Mungkan hta ban hte ban mying kaba lai wa sai ningbaw ningla ni, hkaw hkam ni, hpyen jaubu ni hte hpaji ninghkring ni jahten sharun n'na matse gumshem ni makam masham sara kaba ni grai dan hkrung paw pru lai wa sai re. Dai madu prat hta mung shawa a akyu ara hpe tinang sak hkrung ai ten hta dangdi dangdep ai hta grau ninghtawn hkra, shakut shaja mying dan hkung lai wa sai ni grai law nga lai wa sai re.
Ya daini kaga myu sha ni a mying kaba ai ningbaw ningla hpyen jaubu ni a lam hpe tawn kau nna annau ni a myu sha kata kaw na mying kaba lai wa ai hpu shawng hpuba ni a mying hpe loi ka sanglang dan mayu n'ngai. Annau ni hta mying kaba lai wa sai hpyen jaubu ni.
2- Naw Seng
Mung up Du
1- Sama Duwa Sin Wa Naw [Gumsan magam]
2- Du Kaba Lahtaw Zau Seng
3- Maran Brang Seng
4- Mali Zup Zau Mai
5- Lamung Tu Jai
6- Langyaw Zawng Hkra
7- Bumwang La Raw
Du Salang Ning Baw ni,
1- T. Hkun Myet.
2- Mahtu Naw
3- Zahkung Ting Ying
4- Lasang Awng.
5- Tanggu Dang
N'Gun ja ai.
1- Mungli Zau Gam
2- Hu Bren Zau Tang
3- Lachyung Brang
Lahta na hpu shawng hpuba ni gaw annau ni a labau hta ngam nan nna labau ginshi hpe kaja ai n'kaja ai sakse hku hpang de na annau ni a kashu kasha ni a matu shanhte prat hta galaw shakut lai wa sai mabyin mahkrun ni hpe n'kam tim ngam kau da ra sai re. Labau ginshi shawn kau da ra sai.
Ya hkyak hkyak annau ni hta mying kaba dik nga ai sumla hkrung shadang shayi ni hta grau ai. Jinghpaw hkaw hkam daw rai nga ai, maga ga de mying ninghtawn nga ai, laika man shiga ni hta mying kaba nga ai, yawng a n'gup hta mying gumhkawng dik nga ai, myu sha ni a kam hpa gin ai, mung masa ningbaw, Hpyen Ningbaw, Sutdu, myu sha yawng a myi ju myi jut yu maram nga ai annau ni a sai kata na ningbaw nkau mi nga nga ai re.
1- Slg. Du kab Zahkung Ting Ying
2- Du Kaba Gam Shawng
3- Du Kaba Gun Maw
4- Slg. Kaba La Nan
5- T. Hkun Myet ni rai nga ma ai.
Yawng a myit masin hta n'dai ni hpa baw galaw nga ai, hpa baw tsun nga ai, ganing re sat lawat ningsam galaw shapraw nga ai kaw na hkawt yu maram myit shang sha nga ai ni grai law nga ai re. Annau a ningbaw kaba n'dai ni myu a matu kade ram, mungdan a matu kade ram akyu jaw akyu tam ya ai lam galaw nga ma ai kun nga, ten hpring maram shiga madat shajang nga ai re.
Tsaw ra dik ai ningbaw kaba hpu shawng hpuba ni e tinang sak hkrung ai ladaw laman myu a matu kaja dik ai labau ginshi hpe mahkri shawn kau da lu yang gaw hpang na annau ni a matu mara, ban hte ban prat hte prat kasi yu len la, lagaw hkang hkan na rai nga ai law. Madu kabye kau da ai lagaw hkang hpe annau ni kaja ai hpe kaja ai hku hkan kabye na re. Dai ni jan du wa mahka rai wa nga saga ai, jan grai n'shang yang, ninghtoi naw mu nga yang anhte kashu kasha ni a matu kaja ai kasi ningli kaja ai sali wunli kamhtaw jaw kau da na re ngu kam ai law.
Chyurum ai annau ni htinggrum kata e she ahtawk ahtak nga tsun hkat yang kaja na ten du sai, ahkyak ai ten hta myit hkrum gin sai. Kadai hpe hkra tim sai bung ai annau ni kraw lawang yawng hta machyi hkam sha yang n'pyaw dik ai, nang ngwi pyaw tim na lawu lahta ni n'pyaw yang hpa di na prat mi hta lang sha myu bung sai rum chyurum ai annau ni myit hkrum yang anhte ma ni kade sha n'gun lu na, kade sha pyaw na, ya gaw shat ngam gashun sha ai n'pan na gwi la she tai nga ai.
Dai ni grau mying kaba dik ai hte, laika man hta shara grau la nga ai, masha yawng a n gup hta tsun kajai gumhkawng ai hta kaja ai kun? n'kaja ai kun? grau mying gumhkawng nga ai hte sumla hkrung hta grau, hkaw hkam daw zawn, yawng a myit hpe gang ashun nga ai, yawng a No. 1 jaw hkrum nga ai gaw kadai ta? Ngai hku na gaw ya yang Jinghpaw Mungkan hta mying kaba nga ai ngu No.1 jaw ai gaw Du Kaba Slg Kaba Sutdu Zahkung Ting Ying re. Kanu kawa hpu shawng hpuba e nang lu ai n'gun atsam nang chye ai machye machyang, sut arung arai, na a hkum hkrang bawnu yawng gaw annau ni yawng a matu akyu rawng ai lam hta jan grai n'du shi yang jai lang na hpe grai kam kaba myit mada nga ga ai law. Annau ni mying kaba ai n'law la ga ai, annau ni naw kaji kadun ga ai, annau ni naw shakut ra ai, annau ni shanglawt naw lu ra ai. Annau ni a n'tai n'mai hpa grai n'chye shi ai ni a madai ai n'sen hpe nang na ya sai. Ten naw nga yang ninghtoi naw mu nga yang Na mying kaba ai lam hpe maza ka, shanut katawng hta n'bang kau u ga.
Baren Numraw
26/8/2012.
.jpg)
.jpg)
.jpg)
.jpg)
