Amyu kaji, Amyu kaba hte seng nna, masha nkau mi gaw, masha jahpan grau law htam ai amyu ni hpe gaw amyu kaba nga nna tsun nhtawm, masha jahpan nlaw nhtam shi ai ni hpe gaw amyu kaji nga nna tsun ai hpe na lu ga ai. Ndai zawn hkamla ai ni gaw daini myen mungdan kata kaw masha jahpan grau law ai myen amyu (myen asuya) hpe gaw amyu kaba lailen lang ai nga nna tsun ma nhtawm, masha jahpan nlaw shi ai laga amyu bawsang ni hpe rai jang gaw amyu kaji ni nga nna tsun ma ai. Ndai zawn hkamla yang gaw grai shut ai lam rai nga ai. Amyu kaji, Amyu kaba ngu ai gaw masha jahpan law nlaw hte hpa nseng ai, masha jahpan grau law ai hpe madung tawn nna amyu kaba ngu tsun ai gaw grai shut ai lam rai nga ai. Amyu kaji kun? Amyu kaba kun? ngu ai hpe gaw, shi a lata tut sak hkrung hkawmsa,tsun shaga ai lam hte yawshada alam ni hpe hkrang shapraw mat wa ai shaloi, de a ntsa e mahtang yu ginghka la ai gaw madung rai nga ai. Dai majaw daini myen mungdan kata hta masha jahpan grau law nna lata tut woi awn taw nga ai MYEN ASUYA GAW AMYU KABA LAILEN KUN? AMYU KAJI LAILEN KUN?.
- Amyu kaba ngu ai ni gaw laga Amyu a ntsa e mung galu gaba chye chyang kunghpan lawhtam shangun mayu ai myit rawng ma ai hpe mu lu ai. Ga shadawn Englik ni gaw, Anhte zawn re naw kaji kadun nga ai ni, myi nhpaw na nna shi ai ni, laili laika nlu shi ai zawn re ni, Karai Kasang hpe rai nlu la shi ai zawn re ni, Lama na amyu htum hkyem mat wa na zawn re ni, matsan mayan n-nyi nkri hkrum nga ai ni yawng a ntsa e amyu n-ginghka ai sha myit galu kaba ai hte pawnba la, shading sharai la, lam madun la chye ma ai.
Dai rai yang daini myen amyu ni gaw myen mungdan a Asuya nga nna woi awn nga ai shaning 64 ning jan sai. Anhte nlaw nhtam shi ai myu bawsang ni a ntsa e lata tut hkrang shapraw taw nga ai yawshada lam ni gaw AMYU KABA LAILEN KUN? AMYU KAJI LAILEN KUN?. Anhte zawn rai nna naw kaji kadun nga ai ni, nlaw nhtam shi ai ni hpe lakawn la na gaw hkum tsun sa, galaw she htum mat na matu ladat amyu myu shaw nna Amyu shamyit taw nga ai myen asuya gaw tsep kawp amyu kaba nre. Grai gyipgyeng ai satan a-jet she re. - Amyu kaba ngu ai ni gaw tinang hpe mara madi madun jang, Shut ai lam madi madun jang, atsawm sha myit yu nhtawm bai shading sharai la na matu hkamla chye ma ai. Dai rai yang myen asuya gaw mara madi madun jang, shut ai lam madi madun jang shading sharai la na matu hkamla nga ma ai kun?. Hkamla na gaw hkum tsun sa, Madi madun ai wa hpe madaw htawng bang na matu nhtang hku mara lu hkra tam nna adup zing ri ai ni rai ma ai. Ga shadawn Lahtaw Brang Shawng hte seng nna yu ga nga yang shanhte myen asuya ni mungmasa manghkang hpe mungmasa hte nhparan ai a majaw byin wa ai majan kaw nna shimlam lu na matu shanhte asuya ni uphkang ai ginra de shanu shingbyi nga ai masha hpe mara tam adup zingri ai gaw amyu kaba asuya nre ai lam grai dandawng nga ai. Bai langai mi gashadawn tsun ga nga yang 2008 ning hta shanhte myen hpyen asuya ni hkrai shanhte ra sharawng ai hku ka lajang tawn ai Constitution hpe gram galai na matu myu bawsang ni yawng madi madun ai raitim gram galai na matu hkamla ai lam nnga ai. Ndai constitution gaw laknak lang rawtmalan ai ni hpe nhtang hku mara tam na matu san san sha rai nga ai.Ndai zawn re myen asuya a yawshada lam gaw AMYU KABA LAILEN KUN?.
- Amyu kaba ngu ai ni gaw sadi dung ma ai. Gashadawn England asuya gaw tsun da ai lahkawng maga a myit hkrum gasadi hte maren 1997 ning hta Hong Kong hpe Miwa asuya a lata de bai ap ya sai. Dai rai yang myen asuya gaw Panglung Gasadi a ntsa e sadi dung ai kun? Myit hkrum tawn da ai Panglung Ga sadi hta, Myu bawsang ni yawng hkyawm lawm ai munghpawm mungdan gaw gap na matu, Amyu n-ginghka ai maen mara ahkaw ahkang hkamla lu na matu, Munghpawm mungdan shanglawt lu ai hpang 10 ning na jang ga garan pru mayu yang ga garan pru lu na matu,ndai myit hkrum lam ni a ntsa e langai mi pyi sadi dung ai lam nnga ai. Sadi ndung sadi run ai hte seng nna tsun jahta pyi nkam mat sai. Mala la ahkri nan ngu nngai.Ndai gaw AMYU KABA LAILEN KUN?
- Amyu kaba ngu ai ni gaw masha wa tsun ai ga hpe manu chye shadan ya ma ai. Gashadawn, nye a mahkrum madup hku tsun ga nga yang ya ngai du taw nga ai Sweden kaw na Sweden masha shanhpraw ni law malawng gaw, Ma kaji ni tsun ai mi rai rai, Gumgai dingla ni tsun ai mi rai rai, matsan ai wa tsun ai mi rai rai, Lusu ai wa tsun ai mi rai rai, Arawng sadang hte ahkaw ahkang tsaw nyem madang n-ginghka ai sha, tsun wa ai ga ni hpe atsawm sha htum hkra shawng madat la chye ma ai. Lama na atsawm nna kun rai jang gaw bai gahtap san wa ma ai. Bai langai mi gaw 1982 ning hta Ja Hta mare kaw Ningbaw Kaba Brang Seng mung lawm hkra rai maiwang shachyut jaugawng gawng ga ai. Mare masha ramma nkau mi gaw gwi hte hpa hte rai marawn jahtau shachyut na hku, Ningbaw Kaba hte anhte kau mi gaw chyahkyi shannga ni pru wa na maga de hkap na hku, Dai shaloi ngai ningbaw kaba hpe tsun ai, Dingla e nang ndai kaw hkap u.., ngai gaw aw ra maga hkyet de sa hkap na ngu tsun ai shaloi Ningbaw Kaba bai tsun ai gaw, maisa ma Brang ndai shara kaw gaw nang she grau chye na re nga a-tsawm sha bai tsun wa ai. Tsun mayu ai gaw amyu kaba myit myit ai ni gaw masha wa tsun ai ga hpe manu chye shadan ya ma ai. Gawngba ai myit, Raidum ai myit, masha hpe yu kaji ai myit ni nrawng ma ai.
Dai rai yang ndai ten hta myen asuya a ntsa e maram yu yang, masha wa tsun ai ga hpe kachyi mi pyi manu nshadan ai lam hpe mu lu ai. Wunpawng Mungdan Shanglawt Asuya KIO/KIA hku nna nmai byin ai hpe hpyi shawn taw nga ai ni nre. Lamu kanghkau ntsa na shata shagan wa di hpai ya marit ngu nna hpyi shawn taw nga ai nre. Daini Annau ni hta ra nan ra taw nga ai, Lu nan lu ging ai (Panglung Gasadi, Self Determination) hpe hpyi shawn taw nga ai ni she re. Raitim myen asuya gaw annau ni hpyi shawn ai ga hpe manu n shadan ya ai hta n-ga.., gwi kyi langai mi wau taw nga ai daram hku pyi nsawn ya ai. Ndai zawn re myen Asuya a myit jasat gaw AMYU KABA LAILEN KUN?. - Amyu kaba ngu ai ni gaw masha a du, baw, asak hpe grai manu shadan chye ma ai. Shinggyim masha ni a asak hkye la ai bungli hpe she galaw ma ai. Ntara ai ni, Nhkru nkaja ai ni, matse labye myit rawng ai ni, hpe chyawm gaw shanhte hte gingdan ai mara hte maren jeyang ma ai. Dai rai yang daini myen mungdan kata kaw du, baw, asak hkrat sum mat wa sai ni a ntsa e atsawm sung sung sawn maram yu yang, myen asuya gaw shinggyim masha a asak hpe kachyi mi pyi manu n shadan ai hta n-ga mana maka nhkru nkaja ai matse labye satan nat tsasam amyu langai mi hte bung nga ai. Gap gasat jahkring tawn da sai hpe mara tam nna wa htim gap hpang wa ai mung shanhte, Shanhte chyawm gaw myen mungdan kata kaw nga ai laga amyu bawsang ni ma hkra hpe shamyit shamat kau na masing nan jahkrat tawn ai re majaw grai kam gasat na ma ai. Raitim KIO/KIA gaw grai kam nna gasat nga ai ni nre. Shanhte myen asuya ni nan amyu shamyit masing hte nan mara tam nna htim wa ai majaw hkap ninghkap ai she re. Anhte gaw shanhte a lawu myen mung de sa htim gasat ya ai ni nre. Majan hpe bai jahkring ga nga ai mung shanhte, Shanhte hku nna majan bai jahkring ga ngu ai gaw, Grau kaba ai majan bai baw na matu hpaila tam, mara tam ai bungli sha re. Hpa majaw nga yang Annau ni lu la ging ai ahkaw ahkang jaw na ga pyi tsep kawp ntsun ai. Gap gasat shawng jahkring ai hpang she jaw na ngu ai ga mung nmai kam ai. Annau ni hpe myen amyu ni masu ai gaw Bochok Aung San a prat kaw nna daini du hkra re, Galoi du hkra naw masu na kun? ngu na lam sha nga ai. Htum nhkraw ai masu kanu ni nan rai ma ai. Ndai zawn re myen asuya hpe AMYU KABA LAILEN NGU NA KUN?:
- Amyu kaba ngu ai ni gaw, hpa baw manghkang mi rai rai, byin wa ai manghkang kaji kaba ma hkra hpe masin machyu nna n-gun la ba hte shawng hparan ai lam n-galaw ai. Byin pru wa ai manghkang gaw hpa majaw byin pru wa ai kun? ngu ai manghkang a ningpawt hpe shawng alai shapraw nna hparan mat wa ma ai. Dai rai yang, myen asuya gaw, Daini Annau ni hpa majaw laknak lang Rawtmalan wa ai manghkang a ningpawt hpe shawng n alai nna hpyen n-gun la ba hte hkrai hparan taw nga ai gaw AMYU KABA LAILEN KUN? Bai nna byin lai mat wa sai 1988 ning na mungdan kata mung masha ni ninghkap gasu gabrawng wa ai manghkang hpe mung, sinat laknak nlang ai mung masha hpe majoi gap sharu kau ai.
- Amyu kaba ngu ai ni gaw, shada mara raw hkat ya lu ai lam hpe simsa lam a ningpawt ninghpang n-gun kaba re ngu ai hku chye na hkam la ma ai. Amyu kaba langai byin wa lu na matu mung shada mara raw hkat ai lam gaw ahkyak dik ai hku chye na hkamla ma ai. Dai rai yang, myen asuya gaw 2001 ning hta Annau ni a myitrum share shagan ni hpe Dap Ba (4) kaw mara kata majoi wa sat sharu kau ya ai. Dai hpe Wunpawng Mungdan Shanglawt Asuya gaw simsa lam hten mat na nra sharawng ai majaw matai htang ai lam n-galaw ai. Mara raw ya ai. Dai hpe myen asuya bai rai jang gaw nhtang hku chye na hkamla ma ai. KIO/KIA gaw hkrit ai majaw asum jaw ma ai ngu ai hku chye na hkamla ma ai. Dai majaw 2011 ning Jun shata praw 9 ya shani hpang dat ai majan raitim Annau ni bai asum jaw chyalu re ngu ai hku htim gasat dat ai re. Ndai zawn mara raw ya ai hpe nhtang hku hkamla shut ai a majaw daini gaw myen asuya a dukrung ntsa e grau kaba ai manghkang sumbu gaw lung dung taw nga sai hku re. Ndai zawn re myen asuya hpe AMYU KABA LAILEN LANG AI NAW NGU NA KUN?:
Sau Nan Du
18/07/2012
0 comments:
Post a Comment