Jinghpaw Mungdaw, Tsang Shi Awng Pru ai Madang Grau Tsaw Wa

Tsang (10) awng jahpan hpe, shawoi na hta jau nna, June 7 ya shani ndau lai wa sai hta, laklai madang ( distinction) hte, awng ai jawngma ni grau law ai zawn, Jinghpaw mungdaw a, awng ai madang mung grau tsaw wa ai lam chye lu ai.

Laiwa sai shaning hta awng ai madang 18% jan, daram sha nga ai kaw nna, dai ning gaw 30% jan mat ai lam hte, Jinghpaw mungdaw ting hta, Nam Mar ,LaHta Tsang jawng gaw, awng ai madang 59% jan hte, No. 1 shara, awng madang 56.46% jan hte, No. 2 shara hpe Myitkyina, LaHta Tsang jawng No.3 lu ai lam, Myitkyina na jawng sarama langai tsun ai.

Shi matut tsun ai hta, “Jinghpaw mungdaw ting hta, Distinction (6) hte awng ai marai (3), hte distinctions lu ai jawng ma ni grai law ai, Wunpawng jawng ma ni gade lawm ai re hpe gaw, hkrak re n chye shi ai” nga ai.

Ya na zawn Jinghpaw mungdaw sha n nga, myen mung ting na tsang (10) awng ai jahpan madang grau tsaw wa ai gaw, seng ang ai asuya ni nan, jawngma ni hpe myit shapyaw ai hku nna, dasang sha-awng jaw ai lam re hte, laika pa ni jep lajang ai aten kaw nna nan, sha-awng jaw na matu, seng ang ai kaw na matsun dat ai majaw re lam, dai jawng sarama , Kachin Today de matut wa tsun ai.

Shaning shagu Tsang (10) awng jahpan hpe, July shata hta ,ndau shapraw nga ai raitim, dai ning gaw shawoi shaning na hta jau nna June 7 ya shani hta ndau shapraw ai lam gaw, 2010 ning ra lata poi a matu hkyen lajang ai hku nna, dai ning na laika sharin shaning hpe , December shata ngut hkre hkra tau lajang ai lam re nga nna, shateng n lu ai shiga ni hpe, lakap nna chye lu ai.

KTG(USA)