U LU MAHKA HPUNGUN KU

Moi chyaloi nhkoi prat kaw nna,
Karai hpajang shingra tara;
N shut n shai duhkra ladaw,
Pyaw dik mungdan anhte hpe jaw....


Hka shi hka yawng na dap shagu,
Shu tek shu kawng nsen garu;
Kan bau magam bungli n hprai,
Lanam hkauna shang ten rai sai....


Raitim daini mabyin masa,
Prat a labau shingra maka;
Mara kata anhte hpang de,
Sinat kaba laknak ni hte......


Magam gun hte mungshawa hpe sat,
Nawku jawng hte nta hkan nat;
Shagyeng shama adup zingri,
Hkam sha ra sai n htum n ni......


Yi sun hkauna galaw n lu,
Roi rip hkrum sai anhte amyu;
Hputdi dingnyawm baw gum hkum rai,
Share sai hpe madun ra sai.....


Baw hpraw dingla asum n jaw,
Mungshawa hpyen hpung daini daidaw;
Ninghkan sharun nhtu garang,
Lahpum malu shanhte sumgrang.....


Dinghku lit yawng kanu hpe ap,
Sinda shachyen tai hpyen hpe gap;
Ya ten hpyen yen hpu nau ni hpe,
Yesu tsawra shawang myit hte.....


Lanu lahku nga na shara,
Lu na sha na hpa tsang n ra;
Lakawn lanawn pawn ba la ai,
Mungkan ting hpe madun lu sai...


Rawt malan labau shawng daw ten hta,
Majan rawt yang nat jaw shaja; 
Awng dang ai lam hpa mung n mu,
Shada myit hkrum ai lam n lu........


Tai hpyen wa gaw sinda adup,
Sumprat bang let bawngban jahkrup;
Tara n lang hpyen a ladat,
Modern out sai na myit jasat.....


Kaya hkrum na bai hkum shakut,
Na a hpang lam lau she htingnut;
Chyum mungga hta shat lai jawm lai,
Israela myu hte n shai....


Dip lu dip sha hkrum let nga hkrat,
Amyu kaji anhte a prat; 
Raitim anhte hpa myit hkum tsang,
Hpan da Madu makawp ninggang......


Sakse mu sai daini ta tut,
Chyeju shakawn she hkum dumhprut;
Masu magaw tara n lang,
Nang hpam lusha hta baw hkum bang.....


N jaw lai kyang hpe jawm sharai,
Chyum mungga hte nhtan hkum shai;
Mungdan shadai kadoi la na,
Sawmrawm ninghtoi jan pru mahka.....


Myit mang hkrum let padung shadu,
U lu mahka hpunggun hkum ku;
Shingbyi lunghkrung Madu shi hta,
Ngang ngang kang kang tsap nga saga....


Ulat Hpunggam
21/7/2012