KIA hpyenla ni nam shang hpang wa sai

Wunpawng Mungdan Shanglawt Hpung (KIO) gaw Myen a "Ga Jarit Sin Dap Galai Na Ningbawn Masing" hpe masa hku hkap la tawn tim, tinang KIA hpyenla ni gaw nam shang hpang wa sai lam, chye lu ai.

Ndai June shata praw kawn grau grau KIA hpyenla ni nam shang hpang wa ai rai nna, dai hta KIO/A ginjaw ginra rai nga ai, Laiza, Laisin Bum hte Mai Ja Yang grupyin ni hta hpyen n-gun grau jahtat tawn ai re lam, KIA shiga lawk kawn chye lu ai.

Manmaw buga masha langai tsun ai hta, lai wa sai bat lahkawng ram hta, Manmaw-Kai Htik mawdaw lam lapran e KIA hpyen hpung langai hpe moi ten shawnglam majan rawt ai zawn "di mala hka wan, n-gu hte sinat laknak hte hkrak rai" lai wa ai hpe mu hkrup nna, yu kajawng mat ai lam, tsun wa ai.

Ya ten, KIA hpyenla ni yawng hpe sinat kaja lang na matu hte tinang a dap ba, dap dung, shawnglam post ni hta mung, hkying hkum 24 yu sin maja na matu, KIA Dai Lawn Rung kawn matsun tawn sai lam, KIA shiga lawk kawn chye lu ai.Ndai zawn shajin wa ai gaw, KIA shawng Myen hpe htim gasat na matu n re sha, lama Myen hpyenla ni htim gasat wa yang, ninghkap gasat na matu she re lam, matut chye lu ai.lahkawng lapran na mungmasa manghkang hpe shawng n hparan ai sha, KIA hpe hkrang galai shangun ai lam gaw, lachyum n pru nna, n mai hkap la ai lam hpe, KIA Dap Awn Daju, Du Daju Gunhtang Gam Shawng tsun wa sai re.

Ndai ten, Myen matsun ai hku, KIA hpe "Ga Jarit Sin Dap" hkrang galai hpaw na hpe tsepkawp n hkap la ai lam, mungdan kata shinggan na J.W mungmasa hpung ni, Myen mung ting na J.W dakkasu jawngma ni hte mungchying mungmasha ni mung, KIO/A de hpaji jaw tawn sai, rai nga ai.

KIA gaw Myen mung kata na kaba dik amyu bawsang laknak hpai hpung ni hta, langai hku shanglawm nga ai re. Hpa majaw nga yang, KIO/A hta tinang J.W amyusha ni yawng ngu na madi shadaw shanglawm ai majaw, rai nga ai.

KNG