Slideshow Image 2

LAIZA HKRAT SAI NGA AI SHIGA TENG A NI?

2012, July 24 ya shana na DVB-TV shiga hta "Laiza hkrat mat sai da!" nga ai shiga mi gale pru wa ai nga nna, jut shagu na ni phone hte san garu wa ma ai. Laika ka ai wa gaw daini sha Laiza Alenbum ntsa e, Shanglawt ni hte kabu gara mani shaga alum ala wora lera tsun jahta let, shana maga rai jang, Ja Nga Run Lusha Seng kaw hkru hkru kang kang jawm lu sha la nhtawm,  ndai laika ka ai ten hta gaw, Miwa Gumsan Mungdan, Yinjiang mare, Yinmau hotel e rai nga nngai. Shing mi nga ai shiga a majaw, loi pyi n mai byin ai hpe chye chyalu, daini ting rau nga kau da ai Du Kaba langai hpe phone hte nhtang san gintan la hkra di nna lawu na hte maren maumwi langai hkai chyai ai gaw, phone mung kahtet, lata mung kahtet, na mung kahtet mat hkra rai saga ai.

Moi na Jinghpaw salang ni hkai ai mateng maumwi  langai hta, kabung grai dum kut ai kahtawng mi nga ai da. Kabung dum lu na matu gaw masha si yang she mai dum ai. Masha si ai gaw n nga hkraw; kabung gaw hpa n dum rai kabung dum kut taw masai da. Raitim dai kahtawng e, nhtoi tsawmra mi machyi makaw hte yupra e kaleng taw nga ai la langai mi gaw nga ai da.


Kabung grai dum mayu ai mare masha ni gaw, du e bau langai hpra gali lang nna dai machyi ai wa a nta de lanyan sa ma ai da. Marai mi gaw, Hkau ni, nanhte ndaw e naw la nga mu; ngai shawng nhku de lanyan shang yu na. Machyi ai wa nsa hti jang gaw, ngai bau nsen sharat da na;. Shaloi nanhte dum let manawt let yan shang wa marit, ngu htet da ai da. Moi na Jinghpaw nta ni gaw asin amun re majaw, shinggan kaw na shang wa ai wa myi nau n mu; nhku e na na rawng taw ai wa mahtang gaw mu lu nga ai da.


Dai  wa gaw asin amun re ai kata e machyi ai wa lama garai n si ai rai yang, dum chye kau na hpe mung hkrit let, lanyan masem yu ai nga yang, makau na shadaw hta arut hkrup nna bau nsen sharat kau dat sai da. Ndaw e la nga ai ni mung, machyi ai wa si sai majaw, bau nsen sharat ai rai sai ngu shadu let,  "Darut... Ting... Darut...., Darut... Ting... Darut" nga nna kabung bau dum garu, ka manawt jahtau wau garu let yan shang wa masai da.


Shaloi machyi kaleng taw nga ai wa gaw, ngai si pyi n si yang me,  kabung dum yan shang wa ai, ngu pawt let, kahkan rawt nna nhtu hte htim kahtam ai majaw, lanyan shang chyan mada ai la wa hpe kahtam sat kau nu ai da. Shing rai machyi ai wa mi n si tim, lanyan shang yu ai wa si sai re majaw, kahtawng masha ni kabung lu dum masai da. Machyi ai wa mung, kajawng htuk nna mai tsai mat nu ai da.


Dai hte maren, daina na lu ai shiga mung, Laiza hkrat mat jang gaw, kabung lu dum na hpe ra marit myit mada ai ni mi hkoi nga dam kun? Shut na lu yaw! Sadi ga. Laiza mare makau mayang Myen hpyen sawa ni  nga ai nai htu hkan tam sha hkawm nga ai shiga mung teng ai. Laiza hpe gaw machyi kaleng taw nga ai wa hte mung sawn shabung mai nga sai. Daini ting gaw sinat ngoi ai nsen mung n na ga ai. Miwa hkran Laiza hte Yinjiang lapran taxi ni bus ni htaw htaw ya ya kahkrang nga ma ai. Myikyina Thainghmu Zay Yar Aung ngu ai wa, Laiza de she manap shat wa  sha na nga ai ga mung na jin sai. Laiza gaw n hkrat nna Naypyidaw mahtang shawng hkrat na hpe tsang ya ai lu yaw! Kabung bau kayin gale dum ra na hpe mung naw shingran tawn yu mu yaw....

Shadan Awng
Yinjiang.

8 comments:

shatapru masha said...

Ndai zawn nga mau dup dup let tsun dan ai majaw grai chyeju dum sai yaw...

Anonymous said...

Grai manu dan ai ga shadawn mau mwi rai nga ai, n-dai zawn nga mau mwi an-hte myu sha ni hpe law law naw hkai dan ra nga ai,manang hpyen ni shi ga dap ni a si mai mu sha na matu shanhte a shiga shapoi lamang hpe n-gun jaw taw nga ai ni mau mwi n-dai kaw na atsawm sharin la ga, maigan wa a shiga dap hpe n-gun n-jaw ya ga, tinang a shiga dap ni hpe she n-gun jaw la ga

Anonymous said...

Grai chyeju dum ga ai looo

Anonymous said...

N DAI ZAWN GA SHAGAWP, GAW.. JING HPAWLAIKA HTA

Anonymous said...

N DAI ZAWN GA SHAGAWP GAW ,MYEN .ENGLISH .GA SI HKU KA LU JANG GRAU MAI NA KUN?.GRAI MANU DAN AI GA SI NI RE AI MAJAW LEE..HTAWM HPANG E .MUNG WP MYU SHA NI A MATU HPAJI LA GING AI GA SI GA NGAU NI LAW LAW LU KA U GA.KYUHPI YA NGA YAW..

Anonymous said...

Jinghpaw kasa hti nga ai hpu nau ni hte maigan Ga kaw du nga ai hpu nau ni hpang de myit yu let mai byin yang gaw kalaw sa wa yu ga i?
Dai gaw...BBC myen shiga,DVB shiga laga myen shiga ni a ginjaw de ph: hte shanhte na Voice message hta ya na majan a lam teng man ai shiga hpa majaw ntsun ai ni,ndai majan hte seng na hpa majaw nshana na re lam ni hpe myen re majaw myen ni sum taw nga ai majaw nshana ai re kun ? ngu na ph: set di jawm bang da da re jang ndai shiga dap ni nhkam lu na shadu ai.gra hku law hpu nau ni,marai langai lani myi kalang sha pyi maigan du jinghpaw myusha hpu nau ni jawm sa tsang jang gaw gara hku law...bai htai ya marit,mai byin yang gaw jawm kalaw sa wa yu ga lam amyu myu hku na myen hpe adawt ai hku le

Lm,Nawja Christu a magam hta said...

Ngai kam ai wunpawng mungdan ngu ai gaw laksan KaraiKasang shaman Chyeju jaw tawn ai mungdan re majaw dai hku sha di n na gaw hten za mat na n re KaraiKasang A ahkang sha nlu yang gaw gara hku mung hten za na n re ngu 100% tup hkrak kam ai hku re .Dai majaw matut n na mung KaraiKasang Bausin makawp maga u ga matu aKyuhpyi shaja nga ai re .Grau n na mung Shaman Chyeju lu ai mungdan rai u ga . . . . . . . . KaraiKasang a bausin ai chyeju tut nawng gring nga u ga ! Amen .. . . .

joilu said...

Lai Za hkrat na n hkrat na hte kaga Myu sha lam yawng hte a awng dang lam gaw anhte a makam masham hte anhte a myit yaw shada ai ni lam hte matut mahkai nga ai. Karai Kasang gaw shi hpe kade kam hpa let myu sha lam hpe shi a lata kade ap nawng ai, shi ra sharawng awng ai hku nna myu sha a shawng lam yaw shada ai lam ni hpe yu nna she awng dang hkra lawm ya ai lam galaw nga ai re. Dai majaw anhte a makam, anhte a myit yaw shada hte tatut shakut shaja ai lam myit hkrum ai lam ni yawng gaw awng dang lam a matu ahkyak dik ai hkrai rai nga ai majaw tinang a makam hte myit jasat jaw jaw hte gasat poi shang ga, ngu n-gun jaw dat nngai law.

Post a Comment