpyen dap gaw hka hte nga hpa rai nga ai. Hka hte Nga hpe laga ga nmai tawn ai zawn tinang a mungdan hpe tinang a hpyendap hte laga ga nmai tawn nga ai. Thein Sein asuya gaw ja gumhpraw sut masa hte shalen nna gau ngwi ngwi laknak dawm mat wa shangun na masing re. Lai wa sai January shata hta KNU ni hte gap gasat jahkring lak mat htu ai shaloi U Aung Min tsun ai, ja gumhpraw hte nga pyaw mat jang kadai mung laknak lang kam sana nre nga nna tsun pru wa ai. Ndai ga gaw Annau ni sadi ra ai ga re. Gumhpraw hte Mungdan, ndai lahkawng hta na langai mi gara hpe madaw lata la na? Gumhpraw hpe lata la ai ni gaw myen amyu a mayam byin mat na, amyu mung mat mat na. Mungdan mung mat mat na. Panglung Ga Sadi a ntsa e Annau ni yawng jawm akyu hpyi nna Awmdawm Shanglawt lu hkra shakut da ting mat wa ga law.

Sau Nan Du

24/07/2012