Ndai ten hta Thein Sein asuya ni hku nna hparan mat wa ra ai mungmasa, sut masa, hpyen masa, manghkang grai law nga malu ai. Gara madaw she shawng hparan na kun?. Hparan ra ai manghkang sadek kaji/kaba ni gaw jahkrum da ai zawn rai nna la dingda tsap dingren taw nga ma ai ten rai nga ai. Ndai manghkang sadek kaji/kaba ni yawng gaw ya la dingda tsap taw nga ai aten she bung tim, shanhte tsap taw nga shara hte matut pru hkawm sa wa na hkrunlam pandung shadaw gaw nbung hkat nga ma ai. Ndai manghkang sadek kaji/kaba ni hpe mungmasa myi jut hku yu ginghka dat yu yang hpan (2) re hpe mu lu nga ai.(1) Sinat laknak nlang ai sha gasu gabrawng ninghkap ai mungmasha hte gap gasat jahkring tawn ai KIO/KIA a magam gun ni hpe majoi wa htim sat sharu kau ai a majaw SUM RI MACHYA NTSA de lung ra ai ndai MANGHKANG KABA.
(2) Sinat laknak lang nna rawt malan nga ai laga myu bawsang ni yawng hte gap gasat jahkring myit hkrum tawn lu tim KIO/KIA hte gaw gap gasat jahkring myit hkrum lam nmai lu hkraw mat ai MANGHKANG KABA..
Lahta na manghkang (2) gaw hparan ra ai manghkang sadek kaji/kaba yawng hta grau BAWNU HKRAW RA AI MANGHKANG KABA (2) nan rai nga ai.
(1) Sinat laknak nlang ai sha gasu gabrawng ninghkap taw nga ai uhpung ni gaw, sinat pala hpe hkrit ai majaw myen gumshem hpyen asuya a gyepdin shawng kaw shaning tsawm ra mi gyem apyet nna nga ra mat ai ni rai nga ma ai.hpa majaw nga yang 1988 ning hte 2007 hta majoi gap sharu kau ai majaw ram ram shagri brep mat ai ni rai nga ma ai.
Bai.. 2001ning hta Wunpawng Mungdan Shanglawt Asuya magam gun myitrum sumpum mi mara kata majoi wa htim sat sharu kau ya ai. Ndai manghkang ni hpe lai wa sai ten hta hpyen dap n-gun laknak hte dip sazim tawn lu tim daini gaw bai hkrung pru wa sai rai nga ai. Hpa majaw nga yang 2011 ning march shata hta Gumsan Magam Thein Sein tsun ai mungga hta, SANSENG AI ASUYA HTE SIMSA AI DEMOCRACY MUNGDAN hpe gawgap sa wa na nga nna GA SADI jaw lai wa sai majaw rai nga ai. Shi jaw ai GA SADI hte maren SANSENG AI ASUYA rai yang lahta na manghkang ni gaw SUMRI MACHYA NTSA de lung ra ai ningbaw ni, Prat htawng hkrat ra ai ni, Shaning kaba htawng hkrat ra ai ni grai law nga ai. Ndai gaw Thein Sein asuya koi yen nlu ai manghkang kaba rai nga ai. Laga matsan chyaren mat wa ai manghkang hte shinggyim ahkaw ahkang manghkang ni hpe chyawm gaw gau ngwi ngwi hparan mat wa lu mai nga ai.
(2) Sinat laknak lang nna rawt malan nga ai laga myu bawsang ni hte seng nna…Nshawp nkap, Magyi magaw, Manai makai rai nna lung wa ai Thein Sein asuya gaw masu magaw ai ladat hte mungkan a man e SIMSA AI DEMOCRACY MUNGDAN rai sai ngu nna ndau shabra lu na matu ladat lagu shaw taw nga ai lam hpe mu lu ai.Hpa majaw nga yang Thein Sein asuya hku nna gaw myen mungdan ting na laknak lang rawt malan nga ai wuhpung ni yawng hte gap gasat jahkring lu jang mungdan simsa sai ngu na matu rai nga malu ai.Kaja wa nga yang jet ai simsa lam ngu ai gaw gap gasat jahkring ai dai langai mi hte sha simsa mat wa ai nre. Mungmasa manghkang hpe mungmasa hte hparan lu mat wa ai mahtai hte hkring mat wa ra ai gasat gala hpe she jet ai simsa lam ngu nna mai tsun nga ai. Raitim Thein Sein asuya gaw shanhte a myit kraw lawang nan yat manam ai amyu re majaw mungdan gata jet ai simsa lam gaw ahkyak nre. Mungkan kaw na dolla lu la na matu sha ahkyak madung rai nga malu ai.Ndai ten hta myen asuya ni hku nna mungkan de lu masu sha na matu KIO/KIA ni kaw naw dau taw nga malu ai. KIO/KIA hte gap gasat jahkring myit hkrum lam lu hkra ladat amyu myu shaw kyin taw nga malu ai. Ndai gaw Thein Sein asuya BAWNU HKRAW NGA AI MANGHKANG KABA langai mi rai nga ai. Ladat shaw kyin nga ma ai.
(a) Htani htana simsa lam ngu ai ga baw hte mung nmai byin hkraw …..Htani htana ngu ai ga Hkum lawm yang KIO/KIA ni grai kabu ai hte kam na re ngu ai hku gaw she nrai i? 1994 Ning hta na gap gasat jahkring myit hkrum lam hpe shanhte jahten kau ai gaw HTANI HTANA ngu ai ga baw nlawm ai majaw jahten kau mai ai re ngu ai hku i?.
(b) U Awng Tawng hte bungli nbyin hkraw ai majaw U Awng Min hpe bai galai tim nmai byin Hkraw….KIO/KIA gaw shanhte myen amyu ni zawn masha shada nawku ai amyu wa shadu Ma ai kun?.
(c) Thein Sein wa shi nan woi ningbaw nna simsa lam komiti hpaw ninghtan tim nmai byin Hkraw… Thein Sein wa shi nan woi awn jang, KIO/KIA a pandung shadaw gaw galai mat na re ngu ai hku i?
Ndai kaw Annau ni hkumtingdek chye na ra ai. Daini gap gasat jahkring myithkrum lam nmai lu hkraw ai gaw, 1994 ning hta na gap gasat jahkring myithkrum lata masat hpe shanhte myen ni jahten sharun kau ai majaw sha nre. Ya byin taw nga ai majan hta grau kaba ai majan hpe bai nkam byin ai majaw grai sadi ra, grai myit yu ra mat ai she re. Lachyum gaw ya na ndai Thein Sein Asuya gaw jet ai mungmasa bawngban mai ai mungmasha asuya ajet nan nrai taw nga ai majaw she re. Tsun mayu ai lam gaw jet ai mungmasa bawngban ai lam nmai galaw ai asuya hte gaw gap gasat jahkring tawn lu tim bai hten mat na sha re. Hpa majaw ndai hku tsun lu ai ai i? nga yang…La ma wa THEIN SEIN ASUYA SHE JET AI MUNGMASHA ASUYA RAI YANG 1994 NING NA GAP GASAT JAHKRING MYIT HKRUM LAM HPE JAHTEN NA N-RE. Ndai ten gaw Annau ni chye nan chye na ging ra sai. Nkau mi tsun ai, RFA Jinghpaw shiga kaw nna na lai wa yu sai. Ya gaw Rapdaw nga sai, Rapdaw kaw tsun la mai sai , Gap gasat jahkring lam hpe sha pyi chyam yu mu nga nna tsun pru wa ai. KIO/KIA gunhpai taw nga ai bungli gaw ma gasup chyai ai bungli nre. Dai Rapdaw gaw gadai galaw da ai, gadai na rapdaw, gadai jumtek tawn ai rapdaw rai kun? Shawng chye tawn ra nga ai. 17 ning chyam yu yang Annau ni kade daram sum machyi mat wa sai mung yawng chye chyalu re.Annau ni myit ai hte yaw shada ai lam bungpre na sha ahkyak dik rai nga ai law.
Sau Nan Du
03/08/2012
4 comments:
Lahta Na Laila gaw teng ai ngu mulu ai , than stein atsuya myen hpyen atsu ya ni gaw mungdan sha gu hta nga nga ai (hard power & soft power ngu ai hpe kahti kalai Lang nga Ma ai hard power ngu ai gaw miltary hpyen dap hpe jai Lang ai ladat re nga ai anhte wunpawng myu sha ni hpe Lang ai ladat gaw hard power rai nga ai , soft power gaw awngsan su kyi mung Mai bin wa nga ai soft power hpe gara hku ninghkap hpe wunpawng myu sha ni myit ra nga ga ai .
Lahta Na Laila gaw teng ai ngu mulu ai , than stein atsuya myen hpyen atsu ya ni gaw mungdan sha gu hta nga nga ai (hard power & soft power ngu ai hpe kahti kalai Lang nga Ma ai hard power ngu ai gaw miltary hpyen dap hpe jai Lang ai ladat re nga ai anhte wunpawng myu sha ni hpe Lang ai ladat gaw hard power rai nga ai , soft power gaw awngsan su kyi mung Mai bin wa nga ai soft power hpe gara hku ninghkap hpe wunpawng myu sha ni myit ra nga ga ai .
Lahta na laika ngau hpe madi shadaw let nye a ning mu hpe tang madun dat ai.
Myen amyu ni myit ding hpring ai ngu ai gaw nhkyau ram naw magaw ai da. Thein Sein asuya lang ai ceasefire policy gaw lai wa sai NAWATA asuya ten lang ai policy sha re. Gap hkat jahkring na, buga bawng ring lam galaw na, de hpang she mung masa jahta na. NAWATA lang ai policy hta pyi grau sawng ai ngu ngai mu mada ai. Hpa majaw nga yang 2008 ning na ningpawt ninghpang uppadi kata kaw jahta ga nga ai re majaw grau pyi tsang ra ai ngu mu mada ai.
Daini KIO/KIA tsun hpyi nga ai mung masa jahta lu na matu hpyen dap hting nut ya na nga ai gaw galoi nmai byin ai ngu mu lu ai. Hpyen dap hting nut ya na matu gaw lai wa sai 1960 jan grup yin hta rawt malan hpung law law kaw nna MSL asuya hte bawngban ai shaloi mung tang madun lai wa yu masai. Galoi mung nhkap la ai re majaw, KIO/KIA ni hku nna ya hpyi taw nga tim lachyum naw npru, myen ni mai hkap la ai baw tang hpyi lam nre majaw hkum hpyi taw nga manu. Ahkaw ahkang ngu ai gaw hpyi ai baw nre da, tinang chye la na she ahkyak ai da.
Simsa lam jau bu ngu tsun nga ai Awng Min wa nan mung tsun nga ai. Hpyen masa hku gaw hpyen dap hting nut ai ngu ai gaw hpyen sum ai, asum jaw ai re majaw hpyen dap hku nna gaw galoi mung hting nut ya na nre nga tsun ai. Simsa lam kasa ni hku nna mung hpyen dap hpe tsun nmanu ai nga tsun ai. Dai majaw dai ni KIO/KIA ni tsun taw nga ai hpyen dap hting nut ya na ngu ai gaw galoi mung hkap la na nre ngu mu mada ai.
Awng Min wa woi awn nga ai simsa lam policy gaw sut masa kaja wa jang hpyen gasat gala zim wa na re ngu grai loi ai hku sawn da ma ai. Dai majaw Thein Sein wa a mung ga langai kaw “Ramma ni sinat lang na malai Laptop computer lang hkra galaw na” nga tsun lai wa yu sai. Lahta na policy/idea gaw lai wa sai ten Thailand mungdan kaw kani shamyit ai shaloi lang ai policy/idea re. Dai hpe ya Yangon kaw na Civil Society Organisation langai kaw na salang nkau ni a hpaji ai hpe hkap la da ai re lam chye lu ai. Ndai policy ni a majaw daini Kayin mung daw maga industrial zone ni law law hpaw na matu shakut wa ai gaw de a majaw re. Dawe deep sea port ni nbyin byin hkra galaw wa ai gaw de a majaw re.
Dai majaw ladat ningnan, ga baw ning nan bai tam ra sai ngu mu lu ai.
Srilanka mungdan na masa hku kun? Shing nrai Libya mungdan na masa hku kun? Ndai lahkawng kaw na langai ngai hpe lata ra sana ga ai. Laika ka ai wa hku nna gaw Libya mungdan na masa hpe madi shadaw dat ai.
Lahta na lam ni jaw ai ngu mu mada ai.
Post a Comment