Slideshow Image 2

UHKA KANU SHE TAI MAYU AI UTAWNG KANU NI

Mau sa! Mau sa! Jinghku jingyu ru sai baw pa n taw, mayu dama kahpu kanau lamun latsa law ai hpawmi hpawmang du salang jan ni wa she, tinang amyu nyet, jasam maigan wa a hkalem ga  hta shamyet nna awu asin yuk jahtuk, shu mashi shu masha labau n tsawm mat na, ju majat prat shanat yawng e tsun shatan jahpoi asawng hkrum na lam maw mawn nga ai shiga na lu ai majaw, n chye tsun hkra yawn kaba hte yawn mat saga ai oi!

Nanhte buga daju mare kaba sin let, kring mading rai nga na ni, yawng a kanu kasi rai, kamoi kasi tai na ni, hpa rai wa me Myen wa dangchyang a maw lanyet hta kadawng bang myit ta? Moi na jiwa ni tsun ai "Wan kanu hpunjum, nta kanu dawhpum, masha kanu anum" she nga ai re. Ya daini gaw Myitkyina e nga ai anhte Jinghpaw Wunpawng a kanu ni wa, Jinghpaw kanu n chye tai, gwi kanu gale mat sai nga sayang gaw, n yawn ai kadai wa nga na!

Chyum mungga hta Eshta (Esther) ngu ai Yuda amyu num kasha langai a lam mu hti yu na ga ai. Yuda amyu ni mahkra hpe mungkan ntsa kaw na ru hte nawng lap hte brawng sat shamyit kau na matu, hkawhkam Ahasuru aming shabra dat sai kaw na Eshta a myit nyan bawnu atsam, magrau grang ai lam a majaw, hkye shalawt la sai n rai ni? Eshta ngu ai jan lama n nga ai rai yang, Yuda amyu mung mat mat sana. Yuda amyu mat mat jang, Yesu Hkristu ngu ai mung n paw pru sana! Yesu Hkristu n paw pru ai rai yang, daini mungkan hta tengman ai makam masham hte htani htana myit mada shara hpe mung n lu la sana!
Hkawp ni, moi ni e, she myit yu mu. Lapu e gunglau hkrum ai Jinghpaw Ewa nanhte tai na myit ni? Htawm hpang de nga pra matut na nanhte a kashu kasha aru arat ni hpe, dagam dala dingnye hkringhtawng jaw kau da na myit ni? Shinggyim masha gaw hkum hkrang naw hkrung nga ninglen, n hpru n mai ai amu galaw na rai yang, hkum hkrang si mat tim, labau tsawm ai mying ngam nga lu yang grau kaja ai n rai ni?    Jinghpaw Wunpawng sha ni, tinang amyu, tinang mungdan dip da hkrum ai kaw na  lawt lu na matu, asak du baw law law, salu salat sai tum sai pa law law hkrat nna shaning galu apnawng shakut shaja nga ga ai hpe myi di tawn nna nyet kau sana myit ni?

Hkamai Tang ngu ai gaw, Hkamung Shagawng hpe garet, Ndabat mung hpe  woi shazet ai, Jinghpaw du magam, labau hkanhpa nyam ai ni rai ma ai. Hkyet Hting Nan ngu ai mung, Mali Hkrang Walawng ga na, htunghking labau gindai jum, ginru ginsa labau lum ai ni rai ma ai. Lajawn ni ngu ai mung, Hugawng magam du kaba, mungdan shakung chywi laisa ni rai ma ai. Yawng e jawm hkungga nga ga ai re. Yawng e shareng shagrau da ga ai re. Raitim ya daini gaw, "La chyau chyau sha, num chyau chyau hka" nga ai hpa, ningrum ningtau (Ewa) ni a majaw, wa pu shup yang, pali nchyan mayut let wa hkyi sha lu manam ai poilaw shabrang hte bung  mat nga manit hka! Goi sha.....! Tsawm la ai Utawng kanu ni wa, Uhka kanu she tai mayu nga myit hka i?

Sumlut Naw
Pang Madi
26/7/2012

11 comments:

Anonymous said...

ya ndai ni wa she ting gyeng hpa a matu amyu hpe nyet, hpyen wa hpe hpa rai mat masai law

Anonymous said...

Myit nrawng ai, WP sai njet ai re.

Anonymous said...

N dai ni hpe ,ma hkrai sin sha ngun na re da ,,hkum tsang nga mu ,,

Anonymous said...

Chyahkyawn hpyi mi hpun tim sagu myit rawng ai ni mi rai na ma ai kun ngu lagu myit nga ai re wa kaja sha chyahkyawn hpyi hpun, chyahkyawn myit rawng, Party dazik kaw shakap da ai hte bung, dai dusat myit rawng ai ni she rai nga mai ai.

Hpyen wa a lagaw lata tai let tinang amyu hpe ninghkap ai, dingbai dingna jaw ai ni gaw WP mi rai tim anhte amyu a matu jet bat hpyen, shingnan hpyen re. Hpyen tai ai ni hpe gaw jasan kau ra ai baw re.

Nu num marai manga ni e hpa nchye galaw yang, yup nga mu. Yup nga yang pyi n-gun naw raw na myit dai. Chyahkring chyahkra na ngamu ngamai lam sha hku myit mu.Labau ntsawm mat na mit dai.

Ndai lam gaw nu num marai manga a myit sha gaw nrai na re. Nu num ni gaw madu wa a uphkang ai kata nga ai ni re majaw madu wa ni a maw lanyet, hpyen wa a ra mari shangun ai rai na re. Ndai zawn re ai mung masha hkin mang salang gaw amyu hpe sai chyup ai ni re majaw koi kau ra na ga ai. Ju shingna ni rai na re, shingnan hpyen, jet bat hpyen ni re.

Anonymous said...

Tinang amyu hpe yu kaji, masha hpyen wa hpe grau shadu ai ni katut sha na ma ai lu.

Anonymous said...

Tinang amyu hpe ninghkap mayu ai gwi kanu ni rai nga ma ai.

Mau Jin mau Jin said...

A ga???? Hket hting nan wa e' na aq mying gaw 'hket' nga hte maren hkunhkraw atsam hket mat ai shaloi, ' hting' jahting da ai sut gan ma mat yang ' nan' shingnan sha pyi tai ya rit nga na hkum marawn jahtau taw re lu. Nan hte aq madu jan ni hpe myen du ni kaw maidang wa n ap da mani? Shawa num ni ram pyi manu n dan ai myit hte madu jan ni hpe dut sha gwi ai ni, mungkan n tsa wp shingteng a mying hte hkum nga mu. Sadi

Anonymous said...

Mung masa nchye galaw yang gaw zim sha nga mu. Maw hpyi bungli hkum galaw, lachyum npru ai.

Anonymous said...

Mau jin mau jin tsun ai nau sawng ai zawn nga ai le. Shanhte ni gaw mung masa salang ni rai ma ai lu. N-gun madun poi galaw na nga ai nhtoi loi naw la yu ga le. Kaja wa sha n-gun madun poi woi awn wa jang chyawm gaw myit yu hpa rai nga ai.

Uhm Mau Jin Mau Jin tsun ai mung myit yu hpa chyawm gaw rai nga ai, hpaga la ni mung masa galaw jang gaw ja lung seng lawk jaw na, hpun lawk jaw na ngu Myen salang ni masu tsun hkalem jang gaw nchye tsun ai lu. Madu jan shap ya rit, kasha jaw rit, kajan shap ya rit ngu yang mung shap ya wa na ma ai lu. Mung masa galaw masu ai hpaga la ni hpe gaw nau gaw nmai kam ai law i?

Mau Jin mau Jin said...

Hkau myitsu wa, n dai myu tsaw myit n rawng ai Hkyet hting nan Group ni gaw, mung masa galaw ai ni n re ma ai law. Mung masa ngu gaw lachyum grai sung ai hpan langai re, nam nak rawng ai mung masa n dai gaw, hpan langai hta sha jai lang mai ai kumla re. Dai kumla gaw, teng man ai gara magam bungli e' jaw ai hku tsap ai, angkang sadi dung ai, simsa lam tam ai, masha n sat ai, manawn mayun kumhpa n sha ai, masha aq lamu ga a rung a rai n zing la ai, tsaw ra matsan dum myit rawng ai, tara ai, kalu kaba mayu ai, hpaji chye ai, gawk nu n naw ai, KK hpe chye ai hte tsun yang pyi n ma ai re. Ding re lam ni hpe langai pyi tsep kawp n lu ai masha wa mi, mung masa salang nga ai gaw, Kachin mung dan hpe dut sha kau ai, sama du wa sin wa naw hte u nu ni rau sa bung nga ai majaw, shi hpe loi sawng hkra ka shadam dat ai nye aq comment hpe gaw chyena ya rit. Lahta na nye aq comment hta tsun mayu ai gaw, KIO hpe ning hkap na nga n na, shan hte aq madu jan ni garu wa ai hpe yu yang, myen du ni hte sawk sek hkawm chyalu re ngu kam nga ai re.

lamungnawnaw said...

mayak mahkak a majaw sha gaw kk hpe hkum kam shut,hkum shaga shut mu lu,yihku wan magrau grang tai na hkyen wa nga ai.kk gaw adam hpe shing gan de shale kau dat ai gaw yaw shada ai lam nga ai.dai ni an hte tsin yam hkrum ai gaw,kk a yaw shada lam langai nga ai.myen dang chyang amawp apup na hku gaw hkum woi hkyen mi law.

Post a Comment