LIT LA YA NA WA NGA NGA SAI

KIA hpe bawngban na matu, NEPUDAW de hpyi galai Thein Tsing shaga ai lam na lu ai. Kaga baw sang law law the gap hkat jahkring nna, bawng ban ai lam law law galaw masai. Rai tim laklai ai gaw kadai hpe mung nepudaw de n shaga bawng ban ai wa KIA hpe chyu shaga ai lam gaw n tsa lam hku sha yu yang  grai arawng la na zawn rai nga ai. Baw sang ni yawng hta anhte hpe myi man jaw ai zawn rai nga ai. Raitimung nmai kam shut ai lu. Ndai gaw n tsa kaw numhkaw hprwi ,kata kaw hka lwi nga ai lu. Lahkawng lang n ga masu hkrum sai majaw, bai masu hkrum jang tinang a mara sha re. Bawng ban ai lam hpe shawng de galaw ai zawn, Miwa mung shing n rai ga jarik hkan galaw nna, maigan manam sak se lawm ra ai. Mai byin yang Asian n re, UN kasa lawm yang kaja htum re. Asian malawm ni gaw myen a pauk hpaw, shi ra galaw nna, hpaga yung ga lam hta manaw sha nga ai ni she re. Moi na zawn bawng ban ai hpe annau ni yawng myit hkrum ra sharawng ai. Myen a matu she dai Nepudaw gaw grai hkikhkam ai ngu mu tim anhte myu sha ni a matu Namdum the bung nna grai yat manam ai shara she re. Thing Sein shaga ai ngu ai gaw, shi the bawng na matu n rai, shi a lapye ni the bawng na matu sha re. Shanhte law law nepu daw ngu ai hpe grai hkik dum nna, KIA/O ni mung  grai tak kaba na shadu ai. Grai kam hpa na shadu ai. Shi the bawng na rai yang pyi hpyen dap daju naw lawm ra ai. Dai ni n lawm yang gaw, nmai kam ai. Nam dum she re. nepu daw de sa  na lam kachyi mi mung nnga ai.

Dai ni na ten myen gaw, Jum hkra ai gajin chyai zawn, pala hkra ai rawng ba zawn, Wp myu sha ni a n tsa n lu ka-up na masa pru wa ai majaw, kadau kadap, n ju n mu rai nga sai. Jinghpaw ni hpe masum ya the, bat mi the, shi ya the shamyit kau na nga gawng lai wa sai.Myenmung na hpyen la ma wa tim KIO hpe n dang, Asian ningbaw tai na ten ni wa tim, KIA hpe n dang hkraw, hpaga yung ga lam gade hpaw shangun mayu tim, KIA the simsa lam n lu hkraw, “magwi hkum lu lai nna num mai kaw shad au nga ai” ngu ai baw, mungdan ting galai shai nga sai nga tim, KIA a majaw mungkan de myiman n lu taw nga ai.KIA hpe gasat shangun ai hpyen la ni mahtang, jau gawng ladat the gap nna shayawm, bawm the hkam kapaw nna shayawm, mu achye sat nna shayawm, shada da gap hkat nna yawm, shi shi anga nga ai wan yam dum hpe sa gap kapaw la nna hpyen la yawm,sharaw dun nna mung yawm, yawm hkrai yawm mat wa ai myen hpyen la ni a majaw, hpyen dap de naw nga ai hpyen la ni, KIA hpe gasat n gwi mat nna hprawng ai ni mung law law, htawng rawng hkam ai ni mung law law,law hkrai law, law hkrai law, htum na maga rai nga sai. Myen du n kau mi sai hten nga ai ni mung nga masai. Gara hku mung shanglawt hpe nmai dang sai ngu ai ten du nga sai majaw, laknak the ndang ai majaw mahkam the hkam la na hkyen nga ma ai. Mahkam gaw a myu mi sha n re. Amyu hpan law law the hkam hkyen nga ma ai.  Ndai mahkam kaw na lawt na matu gaw myen a jinghku hku hkyen ai myi man n sam hpe tsan tsan kaw na koi yen ra na re. Myen atsu ya gaw American mung de Awng San kaw the thing sein ashawng ahpang rai sa hkawm ai a majaw, naw la taw nga ai ninggawn chying hka yawng hpe lu hpaw la na re nga myit mada nga ma ai. Shan the a hkri manam dik ai kraw shatsu hpe mungkan hpe up nga ai American ni n chye ai nga na i?.Anhte Wunpawng sha ni a madi shadaw ra sharawng ai lam nlawm ai gaw galoi mung la da ai chying hka ni hpaw lu na n re.  laiwa sai bawng ban zahpawng shagu kaw madun shatai lang sai 3step hpe matut nna ding ding hkan ra na re. Dai hkrang hpe wunpawng sha ni yawng ra sha rawng ai. Myit hkrum ai re. N dai 3step hpe gara hku mung n mai shayawm ai. Ja ja hkrem hkrem ngu dara  ga. Myit kaji n ra ai. Myit daw na lam nnga ai. Wunpawng sha ni yawng nanhte hpe madi shadaw nga ai. Grau nna gaw anhte maga Karai Kasang lawm nga ai. Jinghpaw wunpawng sha ni a garen gari ai hkrap nsen , myen sawa e n tara n ang ai hku zingri sat hkrum ai ni a jahtau ai nsen, masha ahkaw ahkang roi rip hkrum ai amyu shayi ni a hkrap shabam ai n sen, mara n kap ai sai hpe jahkaw ai mara ni hpe Karai Kasang na ya ai majaw, wunpawng sha ni hpe yesu a tsaw ra myit the hkye hkang mawai shaw la na  matu, n dai majan hpe shabyin dat ai re.

Dai re majaw, wunpawng sha ni a lit gaw, jahtawng n htu ai sawa a man e lahput n hput di ai, myi man ntam ai  sha ,tinang lu ai atsam yawng gaw yehowa Karai Kasang hpe ap nawng da nna, shi hpe kam sham let, Wunpawng mungdan ngu ai jan mau hpe sha aze mada let gasat sa wa ai rai yang, Wunpawng mungdan gaw anhte a lata kaw rai sana re. Dai majaw, Wunpawng mungdan shanglawt atsu ya a masing kata kaw myit hkrum lata hkun dun let hkum hkrit, hkum un gang, hkum mau nga. Gasat ga. Anhte hpe hpyen nga ai sawa ni hpe, Sharaw e garawt, mu mung achye, shada da mung gap si rai ai rum si ma ai lam ni gaw , ma hkra hpe dang di lu ai Karai Kasang gaw anhte wunpawng sha ni a matu lit la ya nga sai sak se nan re. Mungkan ting hta nga ai ai Wunpawng sha ni yawng Karai Kasang hpe sha manoi nna matut manoi akyu hpyi nga ga. Ndai ram law ai myen hpe gara hku dang lu na ,n law la ai wunpawng sha ni hpe kadai gara mungdan ni garum nna shang lawt lu wa na ngu ai hpe hkum myit, Hkum hkrit. Anhte n dang di ai lam hpe dang di ai wa anhte maga nga nga ai. Anhte hpe “lit la ya na wa nga nga sai”

Myu sha ni a sai hkyep

Agu Namti