Slideshow Image 2

JINGHPAW WUNPAWNG MUNGSHAWA MANAWNG

1. Awng San wa gaw, Panglong Ga Sadi Laika byin tai na matu naw jahkrup nga ai aten hta, rudi bawsang amyu sha ni yawng maren mara ahkaw ahkang lu na re, nga tsun sai. Munghpawm kaw na garan pru mayu yang mung garan pru lu ai nga tsun masu ai hpe Jinghpaw salang ni mung kam shut ai majaw, Myen hte shanglawt rau la kau ai lam rai sai. Rai tim 1947 ning June  (10-30) lapran hpawng ai Constitution zuphpawng hta shi tsun da ai ga sadi hku n byin wa sai.

2. Matut nna 1994 ning hta Ningbaw Kaba Maran Brang Seng a lakhtak hta kalang mi gasat gala jahkring na matu ga sadi galaw sai. Dai lang na ga sadi gaw, sinat laknak n jahkrat ai sha, gasat gala jahkring tawn nhtawm, gaw sharawt bungli jawm galaw na hte, saboi ntsa e mungmasa jawm jahta na, ngu ai lam re. Dai hte maren, Dr. Tu Ja woi awn ai KIO kasa ni National Conference hpe ngut hkra sa lawm tim, an nau ni ra ai hku kachyi mi pyi n byin pru wa ai hpe mu lu sai.

3. Gasat gala jahkring ai (17) ning laman, anhte a matu hpa akyu n pru ai sha n-ga, hkrat sum mat ai lam ni tsun n dang, hti n dang rai mat sai. Laknak n jahkrat ai mi nga tim, sinat laknak hpai da ninglen, gap n mai ai sinat chyasi hpai tawn ai hku rai saga ai.

4. Sammung hkai rem dabang kaw myu tsaw share manang ni hpe dasang wa gap sat kau ai. Dung (6) na Agyi Zinghtung hte manang ni hpe majoi mi zingri sat kau ya ai. Anhte sinat hpai nga ninglen n mai gap ai. Maroi n ni ngu ai gaw dik mat sai. Dai ten hta KIO Tingnyang Up Malai Dr. Tu Ja gaw, Myitkyina e, Myen sa-wa Thein Zaw hpe madi shadaw ai mungshawa zuphpawng kaba hta, tingnyang ntsa de lung dung nna, Myen ga rawt shaga lai wa sai. Shagri pyi dang mi daram madawn kau mayu dik sai.

5. Du Kaba Dr, La Ja hku nna Buga Company a managing director galaw nga ai ten hta, Myen sa-wa kaichyan M-I (8) kaw na Capt. Thant Zin tsun ai ga gaw, "U La Ja, lawan di u, ntsa palawng hta hpun u; Thainghmu la taw nga sai; lawan lawan," nga nna tsun lai wa yu sai. Dr. La Ja ngu ai wa gaw, KIO Ginjaw Salang langai n rai ni?  Myen du jum langai mi sha me, hpyenma langai hpe shadut ai zawn nga tsun ai gaw, anhte rudi mungchying (Ethnics) ni hpe madang shanem nna kanawn mazum ai lam n ang ai i?

6. Uru lungseng maw ginra mahkra hpe Myen hpyen ni "U-paing, Achyu-tu" ngu nna zing madu la kau ai; Shanglawt ni kanip pyi n mai mat ai; jaw ai i? Hkam lu na i?

7. Lai sai 2009 ning hta, Gwihka Maw e, Miwa Misan Company, Myanmar Dagaung Company, Panghuk Duwa Company, ndai company masum e lu shaw la kau ai gumhpraw gaw, Uro wan 1000 jan re. Amercan dollar hku sawn yang wan 2000 daram re. Kaga shinggan de mayun dut sha ai (Black market) n lawm ai. KIO ni tara shang kade lu la ai lam n chye tim, mungshawa ni lagu chye lawm ai hku nga yang, salang ni kumhpa jaw ai Myen gumhpraw sen 200 daram sha re lam chye lu ai.

8. Myen ni gaw, KIA gasat na jarik kase mat nna, 2012, Sept. (1) ya shani, Company kru de aming hku karum hpyi sai. Sept. (10) ya shani Singapore Bank kaw na ndai Company kru a gumhpraw dollar wan 600 remit galaw la sai. Tsun ga nga yang, dai gumhpraw ni gaw, (17) ning gasat gala jahkring ai laman, anhte a lamu ga na shaw la ai nhprang sut rai hte lu ai gumhpraw ni rai nhtawm, dai gumhpraw hte anhte hpe sat na nat na laknak bai shagreng la ai lam rai nga ai. Urat sau hte urat shan kangau ai lam nan rai sai.

9. Dai re majaw Myen hte gasat gala jahkring na lam; lakmat htu na lam gaw gara hku myit yu tim n hkawn lu mat saga ai. Lahkawng lang lakmat htu yang, lahkawng lang agying agang machyi hkrum saga ai. Uru Sengmaw ginra hpe mung prat dingsa Myen a lata de n mai ap ai. Myen ngu ai hpe tsep kawp n mai ganip shangun sai. Anhte nan ja ja jum tek madu nna hparan ra sai. Anhte amyu ni lawan rawt galu kaba ra sai law.

Lakin Dai Gyung
Singapore.
15/9/2012

9 comments:

Anonymous said...

re..grai teng ai lam ni re. KIA ni gap hkat jahkring laman e.. hpyen ma ni yawng gaw hpabungli matu nan nchye galaw mat nna, hpakant ga e mung hkyiya tai ma,tsa rubam tai nna shada jehpre hkat, hkawngma tai kayin hkawm, yemase hta hkawm, nkau hpun dabang hkan, ja maw hkan e ningchyang tai hkawm, du hpanghkan n kau gaw tsi ya, hkatbung ya tai mat nna yawng ngu daram hten mat, len mat, si htum mat ai re law.

La San said...

Lakin Dai Gyung tsun ai grai teng ai lam hpe madi shadaw nngai. Ya mung Myen gaw Jinghpaw Wunpawng mung shawa ni matsan mat, sha na lu na n lu mat nna, myit kri n dung mat na, bai nna KIO/KIA hpe madi shadaw ai lam n nga mat na matu myit masin majan galaw nga ai. Dai gaw Myen a No. 1 yaw shada re. ShangLawt hpyen hpa padang dip na gaw nambat lahkawng masum kaw she rai nga ma ai. Dai majaw mung shawa matsan mat, ayai aya rai mat jang KIO/KIA ni majan naw matut gasat lu hkra hkyen lajang da ra na re hpe mu mada ai law. Aten dep dum hprang hkyen lajang ra na re.

Anonymous said...

Ndai laika ngau hpe madi shadaw ai.hpakant hpe kia ni lu up hkang kau hkra yawng bawm madi shadaw ga.myen nshang hkra di na,taiyintar sutdu lawlaw hpe shara jaw na galaw shaga.

Anonymous said...

matut na gap ding yang sha rai ra na re,.w sha ni a matu lachyum npru ai simsa lam hpe gaw w.p sha yawng tsep kop nra ai,hpakan uru seng maw hpe mung kakyi pi nmai tat sai,simsa lam la da ai ten j.p mani yemase pi nmai hta ai,bai nna company ni mung k.i.a hpe myen a wan sat dap ayanmitat hpe ram pi nhkrit ai hpa nsawn ai re, ya rai tim simsa lam la yang roi roi sha di na re,hugawng pa na lamu ga ega sen lam hpe nepidaw kaw na sha shadawn masat jaw dat ai gaw anhte j.p ni hpe myen sawa ni kade roi ai ngu hpe dai ginra na ni katut sha sai,anhte a lamu ga hpe ra ai hku di na hparan la,anhte myu ni hpe kam ai hku sat nat ai myen sawa ni hte naw pong na kun?tsep kop nmai sai...


Anonymous said...

Re law laika ka ai wa hte commant jaw ai ni tsun ai lam ni grai jaw ai. Lachyum n pru ai simsa lam hpe gaw galaw na hkum shakut manu awmdawm shanglawt she hpyi sa ga. N-gun naw ja ai wa-ngan ni hte ramma ni wp mungdan gasat la na lawan rawt sa ga. Hkum ung ang nga manu now is the time aten nan rai sai law. Rawt saga.....

Anonymous said...

HPAKAT ,PANGWA,GRAI AH HKYAK AI LU NAN LU RA AI SHARA NI RE.YAWNG JAWM SHAKUT MAKAWP GASAT RA AI RE NGA.
DAI KAW NA LUNGSENG NI HTE WP.MUNGDAN MAI GAW GAP LA MAI NA RE.

Anonymous said...

myen hte MIWA ni hpe jinghpaw mung kaw na gawt kau ga.

maran seng hpung said...

Myen mung a shang gumhpraw 2 law htum lu la ai gaw hpakan lung seng maw na re lam chye lu ai.dai re majaw n dai lung seng maw hpe gaw KIA ni tsep kawp lu madu ra ai.gap hkat jahkring dat ai hte gaw moi na zawn hpa n mai galaw mat na ra ai

Anonymous said...

Manu mana jaw dik ai sawn sumru mai dik ai ningmu re.anhte ningbaw ning la ni ndai hpe myit sawn dum ya na shadu ai.Asuya ngu ai myit jasat(Mindset) hte dai ni na shanglawt gaw sa wa ra saga ai.Yak dik ai gaw Du kaba ni salang kaba ni sha sut su mat ai myen ni a up hkang ai ladat hte hpa nshai ai shanglawt du kaba nkau myi a majaw rai nga ai.

Post a Comment