KIO/KIA KATA HTA!!!!!

N'dai laman, Wunpawng Mungdan Shanglawt Hpung (KIO) gaw tinang a Wunpawng Mungdan Shanglawt Hpyen Dap (KIA) hpe State Security Force (SSF) ngu ai shingteng amying de galai shai kau mayu ai lam tsun pru wa ma ai. Myen Hpyen Dap matsun ai Border Guard Force (BGF) a malai zai ladat hte mung masa lahkam htawt sit ai lam rai na sai.

KIA hpe SSF de mying galai kau mayu ai lam hpe June 21 ya hta KIO a marai-7-datkasa komiti hte Myen hpyen dap ni hkrum shaga ai shaloi tsun shana ai lam chye lu ai. Myen hpyen dap a mung masa shadut wa ai hta hkan n'na KIA hpe shingteng amying galai shai wa yang lang mai ai mying ni hpe hpaji jaw na matu Wunpawng myitsu salang ni hpang de saw shaga ai lam ni hpe mung na lu ga ai.

Maram yu yang, KIO kawn Myen hpyen dap a BGF masing shadut wa ai hpe maga mi hku n'na mung masa lahkam htawt sit ai lam raitim, KIA hpe kaja wa nan shingteng amying galai shai kau mayu ai masa KIO ningbaw n'kau kaw nga ai hpe mu lu ai. N'dai hku masa rai wa ai gaw, KIA hpe BGF de galai kau ai na hpe gaw KIO sha n ga, Wunpawng amyu sha ting n hkap la ai majaw mung rai na sai.

Gara hku masa mi raitim, KIA hpe shinteng amying ningnan jaw let BGF ngu ai Myen hpyen dap a mung masa ginjang hpe tawt lai na ngu ai gaw, KIO a matu grai wa mi akyu pru na n mu ga ai. Hpa majaw nga yang Myen hpyen dap gaw KIA sha n ga, Myen mung na amyusha lak nak lang hpung yawng hpe BGF de galai shai kau mayu ai gaw, shanhte a 2010 ning hta ra-lata poi galaw let Myen mung ting hpe Myen hpyen du ni a prat dingsa up sha lu na matu maw mawn ai ninggawn masing kata na ahkyak ai lahkam langai rai nga ai.

N'dai lam hpe gaw Myen mung a mung masa lam hkaja nga ai ni yawng chye na shadu ai. Myen hpyen dap gaw ya ten hta Myen mung nga amyusha ni a ahkaw ahkang hte seng n'na mung masa lam tsun jahkrup na tsep kawp n nga ai sha n ga, 2010 ra-lata poi galaw ngut ai hpang pyi amyusha ni a lu la ging ai mung masa ahkaw ahkang hte seng n'na kade daram ahkang jaw na ngu ai gaw grai myit yu ra ai lam rai nga ai. KIA hpe ya ten hta shingten amying galai kau tim, Myen hpyen dap maga gaw hpa mung shayawm ya na n rai ai sha n nga, grau n'na pyi wa-nem roi wa mai ai masa rai wa chye nga ai.

Grau n'na, ya ten Myen hpyen dap gaw Karen rawt malan hpung KNU hpe shamyit kau lu hkra nga n'na hpyen n'gun kaba hte majan hpaw nga ai re. Dai hte maren, n'dai June shata 14 ya hta Srilanka gumsan magam Mahinda Rajapakse gaw Naypyidaw de du n'na Myen hpyen du Than Shwe hte hkrum sai. Dai shaloi Srilanka mung na Tamil Tiger rawtmalan ni hpe nau n'na shi ai ten hta sha shamyit kau ai lam ni hpe Myen hpyen dap kawn tsawmra mi hkaja la ai lam shiga hku chye lu ai. N'dai hpe yu yang Myen hpyen dap gaw Myen mung nga amyusha yawng hpe shamyit kau na gaw shanhte a ninggawn masing nan rai nga sai.

Maga myi hku rai yang, KIO matut asak hkrung lu na matu KIA hpe mying galai kau n'na Myen hpyen dap hte laja lana n byin hkra (majan bai n byin wa hkra) tau hkrau n'na mung masa lahkam htawt sit ai lam hpe galaw ai ngu shadu ai. Raitim, Myen hpyen dap gaw ya ten hta gara hku mi raitim Jinghpaw mung kata kaw majan kaba hpaw na lam n mu ai. Myen hpyen dap kaw mung mayak manghkang law law rai nga lu ai. KIA hpe lam amyu myu hku n'na dingbai dingna jaw na gaw ding yang galaw nga na ma ai. Myen hpyen dap a BGF plan hpe KIO sha n nga, Wa, Kokang hte kaga amyu sha hpyen hpung ni yawng mung n hkap la ai lam tsun da sai majaw, KIO hku n'na masing kaja hte lahkam na grai ahkyak nga sai.

N'dai zawn re mabyin masa lam hta, KIO gaw Myen hpyen dap hpa naw galaw matsun wa na hpe la nga ai n re sha, tinang maga na hkyen da ai lam ni hpe shawng lu lahkam da na mung grai ahkyak nga ai. Raitim, grin nga ai hpung langai a mying hpe masa langai a majaw galai kau na ngu ai gaw aten naw jaw ra na shadu ai. Hpa majaw nga yang, 2008 ning laman hta KIO ningbaw n'kau mi KIO hpe mying galai na matu maw mawn wa ai lam ni hpe anhte Wunpanwg amyu sha ni n hkap la ai majaw gara hku n mai byin nga ai.

KIO kawn KIA hpe mying galai kau n ra ai sha, mai galaw ai lam law law nga ai hpe mu lu ai. Ga shadawn, 2006 ning hta Du Kaba Dr. Tu Ja ningshawng let Mung Masa Bunghkan komiti hpaw wa n'na, 2008 ning hta Mung Masa Pranwan komiti hpaw let 2010 ra-lata poi hta shanglawm lu mai ai mung masa pati langai byin pru hkra gyin shalat wa ai lam gaw galai shai wa na masa langai hpe htap htuk ai hku mung masa lahkam wa ai re hpe mu lu ai. N'dai mahkyen hta KIO a mying galai kau n'na, mung masa pati hpaw na n re ai hpe mu lu ai majaw, lama n'dai masing awng dang ai lam n nga tim KIO a matu hpa akyu sum na lam n nga ai hpe maram lu ai.

Ga shadawn, Myen hpyen dap ra sharawng ai BGF hpe KIA a uphkang ai n pu kaw tawn da lu ai lapran hpyen hpung (Proxy Troop) langai hku hpaw ninghtan lu yawng manu na shadu ai. N'dai Proxy Troop hpe volunteer hpyen ma ningnan ni lahkawn n'na, BGF hta shanglawm na masing lu jahkrat ai rai yang, KIA mung mying galai n ra ai sha n nga, amyusha rawtmalan hta naw shamu shamawt mai na shadu ai. Lama n'dai masing galaw yu n'na awng dang ai lam n nga tim, KIA kaw machyi hkra na lam nau n mu ai.

Kaning re ai mahkyen mi rai rai, grau ahkyak ai gaw KIO hte KIA lapran na daru magam hpareng hkat na masing masa rai nga ai. Myen hpyen dap a matsun BGF gaw KIO hpe shamat kau mayu ai majaw KIA hpe Myen hpyen dap n pu de du wa hkra maw mawn ai lam re. Shaning 40 ning jan Wunpawng amyu sha yawng lawt lu lam matu rawt malan galaw wa ai KIA hku n'na gaw Myen hpyen dap ra sharawng ai matsun a majaw amyu sha ting a rawtmalan hpe hkring sa mat na ngu ai gaw gara hku mung mai byin ai lam n rai nga ai. Dai hte maren, KIO a matusn ai majaw KIA mying galai ra wa na ngu ai mung nau n htuk nga ai.

KIO gaw KIA n nga yang dai ni Myen hpyen dap hku n'na ahkayk la n'na shaga na lam hpa n nga ai. KIO hte KIA gaw langai sha re ai, Wunpawng amyu sha yawng a rawtmalan hpung hte hpyen dap rai nga ai. Raitim, n'dai zawn re ten hta grau ahkyak ai KIA hpe makawp maga na gaw ahkyak kaba rai nga ai. KIO hku n'na Wunpawng amyu sha a mung masa ahkaw ahkang shaga mai ai Myen mung atsuya ningnan byin pru ai ten hta she mung masa lam atsawm galaw yang htap htuk na maram lu ga ai.

Ya ten hta gaw KIA a gam maka hpe KIA magam gun dap shawa hte Wunpawng amyu shawa hpe daw dan shangun na madung tawn ra saga ai.

TKP