Hpa majaw Ramma nkau mungdan ningbaw ningla ni byin tai wa lu ma ai kun? Sha-ip tawn ai hpaji lang ma ai kun? Myit lawm ai hte hkaja wa yu ai shaloi, tinang tsap nga ai jut kaw na loi li chyan mu mada ya ai Ramma nkau a atsam hte seng nna tang madun dat nngai.
U hpung langai, amyu baw sang langai, snr. mungdan langai hpe woi awn sa wa lu na matu, yu yang she loi timung, ta tut kaw kade yak ai hpe jawm mu wa saga ai. Lai wa sai ten ni hta, Ramma nkau gaw dai zawn rai yak ai kaw na tawt lai wa let mungdan uphkang ai ningbaw ningla ni byin tai wa lu masai. Law malawng, dai ni na Ramma ni gaw hpawt ni na ningbaw ningla ni re, nga nna tsun ma ai. Raitim, Ramma nkau a ningmu hku rai yang, dai ni na Ramma ni gaw, dai ni na ningbaw ningla ni re, nga nna hkam la nga ma ai. Dai lam hte seng nna Thai mungmasa lam hpe maram yu yang, 1932 ning kaw nna hpyen du kaba ni langai a hpang langai mungdan up ai ahkang aya hpe zing la hkat ai ladat hte mungdan hpe uphkang wa ma ai. Dai majaw hpyen du shada ntsen hkat ai hta n-ga, mungmasha yawng gaw hpyen du ni uphkang ai hpe nra sharawng ma ai. Hpyen du ni uphkang ai kaw na lawt wa lu na matu ladat amyu myu hku nna shakut wa masai raitim awngdang ai lam nlu wa ma ai. Hpang jahtum e shada ntsen hkat, gasat hkat, power zing hkat ai myit hpe koi yen kau nna, hpyendap, mungmasha hte mungmasa la ni yawng a matu akyu jaw lu na ladat hpe lang wa ma ai. Dai majaw mungmasa la ni hte hpyen du ni gaw power garan lang ai ladat hte shanhte a lapran na dang-rang hkat ai lam hpe jasim kau lu manu ai. Dai hpang angwi ngwi, hpyen la ni hpe mungdan a shim lam hta sha lit la ai de shanang wa shangun nna, mungmasa la ni gaw mungdan uphkang ai de shanang sa wa lu ma ai rai yang, dai ni na ten hta mungdan kata kaw simsa lam, tara lam hte democracy lam a madang ni hpe shatsaw wa lu nga masai.
Thai mungdan kaw Ramma ni, wan lam hku law htam nga ai kaw na, ABHISIT VEJJAJIVA gaw Democrat party a ningtau ningbaw byin wa ai rai yang, ya gaw party ningbaw bai byin wa sai. 2004 ning na Bangkok governor ra lata poi kaw, APIRAK KOSAYOTHIN (Demorcat party member) gaw governor byin wa sai. Ya kalang Democrat MP rai nga ai APHIMONGKOL SONAKUL hpe Party Spokesman hte Deputy Secretary-General shara kaw tawn na hkyen nga masai. Dai zawn rai lam shagu hta hkrat nem wa nga ai Democrat Party hpe angwi ngwi bai sharawt la lu na matu myit jasat hta htoi kabrim ai Ramma ni kaw nna matut woi awn sa wa hkyen nga masai. Myit dam lada nna kanawn mazum lam, maigan makyit mahkai lam, sut masa lam hte mungmasa lam ni hta sumtsan mu ai Ramma ni gaw shanhte a party kaw hpung shang masha law wa hkra lam tam shakut magang wa nga masai. Shanhte galaw sa wa nga ai ladat gaw kasi la shakawn shagrau ging ai hpaji rai nga ai.
Shanhte gaw mungmasa lam hta mahkrum madup law sai ni kaw na azin ayang hkaja la ma ai rai nna, woi ningshawng ai hta, jaw ai hte shut ai ladat ni a ntsa e mung, htap htuk ai ningmu hte shen maram chye ma ai. Mungdan langai a democracy madang hta hkan nna ladat langai gaw aten langai kaw lang mai timung, kaga aten langai de du wa ai shaloi lang nmai ai lam; Raitim, kaga ladat langai gaw, aten langai kaw tsep kawp lang nmai ai raitim, aten langai de du wa ai shaloi akyu jashawn na matu htap htuk ai ladat byin nga chye ai lam; Shara nkau kaw tara hku nna mai kaja tengman ai policy lang ma ai raitim, shara nkau kaw gaw htap htuk ai mahkrun hpe mahtang madung tawn ma ai lam mu chye lu ai. Dai Ramma ni gaw, sumprat ga manaw hte hpraw san ai yaw shada lam ni a ga manaw ni hpe ginhka lu ai atsam rawng ma ai majaw, shanhte hpe shingna shatai ngut ai hpang jahten sharun hkyen ai masha wa a zai ladat hpe tau nna koi yen kau lu ma ai.
Shanhte gaw marit la na zawn nga ai ga ngwi ga pyaw, ja gumhpraw, arawng aya zawn re ai ni hte shalen timung, shanhte a myit hpe lam numshe de nlu gang bang la ma ai hta n-ga, nang hpam malu masha, mungkan a pyaw hpa lam amyu myu hte hkalem yu timung, shanhte a myit hpe shamu ya nlu nga malu ai. Dai majaw shanhte a lawu tsang na lit gun ni hte grup yin na mungmasha ni gaw shanhte a ntsa e kam hpa ai lam grau kaba wa nga ai.
Dai Ramma ni gaw, shanhte a ningbaw ningla wusa ni kaw na power kashun la ai nrai. Seng ang ai masha ni kaw na shanhte hpe power ap nawng ya wa na matu shanhte a atsam hpe madun lu ma ai majaw uphkang ai ahkaw ahkang gaw shanhte a lata de du wa ai hpe mu lu ai. Shanhte a ningbaw wusa ni woi awn du nga ai madang hpe ngang kang ai npawt nhpang shatai nna shanhte a ningmu, atsam nnan hte grau tsaw ai shawng lam de woi lahkam sa wa lu na matu ladat shaw chye nga ma ai.
Mungdan hpe shanhte yaw shada tawn ai hte maren gaw-sharawt la lu na matu gaw, shanhte hta galaw lu na ahkaw ahkang shawng lu ra ai. Dai zawn re ai ahkaw ahkang lu na matu gaw, mungdan ningbaw ningla shawng byin wa ra ai. Dai Ramma ni gaw arawng aya hpe marit nna galaw ai nre. Mungdan hpe gaw-sharawt sa wa lu na matu yaw shada let mungdan ningbaw ningla atsang de lung wa ra sai, ngu ai hpe hkam la nga ma ai. Dai zawn re ai ningmu a majaw lahta de tsun wa sai Ramma marai 3 gaw, party ningbaw madang kaw du hkra lahkam lung wa lu masai. Dai madang hpe ngang kang ai npawt nhpang shatai nna mungdan ningbaw madang de du wa lu hkra grau dam lada ai ladat ni shalat wa nga masai. Kahkyin gumdin ai lam gaw ngang kang ai npawt nhpang re, nga nna hkam la ai hte maren, ta tut kaw awngdang wa hkra shakut nga ma ai.
Lai wa sai aten na party ningbaw wusa ni gaw, ninghkap hpung (opposition party) rai nga ai hte maren, asuya galaw ai gaw, kaja ai mi rai rai, n kaja ai mi rai rai, shanhte a lit gaw asuya galaw ai hpe nighkap jahpyak ra ai hku nna hkam la let shadik shatup wa masai. Raitim dai Ramma ni party ningbaw lit la wa ai aten kaw nna, asuya gaw mungdan a matu nhtap htuk ai bungli galaw nga sai, ngu nna mu ai shaloi hpraw san ai myit hte tsun sharai hpaji jaw ai hte maren, htap htuk dum ai bungli ni a ntsa e hkan madi shadaw ai lam galaw wa masai. Dai shaloi Hkringmang Daju wa gaw, “Kadai raitimung, mungdan a matu mai kaja ai lam galaw ai wa hpe madi shadaw na”, nga nna tsun wa ai. Mungmasha ni mung, party ningbaw byin wa ai Ramma ni hpe jawm shakawn wa nga masai. Ndai zawn rai mungdan ting a matu akyu rawng ai ladat hpe woi shalat nna ta tut woi awn sa wa lu ai magam bungli kaba a ntsa e la kap nna, dai ni na Wunpawng Ramma ni gaw, anhte a ji woi ji wa, hpu ba hpu shawng ni woi awn du da ai mungmasa madang hpe ngang kang ai npawt nhpang shatai la let, ngwi pyaw simsa nna rawt jat ai mungdan atsang de du wa lu hkra woi awn sa wa na ma ai hpe kam hpa let tang shana dat nngai rai.
JJ Lum Dau
0 comments:
Post a Comment