KIO gaw Tinang Dap Galai Na Lam, Myen a Ninggawn Masa Hpe Hkap La Sai

Wunpawng Mungdan Shawnglawt Hpung (KIO) gaw, tinang KIA, Wunpawng Mungdan Shanglawt Hpyendap, hkrang galai hpaw shabawn na lam n'tsa, Myen hpyen asuya a "Ninggawn Masa" hpe hkap la tawn sai lam, chye lu ai.Hpa majaw nga yang, ndai masa hpe hkap la ai majaw, KIO gaw Myen hte man hkrum bawngban na ginjang lu wa na lam hte maga mi de, ya ten simsa lam hpe garai naw n jahten kau mayu ai majaw re nga nna, KIO/A Tingnyang-up Malai 2, Dr. Manam Tu Ja tsun wa ai. Dr. Tu Ja matut sanglang dan ai hta, Myen gaw KIO hpe mungmasa lata na lam (2) tsun ai hta--- Myen tsun ai ga hku "Maha-byu-ha (strategy)" ngu ai Ninggawn Masa hpe hkap la yang she, de a npu e shi tsun ai ga hku "Ni-byu-ha (tactics)" ngu ai Zai Ladat kata shada bawngban hkat lu na masa hpe tsun ai re, nga ai.Lama, ndai Ninggawn Masa hpe n hkap la yang gaw, shada bawngban hkat na lam n nga mat nna, simsa lam mung asak htum mat ai hte shada bai gap hkat ra na masa de man yawng mat na re lam hpe Dr. Tu Ja matut sanglang dan wa ai re.Ndai lam hpe Myen gaw, KIO ningbaw ni hpe lai wa sai April 28 hte May 21 ya shani, Jinghpaw mungdaw mare daju Myitkyina mare na, Myen a Dingdung Daw Daju (Ma Pa Hka) e shaga zuphpawng galaw ai shaloi, tara shang tsun wa sai lam rai nga ai.KIO gaw Myen a Ninggawn Masa hpe hkap la sai raitim, Myen ra sharawng ai hku KIA hpe "Ga Jasit Sin Dap" hku, hkrang galai hpaw shabawn na lam gaw, tinang dapshawa mungshawa yawng hte sung sung li li bawngban jahkrup ra na re lam hpe Myen hpe tsun tawn ai lam, KIO ningbaw ni tsun nga ai re.Ya ten, KIO Tingnyang-up Malai 1, Dukaba Gauri Zau Seng woi awn ai, marai-sanit-ginjaw komiti hpe mung hpaw dat sai rai nna, dai komiti gaw KIA dap galai na lam hte seng nna, dapshawa mungshawa a hpaji jaw ga ni hpe hkapla let Myen hte bawngban jahkrum wa na re lam, KIO shiga lawk kawn chye lu ai.Bai nna, shawng de mung, Myen hte KIO lapran, simsa lam lapran salang tai ya wa sai, J.W Hkalup Hpung (KBC) a amumadu dingsa, Rev. Dr. Lahtaw Saboi Jum hpe mung, ya kalang bai "simsa lam lapran salang hpung" ningnan hpaw nna lapran salang tai garum la na matu, KIO kawn ga saw tawn ai lam, chye lu ai.Ndai ten, Myen gaw mungdan ting na amyu bawsang simsa lam hpung ni hpe "Ga Jarit Sin Dap" ni galai hpaw na de man yawng ai "Ninggawn Masa" hpe hkap la yang sha, shada bawngban jahkrup na lam tsun tim, kaja wa gaw mungmasa jahkrup na n re sha, dap galai na lam sha rai na re hpe KIO ningbaw ni mung myit sawn tawn ai lam, chye lu ai.Maga mi de, KIA hpyendap gaw, tinang a hpyen hprawng hprawng masha yawng hpe shaga gahkyin ai masing galaw nga sai rai nna, majan bai byin wa yang, KIO, KIA masha ni yawng mung gasat poi shang ra na lam hpe seng ang ai dap ba, dap dung ni de matsun tawn sai lam, chye lu ai. Ya ten, KIO/A kata, Jinghpaw mungdaw hte Lahta Sam Mung ni hta, masha n-gun yawng 20,000 jan nga ai lam, KNG kawn sagawn chye lu ai.KIA Dap Awn Daju, Du Daju Gunhtang Gam Shawng mung, ya ten Myen hte KIO lahkawng lapran na mungmasa manghkang hparan n ngut shi yang, tinang dap laknak jahkrat na lam hte "Ga Jarit Sin Dap" galai hpaw na lam hpe tsepkawp myit n hkrum ai lam, Laiza daju shiga lawk kawn chye lu ai.

Kachin News Group