Slideshow Image 2

ANHTE A MATU AHKAW AHKANG NGA SAI KUN?

Anhte Jinghpaw ni  hpaji rawng ai, n’rawng ai hte du salang ni n’kau mi Panglong agreement hpe shadik na matu Myen ni hpe naw hpyi mayu ai ni nga ai zawn, dai hpe n’tsun saga ngu ai ni mung nga ai. Raitim ngai hku n’na gaw dai hpe dawm kau sai ngu anhte Jinghpaw ni tsun shapra na ahkaw ahkang nga sai kun, ngu ai hpe tsun mayu ai. Dai hte seng n’na ngai tang madum mayu ai lam ni gaw:

1. Dai Panglong agreement hpe amyu bawsang ni yawng maren mara nga na matu senhtu sai. Raitim, dai hpe Myen ni n’shadik ai. Dai majaw amyu bawsang ni yawng myit hkrum ai hte, dai hpe atsawm sha shadik galaw sa wa na matu Rapdaw kaw e 1962 shaning hta tang shawn n’na jahta hpang wa sai. Raitim Gen. Newin dai hpe, Myen mung hpe ka kapran na matu galaw ai ni ngu, yawng hpe rim dat sai. Dai re ai majaw Myen ni dai Panglong agreement hpe n’shadik mayu ai lam madun ai lahkawng lang rai sai. Langai lang ngu na gaw, Aung San si ai hpang, dai hpe n’shadik na matu Myen Mung Tara Daju hpe, amyu bawsang ni hpe n’chye shangun ai sha, U Nu ningbaw ai Myen ni galai kau dat n’na, Myen ni she madu tai let uphkang sha na matu glaw lai wa sai.


2. Dai Panglong ga sadi hpe n’shadik ai majaw anhte Jinghpaw ni rawt malan hpang wa sai. Rawt malam ai hku n’na dai ga sadi hpe shadik na matu bai hpyi yu sai re. Shaloi, sinat hte n’re ai sha mung masa hku n’na jahta ga, simsa ai lam hpe hkap la mu nga wa ai. Dai majaw, anhte Jinghpaw KIO/KIA ni, Myen ni hpe kam n’na 1994 shaning hta Myen asuya hte simsa ai lam la sai. Raitim 17 ning du hkra sima ai lam hku n’na anhte hpyi shawn nga ai mung masa lam n’jahta ma ai. Anhte gaw hpyen la ni she re, mung shawa asuya hpaw ai shaloi, dai ni hte she mung masa jahta mu nga wa ai. Dai hpe kam n’na anhte Jinghpaw KIO/KIA ni, Myen ni shaga ai Convention kaw pi lawm hkra rai shakut lai wa sai. Raitim anhte Jinghpaw ningbaw ni tang shawn ai lam ni langai mi pyi n’hkap la ma ai.

3. Dai hpang, Thein Sein Asuya du wa sai. Dai shaloi Rapdaw kaw n’na she anhte hpyi ai lam ni hpe, mung masa hku n’na galaw na ahkaw ahkang lu na matu, KIO ningbaw n’kau mi KIO kaw na le wa n’na, Kachin State Progressive Party (KSPP) ngu hpaw let bai galaw yu sai. Raitim dai hpe bai n’galaw shangun pat kau ma ai. Anhte hpyi ai lam hpe jaw na malai, ga jarit sin hpyen dap tai ra ai she bai nga wa ai. Dai hpe n’hkapla ai majaw Myen ni anhte hpe wa kasat hpang wa ai re. Anhte Myen mung de sa n’na gap kasat ai n’re, Myen she anhte mung kaw lung wa n’na gap nga ai re. Dai majaw anhte tinang hpe magawp maga na matu gap ra wa sai.

4. Anhte hpyi shawn ai lam ni hpe jaw na malai anhte hpe manu mana zingri wa ai. Anhte a dum n’ta yawng nat kau ma ai, anhte sut nga manga yawng hpe gun la  wa mat wa sai. Anhte a num ni hte shayi ni hpe mung roi ai. Dai gaw anhte amyu hpe jahtum na she gasat wa nga ai re. Dai hpe anhte ni kadai hkam sha lu na ta?

5. Ya Thein Sein Asuya hku n’na mung; shi a simsa lam masa hta jahkrat da ai lam ni gaw:  Myen hpyen ni a 2008 shaning na Tarakanu hpe hkap la ra ai, Myen hpyen dap n’pu-e nga ra ai. Myen rap daw kaw shang na matu Mung masa party hpaw mu she nga wa ai. Anhte ni hpyi shawn nga ai hte maren, dai lam shadik galaw sa wa na nga ai ga, n’lawm nga ai. Dai majaw ya du hkra  shanhte Panglong ga sadi hpe n’shadik mayu ai lam anhte chye lu ai.

6. Ya bai anhte hpe masu hkalem sha na matu, moi na Panglong hta grau tsaw ai madang hku n’na amyu sha hpawng galaw ga nga ma ai. Moina Panglong ga sadi hta grau tsaw ai hku nga yang, hpa baw i? dai hpe shanhte n’tsun da ai. Panglong hta grau tsaw ai nga yang Switzerland zawn i? European Union zawn i? Dai zawn rai yang  chyawm gaw anhte ni hkapla mai nga ai. Raitim Panglong gasadi pyi gaw shanhte n’shadik mayu yang, Sawitzerland hte European Union zawn galaw na ngu ai gaw myit mada hpa n’nga ai.  Dai majaw, ya na lang mung anhte hpe bai masu hkalem sha na matu galaw maw nga ai lam danleng nga ai re. Dai rai yang anhte Myen ni hpe naw kam nga na kun? Myen ni gaw anhte hte maren mara nga na n’myit ma ai, mayam shatai na she myit nga ai. Anhte Myen ni a mayan sha tai nga na kun? Anhte ni Myen hpe bai masu hkalem sha shangun na kun? Moi ya Jinghpaw salang langai mi tsun ai;  kalang mi masu hkalem yang, masu hkalem ai wa a mara re, lahkawng lang rai yang mung, dai masu hkalem ai wa a mara re. Raitim masum lang rai yang gaw, dai masu hkalem sha hkrum ai wa she angawk ai masha re, nga ai. Myen ni anhte hpe masu hkalem sha ai gaw masum lang hta grau jan mat sai. Anhte ni angawk ai amyu sha ni tai nga na kun? 

7. Anhte ni shaning law law aten ladaw asum hkam let, sutgan law law asum hkam let, manu mana asak sum hkam let, hpyi lajin lai wa sai. Raitim, munghpawm Myen mungdan kaw lawm na ngu anhte gasadi jaw da ai hpe Myen ni n’hkap la mayu yang,  nanhte  hte  rau sha nga mayu ga ai law ngu, Myen ni hpe shaning law law hparai tsun  nga na i?  Dai majaw ya gaw, nanhte Myen ni anhte a gasadi hpe n’hkap la mayu yang gaw, anhte Jinghpaw ni dai Panglong agreement hpe dawm kau sai, ngu tsun na gingdan sai, ahkaw ahkang nga wa sai re. Moi Myen ni shanglawt garai n’lu yang na zawn, anhte Jinghpaw ni awmdawm shanglawt mungdan hku n’na sha nga sana re ngu, mungkan masha ni hpe tsun shapra na ahkaw ahkang nga wa sai re. Kadai mung dai lam hpe n’teng ai ngu ningdang na lam n’nga sai.

La Ring
3/9/2012

11 comments:

Larin said...

N-dai laika ngau hpe 100% madi shadaw dat ai ht n-dai hte maren hkan galaw shakut sa wa na aten du sai ngu tsun mayu ai. Pangloong Ga sadi moi hkoi mat sai, hten mat sai, lai mat sai nga myen ni kawn mung tsun lai wa sai. Anhte Wp shani sha manya tai taw nga ai re. Myen ni gaw Jinghpaw ni hpe maigan masa hku hkam la nna shamyit hkyen ai hte tatut galaw dingyang re ai hpe mung chye ninglen, mu ninglen munghpawm law, rap ra ahkaw ahkang law nga, Myen kawn n-kam hka ai zawn rai nna woi awn ningbaw ningla kanu kawa ni yawng mung dum hprang ra sai. Awmdawm Shanglawt a matu ngu n-dau shabra na ten pyi ya lai mat hkyen sai re..... Hkrit ai kun? n-dai hpe hpang dat ai hpang she mahtai zaw na ga san mung pru wa na... Myen mung kawn mi rai rai, mungdan kaga hkan kawn mi rai rai.... dai pru wa ai hpang she lama mi gaw byin wa na re. N-byin ai dingsa gaw ya na zawn sha hkam sha nga ra na re.

Anonymous said...

grai jaw ai law. panglung sadi hpe n'shadik ai majaw dai ni annau ni sat nat zingri roi rip hkrum nga ai re jaw myen tsun ai kaning re panglung ga sadi tim n'mai kau sai.myen nan simsa lam ra yang loi loi sha re.hpyen dap ni hpe htingnuk kau nna atsam mai bawngban sang lang la ai re.rai dai ni gaw WPjinghpaw myu ngu n'nga hkra dasang ladat shapraw nna n'gum hte masa kaba 4 hku sat shamyit nga ai re hpe grai myit yu ra sai hte,myu de nga ai maigam de nga ai ramma ni kara kaw tim sadi ra sai.myen gaw jinghpaw sha re ai yawng hpe sat sai hpe ja ja dum saga law.

Anonymous said...

Lahta na laika ngau hte comments ni hpe grai madi shataw ai. Anhte myu sha ni mung madu mungdan lu ging sai ngu kam ai. Labau hpe bai n,htang yu yang myen ning baw awng san wa nan mung anhte a kaji kawa ni hpe maw hkalem ai hpe mu lu ai. Shi a asak hte mahkam hkam n,na shi si mat jang, shanhte myen ni kaga myubaw sang ni a lamu ga yawng hpe lu madu la na ma sin kaba hpe mu lu ai. Hkin nyun mung maren re. Awng san kaw mung maren sha re myen kara myen hpe mung nmai kam ai. Ndai lam ni gaw yawng chye chyalu rai na re. Dai majaw anhte w p gaw anhte san san nga mat saka ngu grai myit mada nga ai law.

Anonymous said...

Pang lung hta kalang, 1994 ning hta kalang rai yang masu kaba lahkawng rai sai. Hpang kalang wp sha ni hpe n lu masu ai rai jang wp sha ni shang lawt maga hkawm nga sai. Ya mung naw masu katut hkrum sha jang mungkan hta Jinghpaw n rai sai. Hpaw tsat she rai sana re .D kaba hte Dum u.
Lungbra.

Anonymous said...

NDai La Ring Tang madun ai laika ngau hpe Lahta na myit su ni madi shadaw jaw ai lam hpe matut kahtap nna madi shadaw n-gun jaw dat nngai. Ya ten du hkra Myen mungdan hpe gahti galai uphkang nga ai, Myen asuya gaw, Myen amyu sha kaba ladat hte matut uphkang sha na lam chyu sha gyin shalat taw nga ai re hpe, anhte yawng myit dum ra nga saga ai.Anhte W/P amyu sha ni hpe lam woi ning shawng tai ya nga ai myit su kanu kawa du salang nkau mi a myit jasat gaw, ya ten du hkra Pang Lung Ga sadi ngu ai hpe bai matut tsun tsun rai taw ai hpe mu lu ai. Kaga amyu baw sang ni gaw dai lam hpe myit hta pyi nbang da ai hpe maram lu ai. Ya ten uphkang nga ai Myen asuya gaw, Pang Lung hta grau ai hpe woi galaw ya na nga nna, asawng chying lau taw nga ai hpe, anhta a kanu kawa nkau mu mi gaw dai lam hpe grai myit kam kaba hte naw ala taw nga ai hpe mu lu ai. Kahtap nna masu masu rai ai lam hpe myit malai nlu ai sha naw kam taw nga yang gaw, shut kaba she rai wa na re. Kade lang masu, Kade lang Ga sadi run wa hpe mung adum nga ga. Myen a baw nu hpe pyi ndep ai zawn zawn rai mat wa na.Ya ten du hkra gahti galai uphkang sha mat wa sai, Asuya shagu gaw, Pang Lung ten mung lai mat sai. Munghpawm mung hpawm nga nna gaw ntsa lam tsun masu taw nga ai.Grai na pyaw nga ai. Kaja wa nga yang, Federal ngu ai gasi gangau hpe kachyi mi pyi ka tsun shapraw ai lam nmu mada ai hku re. Dai majaw, Ga shadawn langai mi tsun ga, Shabrang langai mi mahkawn kasha langai mi hpe tsum tsaw tsaw ai ngu ga. dai shabrang wa gaw shi a sumtsaw jan hpe sumtsaw mahtai hpyi ai shaloi, Nang hpe ngai tsaw sai ra sai ngu ai gasi gadin langai mi pyi nhtang tsun ai lam nnga, yau la ai lam pyi nnga, Tsaw sai ra sai ngu pyi ntsun yu ai.NUm jan pyi atsawm nchye ai, tinang amyit kraw langai mi kaw nna chyu sha, ra taw nga ai jan hpe,nang hte ngai dingku de saga, hkung ran saga ngu ai hte wa nbung na kun ?Dai num sha gaw Dai shabrang wa a ntsa hta gara hku mu wa na rai ta? Dai majaw kachyi mi pyi myit nlawm ai, kajai pyi n kajai ai lam hpe anhte mung tsep kawp nmai nmyit la yang kaja na re. Dai majaw anhte W/P amyu sha ni gaw, AWMDAWM SHANGLAWT ngu ai hpe JA JA GWI GWI ndau dat yang kaja sai ngu ai hpe ning mu jaw dat nngai law.Anhte a Awng Padang Yehowa Karai Kasang ngu ai Gabaw dik wa na re. Ahte amyu ni hpe Karai Kasang yu na re.

Anonymous said...

myen hte gaw tsep kop nmai pawng sai,myen gaw kaloi mung sadi dung na nre,myen hte sha naw pawng yang gaw hta ni hta na du daw sai hkaw lam nga na sha re,dai majaw k. kaw manoi kam hpa let padang hkrun lam hpe awmdawm padang dip lu hkra kyu hpi let nut tit tit gap tit tit rai ga.

Anonymous said...

Salang La Ring a ningmu hpe tsepkawp madi shadaw ai. N-gun ja ai rai yang magyi magaw nsa ra ai. Du mayu ai de dingtawk du wa mai ai. Dai ni na ten hta WP Myusha ni hta dai zawn galaw lu na matu n-gun hta ning ra ai lam naw nga ai. Awmdawm ahkaw ahkang lu ai mungdan lu wa na matu npawt nhpang ngangkang hkra tsang langai a hpang langai gaw-gap la ra ai hpe WP Myusha ni mu chye nga chyalu re.

Myen asuya gaw satan re. Satan a lit gaw masu magaw hkalem sha ai. Shi gaw shi kaw lit nga ai hte maren galaw nga ai. Anhte a lit gaw dai satan a hkalem ai hpe chye ya nna kahkyin gumdin ai n-gun hte jawm gasat shamyit kau na matu re. La ma tinang a lit n-galaw ai rai yang tinang a mara sha re. Satan hpe mara shagun nga ai bungli gaw aten shama tinang a hkum hpe dam ari jaw nga ai lachyum sha rai nga ai.

Myen asuya a masing gaw Anorahta, Bayinnong, Alonghpaya (Prat 1,2,3) ten ni hta bum nga masha ni a mying hpe shamyit kau ai zawn dai ni na prat (4) hta mung bum nga masha ni yawng a mying hpe shakut shamyit nga ma ai. Dai majaw satan tsun ai, galaw ai a yaw shada ai yawng gaw bum nga masha ni a mying hpe shamyit nga ai gaw ding yang asan nan dan dawng nga ai.

Dai majaw bum nga masha baw sang myu (7) gaw satan nlawm ai "United State of ......." ngu ai mungdan hpe gaw-gap la ra sai. Bum nga masha myu shagu gaw shawng de shanhte lu wa yu ai mungdaw hpe madu lu na rai nna, satan wa mung shi lu wa yu ai "Dagong, Nyong-U, Pagan" ginra ni madu mai na rai nga ai. Dai shaloi satan a mungdan gaw, bum nga masha ni a mungdan e shinggrup nga ai rai nna, shi a htingbu mungdan gaw "United State of ....." langai sha rai nna panglai hte mung nni kahtep sai.

Bum nga masha myu (7) ni kahkyin gumdin ai lam lu wa ai rai yang, mungdan nnan gaw-gap na hte seng nna UN kaw na madi shadaw la na matu mung masan sa na re. Dai madang kaw du wa ai shaloi masa hta hkan nna awmdawm ahkaw ahkang lu ai mungdan hpe shalat la mai na re.

Mungmasa ngu ai gaw yawng jawm chye nga sai hte maren na chying dam lada ai baw re majaw, WP Myusha hkum dek shagu gaw tinang du hkawm ai shara hkan na ni nawn ai kaga hpu nau myusha ni hpe hku hkau la nna dam lada ai myit hte kahkyin gumdin lam ngangkang hkra jahtuk la ai hte yawng a yaw shada lam awngdang wa mai na re, ngu nna Salang La Ring a ningmu hpe madi shadaw dat ai.

Anonymous said...

la ring tang madun ai lam ni gaw 100% tsep kop jaw ai,dai majaw w.p myu sha yawng a myit hta awm dawm de sa na hku sha myit ga.

Anonymous said...

mung masha ni gaw shanglawt chyu lu mayu ai she malawng mat sai...rai tim anhte kam hpa nga ai KIO ginjaw malawm salang nkau mi gaw..tawk hprut re mung masa policy n'gui lang ai zawn, myen hpe hkrit ai zawn, myen hte hka nmai ai zawn, mungdan laga byin na she tsang ai zawn re la ni nga ai nga na yu nngai.
Mungdan langai bying na nga jang mung pang-lai hka lam nhku ai law..mungdan kaba 2 jarit rai mat ai majaw yak na law..lachyum npru ai ni sawn shalawm nna ung ang taw ai ni mung nga ai zawn nga ai..
Teng sha nga yang dai lam ni hpa tsang hpa nnga ai..Eg.., NEPAL MUNG DAN, BHUTAN mungdan ni gaw India mungdan kaba hte, Miwa mung dan kaba a lapran matep taw nga ai mungdan re..Malihka ram kaba ai hka pa nnga ai mungdan re...Bhutan mungdan chye htam masha sen 7 ram sha nga ma ai...dai zawn re ni hpa shang lawt ai mungdan langai hku nna apyaw rai nga lu nga ai le...
Anhte WPJ ni gaw masha jahpan nga yang mung sen 10 jan de she re..lamu ga nga yang mung dam pa kaba dik, sut nhprang nga yang mung hpa she lang na i..bai nna maigan gan lawk nga yang mung INDIA, MIWA nga ai le...Sinna maigan ni de sa na nga tim Mdyen mung hku lai sa nra ai..India, China hku mai ai..madung gaw Myen uphkang ai kata na lawt mat lu na sha ahkyak re..
Bu hkawm shadang

Larin said...
This comment has been removed by the author.
Anonymous said...

Ningmu yawng a nsen gaw hkrak nga sai. Dai ningmuj ni hpe gumhpawn la nna kayin gaye jahtuk nna ahkyak la dat ai hte grau hkumtsup ai mahtai lu mai na re ngu mu ai.

Post a Comment