Maj-Gen Gunhtang Gam Shawng hte gasan gahtai...

San:-(1) Myen Hpyen Dap hpa majaw KIA hpe Border Guard Force ( Ga Jarit Sin Hpyen Dap ) de galai kau mayu ai rai?

Htai:- Asan sha tsun ga nga yang, yet yet sha laknak bru la kau mayu ai lachyum sha re. Nye a ningmu hku nga yang, Miwa jarit (snr) Gala jarit ni hta balik bungli hta lai n’na hpyen bungli n nga ai. Miwa hte mung ahku ahkau, htinglup htingshang rai n’na nga pra nga ga ai she re. Hpyen byin wa na lam hpa n nga ai. Dai majaw jarit sin Hpyen Hpung tawn n ra, bungli hpa n nga ai. Dai majaw Jarit Sin Hpyen Hpung, Hpyen Dap ngu ai gabaw gaw bawnu ginsup ai lam sha she rai nhten ngu maram sawn ya ai.

San:-(2) Myen Hpyen Dap a Border Guard Force masing gaw Wunpawng Amyu Sha ni a Rawt Malan hpe kade daram dingbai dingna jaw mai ai rai?

Htai:- Myen Hpyen Dap a B.G.F masing hpe lama wa hkap la kau dat ai rai yang, Wunpawng Amyu Sha ni a Rawt Malan lam yang gaw Gam Maka n tsawm, Labau n tsawm ai hku tinang nan shabyin la kau dat ai hte bung mat na re. Hpa majaw nga yang, Mung Masa mahtai hpa mung n lu ai a majaw re. Dai ni du hkra mung masa tsun shaga bawngban ai lam tsep kawp rai n nga yu ai. Raitim, B.G.F masing hpe hpa baw rai nga ai lachyum hkawn hkrang ai rai yang Rawt Malan a matu n-gun pyi shabyin lu mai nga ai.

San:-(3) Myen Hpyen Dap a B.G.F matsun gaw KIA hpe galai shai kau lu na kun?

Htai:- Myen Dap a B.G.F galaw mu nga tsun pru wa lam hpe lama wa hkap la kau dat ai rai yang, KIA gaw Myen Dap sha tai mat n’na, KIA hkringhtawng n nga mat sana re.

San:-(4) Myen Hpyen Dap a B.G.F matsun du wa ai shaloi KIA ningbaw ningla langai hku n’na gara hku hkam sha ai rai?

Htai:- Shanglawt Hpyen Dap (KIA) a Dap Awn Daju langai mi hku n’na n-yun bu na zawn nga ai. Grai yu kaji, Yu shagrit, Grai Roi kau hkrum sai ngu ai hku hkam sha ai. Tsun ga nga yang, Myen Dap mung American, Miwa Dap, maigan hpyen dap ni hte gasat gala yu ai mahkrum madup nga yu ai n re. Anhte zawn re Rawt Malan ni hte gasat gala yu ai sha re. Hpyen mahkrum madup hku nga yang lak lai shai ai ni n rai ma ai. Shanhte lu ai "Thu Ra Boit" nga ai ni maigan hpyen hte gasat n’na lu ai n re. Anhte hte gasat gala ai kaw si hkrung si htan shakut kau ra ai majaw lu ai she rai malu ai. Anhte hte tsun shaga ai lam hta mung Rawt Malan ni hpe gaw "U" (Salang) ngu ai hku sha tsun shaga lang ma ai. Kaja wa tsun ga nga yang, lahkawng maga dang ai gasat poi hte sum ai gasat poi nga ai hkrai sha re. Rai yang, teng man ai lam hpe magap kau n’na maga mi hpe Mung Masa pandung n nga ai, lan su kabrawng jawng ai laknak lang hpung zawn Mungkan hte Mung Shawa hpe kam hkra galaw ai masa sha re.

San:-(5) Ya ten KIO hku n’na marai (7) lawm ai Dat Kasa Hpung hpaw nhtawm Myen Hpyen Dap a B.G.F matsun hpe jahkrup na hkyen nga ai. KIA hku n’na tinang Hpyen Dap kata hpyen masa hkyen lajang ai lam nga ai kun?

Htai:- Ya yang tsun shapraw ai baw n re majaw n htai na nngai.San:-(6) Lama KIA hte Myen Hpyen Dap majaw byin wa ai rai yang, KIA gaw kaning re ai ladat ni hte aten kadun, aten galu matai htang na rai?

Htai:- Htai n manu ai.

San:-(7) Jinghpaw Wunpawng Amyu Sha ting gaw ya ten hta KIA hpe Border Guard Force galai kau na hpe n hkap la ma ai. KIA hku n’na Amyu Sha yawng a matu gara madang du hkra tsap ya lu na rai?

Htai:- N’dai ga san hpe htai ga nga yang, Wunpawng Mungdan Shanglawt Hpyen Dap kaw n’na Mungdan hte Mungdan Sha ni a n’tsa e Hkam la ai Ga Sadi (5) a nambat (1) hta Mungdan hte Amyu, Mungdan Sha ni a n’tsa e Hta ni Hta na Sadi dung na, nambat (4) hta Asak Apnawng Mat Wa Sai ni a n’tsa Tut nawng Sadi Dung na lam hte (5) hta Galoi Mung Lak Nak N Jahkrat na ngu ai Ga Shaka tawn da chyalu re.

San:-(8) Ya ten hta lama KIA n nga taw yang, Wunpawng Amyu Sha Yawng kaning re ai gam maka de du wa mai ai rai?

Htai:- KIA n nga taw yang, Wunpawng Amyu Sha ni a Gam Maka gaw tinang a hkum makawp maga la na kawng n tu mat ai hte bung mat n’na roi kam ai hku roi sha hkrum ai amyu byin mat na re. Htunghking, Makam Masham, Laili Laika, Ga hte seng ai ahkaw ahkang lam ni grau ginlut tat sum mat wa n’na, Mungkan n’tsa e Mat Mat Ai Amyu Jahpan hta lawan du mat na shadu ai.

San:-(9) Mungkan ting nga Wunpawng Amyu Sha ni hku n’na KIO/KIA de shagun hpaji jaw laika ni gaw ya ten na mabyin masa a matu kade akyu rawng ai rai?

Htai:- N’dai lam hte seng n’na Mungkan ting hta ginru ginsa du nga ai Wunpawng Sha ni yawng a ra sharawng ai lam, dawdan ai lam hpe hkap la n’na shawng lam lahkam htawt na hku tinang Ginjaw kawn n’dau shabra lit jaw tawn chyalu re. Dai majaw Mung kata, Mung Shinggan nga pra nga ai Wunpawng Amyu Sha Yawng a lit mahtang re ai lam shaleng dat nngai.

San:-(10) Maigan de nga ai Wunpawng Amyu Sha yawng hpe KIA hku n’na tinang Amyu Sha Lawt Lu Lam Lu hkra gara hku byin shangun mayu ai rai?

Htai:- N’dai lam hte seng n’na:-

(1) Myit hkrum ai lak nak hte myit hkrum ai ninggang lang nga ga.

(2) IT prat re ai majaw n’dai laknak kaba hpe tang du hkra asung jashawn ga.

(3) Jinghku tam, Jinghku lu hkra galaw ga.

(4) Amyu hte Mung a Dan a ningsang magam bungli hta ra ahkyak wa yang ( ? ) ngu ai lam ni hpe myit nga, galaw nga chyalu rai na re ngu kam dat n’ngai.

W.K.O