Hkrang mu ningsam masa mu, shingnyip lu katsi kahtet hpe maram lu saga ai. Shaning galu hpyen wa a hkrang masa hpe hkrum katut hkam sha yu n'na, mazang n'rin shoichyum shoihpa hkrum ai shabri shabrai hpe chyim yu saga ai. Ninghkri shingnyip kata kaw matsan jam jau gaya magap na daram sha buhpun magap masu nna, ya gaw singgu kyin, dwi sau mu mai ai lam hkum tsun asak matut lu na daram pyi shat da n'lu shatawt sai kaw kaning re hkrang sumla hte naw jahta htinglet mana nga na ta? Kaning rai dai zawn re ni hpe hpa myit mada shara mu nna naw matut kanawn na ta?
Hkrang mu nna lata gindun mahku mara shada chye na chyetau ai ningsam de she shamu shamawt rau sa ai, shingnyip lu n'na shimlum ngwi pyaw awmdawm ahkaw ahkang rau maren mara re de she rau hkawm sa wa ai. Shaning galu yup dam dam ai zawn byin hkra abaw ahkak, prik prang mawla jam jau n'sin kaw ra ai hku gang gayin n'na, labe labam n'be ai zawn sak hkrung wa saga ai re majaw dai ni gaw tinang a up hkang ai hkrang n'pu kata kaw she sak woi hkrung ra sai ngu myit n'gut n'dawt dik ai hte hkrang shingnyip kaja kata hta myitmu myit hkut ai hte shimlum nga pra sa wa saga ngu lajin mayu ai.
Hpa hpe yu n'na myit mada kamhpa mai na ta?
1- Gawngkya ai ni hpe madi shadaw garum ya na malai, zingri sat nat jam jau n'hkun de htu ganawng bang ai.
2- Bawngring rawtjat lam hpang hkrat nga ai ni hpe pawnba dun sharawt na malai dip gamyet myalu myasha n'sin de htu bang ai.
3- N'chye ai ni hpe matsan dum lam madun la na malai, dingbai dingna jaw ai sak sumri dandi kau ya ai.
4- Hpaji madang hpang hkrat ai ni hpe sharin achyin ninghtoi hpaw ya na malai, ningsin htinggrum ga-up kau ya ai.
5- Ahkaw ahkang ginlut hkrum nga ai ni hpe shinggyin nauna myit madun na malai, singgu krin byin hkra roirip ai.
6- Tara ritkawp masa hta myi grai n'hpaw ai ni hpe tengman dinghpring ai lam madun na malai, dusat zawn zingrut htu ai.
7- Htingbu shada shinggyim bawsang shada tsaw ra matsan dum myit madum na malai, n'hkru n'shawp masu magaw hpraw san seng lam n'nga dusat myit masa madun ai.
8- N'gun kya kaji kadun ai ni hpe pawnba htu sharawt na malai, Adup ajin anut sat ai.
N'dai zawn re hkrang masing masa shingnyip kata kaw kaning rai matut kanawn sa na ta? Shada kamhpa lam n'nga yang kaning rai hkrang langai hta rau dingbai dingna n'nga ai rau sa lu na rai ta? Shaning galu numla hka mat sai hpe loi loi sha ningma hkang n'dai hpe tsi shamai la lu na gaw shada kamhpa n'na mahku mara mayu ai lachyum shawng madun shapraw ra ai. N'dai ten myen hpyen dap kata kaw n'ru n'ra myit ashun shamu nga sai hpe maram yu n'na, Media shiga pa ni grai gap shabra ra ai zawn dap kata de shiga chyadam ni du hkra gap bang shabra ra ai. Hpyen masing masa zai ladat ni lai kau nna atsam mi alu hkang mi hkang hkra htu matsut kau yu ra sai.
Kugyin masa hta yan hkawm nga ga ai re jaw pru wa shang wa shamu shamawt ai hpe grau sadi ga, sum tsan myi kaba, na kaba, n'sen n'gup kaba hpaw malang ai kyinyu hpe ja ja sadi maja n'na hpyen zai ladat hpe myihprap zawn mahkrun jaw shamawt ra sai. Kai chyan ni lagaw hkang lawan hta maram yu ra ai. Jam jau grau hkam nna ningsin hpe ninghtoi shatai nna larau ladau n'shut n'shai ya jang kyinyu arang kaba bang dat yang Shawnglawt lu masawp dep kaw rai sai. KIO/KIA sha n'rai annau ni yawng Mung Chying shawa yawng chye ai, lu ai laknak yawng hkum hkum hpai n'na n'gun kaba hte htu malawng htim anut kau ra sai. Lanam hpundaw hka leng hta rau htu ganawng kau ga.
Shawng de madu wa hpaga galaw ja gumhpraw tam sa n'na madu jan yan nu hpang de gumhpraw htingba gun n'na matsan prat na lawt sai nga grai kabu ai hte n'ta de du shang wa ai shaloi sadi n'dung ai n'se ai madu jan gaw la langai hte rau yup nga ai da oi. Shaloi myit nau n'pyaw dik ai majaw n'htu hte madu jan a ladi ana kaboi di, myiman hpe ahki ahka di galep kau ya ai da.
Naw kam na kun?
Hpaga la langai mi gaw sum tsan kaw sa si mat ai da, shaloi shi manang wa gaw nang hpe matsan dum dik ai nang hte na dinghku ma ni hpe ngai lit la ya na ngu la law law wa ahkang sa hpyi ai da oi. Shaloi dai num gaw hpa bai tsun a ta? Nye madu wa a lup hte n'ra hpe sha n'mu yang shi si ai ngu ngai n'myit ai, shi n'tsa ngai galoi sadi n'hpyen ai hte shi n'tsa na nye tsaw ra myit kadai hpe mung bai jaw na ngai hta n'gun atsam n'nga sai hte kaga masha ni hpe tsaw na n'gun ngai hta n'nga sai.
{Aw kamhpa shara tsaw ra Wa Hpang Htingnu}
Shaning 60 ning hkawt myu shamyit shamat hpyen majan machyu pala hte mahku mara htinglet nga ai shada hpa hpe yu n'na simsa masat ngu shamying masat madi madun na ta? Annau ni a saidaw saichyen myit grai n'su ai hpa grai n'chye shi ai ma ni prat hpe sat ai, pat ai, zingri ai, dip ai ni hpe annau ni lamu ga kaw na gawt kau ra sai.
Baren Numraw
3 comments:
BAREN NUMRAW E....,Nalai ka hpe Myen laika hku Myen mung ting luhti na hku shabra dat u.....,
Awmdawm shang lawt majan mahtang rai na grai madi shadaw ai law. Myen a kata kaw nga nna ahkaw ahkang loi mi lu na matu mung ndai zawn jam jau nna gasat let hpyi taw nga ra ai. Awm dawm a matu gasat nna jam jau ai pyi grau akyu pru na re. Myen gaw gara hku mung n jaw kam ai hpe asan sha chye na saga. Federal state n kam jaw nna she ma ja htim gasat nga ai re. Bawng ban magang hpyen n-gun shajat magang. Bai, 2008 ning gaw da tara npu e sha bawng ban na nga ai Thein Sein asuya hpe hpa na naw hpyi aput taw nga ma ai kun?
Pang Lung ga sadi hpe shaprai kau sai, malap kau sai she nga ai ni hte bawng ban tim lachyum n pru sai. Pang Lung a shawng na awm dawm hku nga lai wa ai madang de an nau ni hpe jahka kau sai lachyum hpe magam gun, mung shawa yawng Wunpawng sha ni yawng chye na saga, ngu mayu ai. Myen kaw hpyi ai, ngu ai ga baw nan shut nga ai. Annau ni ra ai 1947 Pang Lung ga sadi hte maren mung masa bawngban n hkam ai hpe mung chye na ram saga ai. Dai rai yang hpa naw bawng ban nga ai kun? Myen a matu ahkaw ahkang jaw ya ai hte sha bung nga ai le.
Awm dawm masing jahkrat sa wa ai rai yang, gawngngu sumla naw ai ni hte rau kanawn na n ra ai Hpan Madu Karai Kasang Yehowa mung awng padang jaw na sha re. Myen gaw federal n jaw n mai rai nna jaw wa ra jang dai jaw nna bai manai magaw rai annau ni hpe amyu jahtum ladat bai shaw na sha re majaw ya jang moi mi na hku awm dawm bai nga wa saga.
Ya kaw nna Wunpawng Dakkasu jawng ni du hkra hpaw wa ra saga ai. Wunpawng tsi dakkasu, jak dakkasu ni, computer IT dakkasu, Englik ga hte kaga ga amyu myu dakkasu ni, maigan sara ni shaga let hpa mung annau ni a shara kaw nan sharin hkat nna, dai kaw nna mungkan mungdan de hpaji bai matut lu hkra lam waw lajang mat wa ra na saga ai. Maigan du Jinghpaw Wunpawng sha ni mung wa wa sa sa rai hpaji ginlen sharin hkat mai sai re. Ya na Myen dakkasu madang hta sha gaw grau nna sharin jahpat lu na re.
N rai yang wunpawng ramma ni hpaji ra nna mare kaba de chyu yu mat wa rai nna Myen ga sha kung wa, tinang ga hte htunghking hpe shamat, dakkasu du nna ka-ni ya she tai shajang wa nga ai, Wunpawng myu shayi ni mung maigan la chyu la, la sha ni mung maigan num chyu la rai mat wa nga ga ai. Munghpawm Myen Mung ngu ai kaw lawm na hku myit hta n bang saga law.
KIO,KIA. hte Jinghpaw Wunpawng Myusha yawng hte e...., LAK NAK SHAGRENG MU LO...< HPYEN DAP LAU LAU HPAW JAT MU LO...., N-dai laman Sam mung de KIA. hpyen la ni rim hkrung ai shiga ni gaw.. n-byin ging dik ai lam ni re yaw....,Mungkan RAWT MALAN hpung hta...RAM DIK ai rawt malan a-myu. Masha a-myu ni shakawn ai. kasi la ging ai RAWT MALAN a-myu she tai ga yaw......
Post a Comment