Lak San Shanglawt lu ai mungdan langai mi byin mat myu ai/lu ging ai amyu masha ni hpe Mungkan Wunpawng Hpung hte International Asuya hku nna ntsa lam jawm masat da ya ai hkrang maka nga nga ai. Dai Shanglawt ai Mungdan langai bying lu na hkrang maka ni gaw;
1) Laksan lamu ga madu da lu ai/ madu lai wa yu ai amyu masha ni
2) Laksan rai nna laga amyu masha ni hte nbung ai Ga, Htunghking, Laika, Makam masham, nga-sat, nga-sa, arawn alai,
3) Ram daw madang re law ai amyu masha jahpran nga ra ai
4) Sut nhprang ni loi loi nga ra ai ngu nna ntsa lam jawm masat da ai lam ni nga nga ai.
Rai yang, anhte Jinghpaw Wunpawng Myu masha ni gaw myen amyu masha ni hte moi chyaloi nhkoi kaw nna mungdan kaga ga re ai amyu, tinang myu sha ni hpe tinang myu sha shada sha uphkang nna nga pra wa amyu, tsun shaga ai Ga, Htunghking ni hta, Laika nbung hkat ai amyu, kyang lailen, arawn alai ni nbung ai, makam masham nbung ai, nta shachyraw rawng ai ladat ni, galaw lu galaw sha ladat nbung ai, num jaw num ya mayu/ dama ru sai makyit mahkai shachyen shaga ai lam nbung hkat ai amyu ni rai nga ai.
Ndai zawn shai hkat ai hkrang madin ni nga taw ai majaw htawm hpang de matut nna prat tup jaw lup simsa ngwi pyaw nga wa lu na ngu ai lam gaw nmai byin ai lam nga ai. Maigan mungdan ni hkan e mung amyu nbung ai ni arau jawm de nga ma ai le.. ngu nna ga san san hpa nga ai… maigan mungdan na mungdan asuya galaw ai masha ni gaw shing gyim ahkaw ahkang hpe manu shadan ai, mungdan a gaw da ai uphkang upadi hpe hkungga ai hte hkan shadik shatup ai lam ni nga ai.
Jinghpaw Wunpawng Myusha ni myen hte shanglawt arau jawm la ngut ai hpang nshawp nkap ai, pale palau rai uphkang sha wa ai majaw 1949 ning hta Du Kaba Lahpai Nawn Seng woi awn ai mungdan hpyen Hpung ni gaw myen asuya hpe shawng woi ninghkap gasat hpang dat nna laksan Kachin Kingdom Mungdan hpe madaw bai gaw de la na lam shakut lai wa sai. Lahtaw Zau Seng (KIO/A) Ningbaw Kaba mung Du Kaba Naw Seng a hpyen hpung kaw na Du re hpe labau hta rawng nga ai.
Anhte Jinghpaw Wunpwng Myusha ni myen a uphkang sha ai kata de du mat wa ai kawn ya ten du hkra zingri zingrat, adip arip, shing gyim shari shadang kachyi pi nnga ai hku up sha ai kata e sak hkrung nga pra ra nga ga ai. Ndai lam ni gaw galoi mung simsa ngwi pyaw ai hku arau jawm nga pra nmai ai ngu ai sak se mahkrum madup ni rai nga ai. Dai majaw Jinghpaw Wunpawng Myusha ni laksan Kachin Land Mungdan hku garan nga mat nna hting bu jinghku hku hkau let kanaw hkat ai madaw htuk manu ai masa pru nga ai. Anhte Jinghpaw Wunpawng Myusha ni hta Laksan Kachin Land Mungdan gaw de mat wa lu na n’gun atsam, machye machyang ni nga nga saga ai majaw hpa myit tsang na lam nnga sai. Ga shadawn, ya ten anhte amyu sha ni hta galaw lu sai atsam marai ni gaw;
1) Kachin Land hta Jinghpaw Wunpawng Amyu mung shawa masha ni yawng htum sen 10 jan de du nga sai,
2) Tinang a lamu ga hta atsawm rai makawp maga lu na hpyen n’gun nga sai, up hkang lu ai atsam mung nga sai.
3) Laika chye ai ramma ni law nga sai,
4) Maigan mungdan ni hkan bungli amyu myu galaw ai hpaji mahkrum madup lu sai, maigan mungdan hkan laika hpaji sharing la ngut ai ni law wa sai.
5) Maigan mung masa lam/ mungdan kata mung masa lam, mungkan shing gyim masha ahkaw ahkang lam ni hta dam lada ai mu chye lu sai
6) Kachin Land kaw na pru ai arung arai ni hpe Miwa hte Kala gat lawk de dut shabra mai na hpa mahkrun ni nga ai.
7) Hpa-ga lam mahkrun ningmu nga ai masha law wa sai.
Ndai zawn re mungdan langai hta ra nga ai hpaji, machye machyang, mahkrum madup ni hpe lu nga saga ai majaw mungdan langai matut gaw de mat wan a matu gaw grai yak na lam nnga nga ai.
Mungkan hta Kachin Land ram pi ndam kaba ai, masha jahpran nlaw ai, nhprang arai npru ai mungdan kaji ni law law nga ai. Ga shadawn; Singapore mungdan.. Kachin Land ram nkaba, nhprang mung npru ai, Bhutan mungdan mung Kachin Land ram n kaba ai, masha jahpran mung Wunpawng ni ram nlaw ai tinang a hkawhkam up ai democracy mungdan byin taw nga ai, bai nna Nepal mungdan rai timung bum ni hkrai rai nna galaw sha yak ai mungdan, nhprang arai npu ai mungdan re. Nepal hte Bhutan mungdan gaw panglai hka lam n nga ai, Kala hte Miwa mungdan kaba 2 a lapran matep taw nga ai mung dan kasha ni re.
Ndai zawn re mungdan ni pa grin nga lu yang hpa majaw Kachin Land gaw laksan mungdan langai hku nmai gaw gap la lu na ga ai kun?
M.Zau Hkum
4/9/2012
16 comments:
grai hkrak ai mahkrun gin lam ni rai nga ai.ngai myu sha langai hku n.na mung n.dai masing hku pan dung tawn ai hpe ra ai.amyu n.bung ru sai ,htunghkying n.bung ai me ga ra hku mung hpawm mai na.mai bin ai gaw tinang ahkw ahkang ,tinang mung dan nga mat jang gaw pawng hpawm hpyen la chyawm mai na re ngu mu ai.bai na kk ra ai gaw myit mang langai,pan dung langai sha hpyi na hpe ra sharawng ai.ngu mayu ai gaw munghpawm rai jang yawng dai masa hku akyu hpyi ra ai.mungdan langai hku ra yang mungdan langai hku kyuhpyi ra ai.masha man e gaw munghpawm masa hku nga kraw kata gaw tinang mungdan nga.kk daw dan yak nga ai.kk gaw chye ya ai an hte wp sha ni mung kan kaw lak lai ai htunghkying hte nga ai hpe.dai majaw masha amyu kaga hte rau nga matu mung shi daw dan ya yak nga ai.dai majaw kata n.tsa langai sha hku hpyi galaw sa ga ngu myit sawn lu ai.
Ndai ga San gaw garai Kaja ai , Mai bin ai ngai hkapla ai , wp sha a hkun ding shagu Hkap ka ra nga ai an hte myit dawdan ra ai lam aten grai lai mat sai rai Tim grai kasang gaw wp sha ni hpe ladat hte ladaw aten bai jaw nga ai ndai aten gaw mungdan la ngai rai sai kam ra nga ga ai .tinang amyu hpe jamjaw ai lam hpangde nbin wa u ga ngu myit mada Lu ai wunpawng myusha rai jang myen myusha ni hpe kam nga Na lam nnga sai .
mungkan shara shagu hkan du nga ai myu sha ni yawng Kachin Country ngu law law tsun jai lang ga...
Laika ka ai wa a ninngmu hpe grai madi shadaw ai. grai jaw teng ai lam re.Labau nrum ai, Amyu ru sai htung hking, makam masham n bung ai myu sha ni hte matut nga na ngu ai gaw Jinghpaw Wungpawng myu sha ni hpe Myen a mayam tai na matu kalang mi bai shangang shagrin dat ai hte bung na re. Aung San wa ga sadi jaw ai hta nanhte Kachin ni hpe nsa up sha ai lam (colony) n law ai ngu gasa di jaw tawn da ai. Rai tim tsun ai hte galaw wa ai lam kaga ga rai nga ai.Dai majaw mi moi na jadik jahpang mungdan lu ai myu ni re majaw laksan mungdan gaw gap sa wa na matu aja awa madi sha daw nngai. Karai gaw anhte Jinghpaw wunpawng myusha ni hpe mungdan jaw da sai. Dai hpe gaw de na Karai Kasang ra sharawng nga ai law...
Ndai zawn ka sang lang dan ai hpe chyena na ahkyak dik masha ni gaw K.I.O/K.I.A Ginjaw Du salang ni re nga ai,Ndai Du salang ni nan n-gwi nga sa yang gaw K.K kaw mung masha ni kade hpyi nna madat ya na nga tim ning baw ningla ni nkam jang gaw K.K njaw ai hpe mungga hkan law law mu na re.Ningbaw ni K.K kaw hpyi wa jang chyawm gaw K.K madat ya ai mahtang law ai.dai gaw K.K shi nan anhte shing gyim masha hpe jaw da ai authority ngu hpe hkung ga ai majaw re nga ai.Ya dai ni K.I.O/K.I.A Du salang ni mungdan lu na matu K.K kaw gwi gwi hpyi nga ai kun ngu ai hta madung na re.Wut tawng naw ai myen wa hte naw pawng na nga yang mung hpa nra ai,Ti nang a kasha ni hpe myen num/la jaw sha kau mu.Du Nban myen hpe ka-hkri shatai ai zawn shatai kau manu ngu sha htet ra na sai.
An hte Jinghpaw Wunpawng myu sha ni laksan mungdan langai gaw de na, ra ai lam ni hkum tsup ai, hking ngau ni hkum sai, nhprang sut rai ni hkum ai hpa naw ra a ta? Myen wa a mayam woi tai na n shakut sa ga ngu KIO/KIA ningbaw ningla ni hpe tsun mayu ai . Ningbaw ni tsun ai hta Kachin land gaw block byin nga ai, panglai n nga ai majaw laksan mungdan gaw de na yak ai nga tsun jahpai nga ma ai. Myen mung panglai nga ai marang e anhte Kachin ni hpa baw akyu hkam sha ga ga ta? Panglai nga shapyi anhte n lu sha ai wa me panglai marit nga ai. Mungkan hta panglai n lu ai mungdan law law nga ai, shahte mungdan hpe gaw de lu nga ma ai. Panglai n lu ai hpe sha gaw n jahpai sa ga. Hka lam hta nbung lam gaw grau lawan ai. Nbung lam prat du sai hkum ung ang nga manu. Mungkan de asan sha laksan shanglawt mungdan (Kachin land) ngu na mi rai rai ndau manu. Karai Kasang kaw mung Jinghpaw wungpawng sha ni yawng shanglawt jawm hpyi
sa ga. Ya gaw nkau mi gaw mung hpawm, nkau mi gaw shanglawt nga na hpyi nga ma ai. K.K gara hpe mahtang madat ya na n chye ung nga nga na re, shingran ai. Kam sham ai myit hte galaw sa wa ga ngu tsun mayu nnga.
Tinang a mung dan gaw de la lu na matu akyu hpyi ai ndai majan nnan hpang ai kaw na rai sai.lu wa hpe mung kam ai.
myen sawa e lawan jawm nut sat kau saga law... mung dan mung grai lu mayu sai... myen e mung grai n kam yu si wa sai
English ni nga ai mungdan hpe: England nga ma ai
Deutsche ni nga ai mungdan hpe: Deutschland Scottish ni nga ai mungdan hpe: Scotland
Kachin ni nga ai mungdan gaw: Kachinland re.
Kachin kaga Land kaga n re yaw. "Kachinland"
Grai hkrak ai,manu dan ai ,chye ging ai,a hkyak ai lam ni hpe, Ya na zawn ka mara da ya ai grai chye ju dum Sai.
JINGHPAW WUNPAWNG MUNGDAN NGU MYUSHA NI YAWNG CHYAWM MARAWN JAHTAU SAGA!GAWMAI GAWSHA SAWA NBYA MYEN HPE ATSAI AWAI SAT SHARU GAWT KAU LU HKRA LADAT AMYU MYU HTE YAWNG RAU CHYAWM SHAKUT SAWA GA LAW...
Kachin hte land hpe matut ra ai lam hte seng nna ga shadawn ni hte stun sanglang ai jaw na zawn gaw nga nga ai. Raitim England hpe Englishland, Deutschland hpe Deutscheland, Scotland hpe Scottishland ngu n ka ai gaw hpa majaw rai? Ga shadawn ni hpe yu yang gaw jahtun de na gasi ni di tawn da ai hpe yu yang gaw Kachinland ngu ka yang mung n jaw na zawn rai nga aile. Ga shadawn ni hku nga yang Kachinland hpe Kaland ngu ka yang she jaw na zawn zawn rai nga ai le e kara hku ta?
ndau laia ngau hpe hti yu yang wunpawng myu sha lam yan galaw nga ai ni yawng asan re myu sha lam vision hpe gin hka la lu mai nga ai
KachinLand ka ai hpe pi sawn n lu ai wa gaw kadai ta? Nang na mying hpe mung daw mi di kau u.KachinLand hpe ka yang laga mungdan na ni n pawn ka ai nga sha mu ai pawng ka matut ka ai mungdan ni hpe gaw nang n sawn lu ai i? ThaiLand nga na ka da ai hpe mung dum u. na bai kasha e.
Kachinland ( Jinghpaw Wunpawng Mungdan ) ngu ai daram jaw ai gaw kaga nnga sai .
Lungbra
Thai's land = Thailand, Kachin's land= Kachinland
Post a Comment