MALI HKA NU N HTANG HKU LWI YAWNG NA HPE N RA AI NI

Myitkyina, Shatapru:- 31-3-2012 Bat (6) ya.

Mali hte Nmai zup madim hte seng ai masing hpe Gumsan Magam U Thein Sein a aming hte dawm jahkring kau sai rai tim, nhtoi 6-3-2012 ya shani kaw nna Asia World Company hte Miwa CPI Company ni bai shamu shamawt hpang wa ai lam nga ai sha n-ga, Jinghpaw Mungdaw Asuya Wungyichoke Lajawn Ngan Seng a aming hte Tanghpre mare masha Kahtolik Mama du hkra, rim hkrum ai manghkang byin pru wa sai.

Daini nhtoi 31-3-2012 ya shani 10:00 a.m hta Shatapru Kahtolik jawng wang Gawknu kaba hta myitsu salang marai 150 daram du zup nna Mali-Nmai Zup Madim hpe ninghkap ai zuphpawng jawm galaw lai wa sai. Machye machyang rawng nna mungdan hpe gaja wa makawp maga mayu ai myitsu salang ni marai 19 tup gaw, mungkan na ngang kang ai sakse sakgan hte hkrak hkrak madi madun nhtawm, mabyin sat lawat lam ni hpe sakse hkam let, madim hpe ninghkap ai mungga ni tsun shaga lai wa sai.

Grau nna, Amyu Thar Hlutdaw Salang rai nga ai Duwa Jay-Yu-Wu gaw, ndai lam hte seng nna Asuya ni kaw hkrang hkra tsun adawt shakut ai wa rai nga ai. Kaga myitsu salang ni law law tsun shaga ai sakse hkam ai hta, Mali-Nmai Zup Madim a majaw, Jinghpaw Wunpawng buga hte amyu htunghking sha n-ga, Munghpawm Myanmar Mungdan ting a asak sum hten byak wa na re lam sakse hkam dan lai wa sai. Ndai daram law htam ai mungchying shawa ni si ru mat wa ai hpang, Miwa CPI ni bunglat hka wa na gaw, katsan ga na minla ni hpe sa jaw ya na rai kun? nga ma ai. Ya e pyi Tanghpre grupyin ginra na ru hti n dang ai sut rai nhprang ni shaw la kau rau masai. Matut nna shaning 50 ning madu la kau jang, anhte a mungdan gaw ntsin shup la kau ai kumshu pa hte bung mat na ga ai, nga ma ai.

Nnang nawn kaba hkam lu hkra galaw na ga ai nga nna CPI ni tsun ai ga gaw hkam dahka n nga ai. Miwa hta hpaji grau kungkyang ai Japan ni pyi nnang nawn kaba a majaw, nuclear jakrung baw kayun nna jamjau hkrum sha lai wa sai. Mungkan e, Brazil, Pakistan, India, Miwa mung hkan e law law lang hka madim baw ayai nna masha mun sen si ru ai mahkrum madup ni adan aleng mu mada lu nga ai. Anhte gaw n law la ai amyu sha ni ra ga ai.

Mali-Nmai Madim kaw na amyat a 10% lu sha na gaw, mungshawa n rai; lachyawk mi re ai masha ni she rai ma ai. Ngam ai 90% hpe Miwa ni shaning 50 chyup sha kau na rai nga ai. Miwa mung e hka shi hka nu hkying hku nga jawng taw nga ai. Dai de wa galaw lang mu ga. Anhte a buga e anhte pyi n mai nna n galaw ai she re. Anhte ra kadawn mu nna anhte nan galaw yang 100% yawng akyu hkam la na ga ai.

Karai Wa hpan da ai bungli shingra tsawm htap ai lamu ga hpe shinggyim masha n jahten u ga. Sinbo lawu na Mali hka gyip gaw, gyip ra ai majaw she Karai Wa shagyip da ai re. Dai hka gyip hpe adawt malawng kau yang, sanghpaw kaba ni Myitkyina du hkra lung lu na hte, Miwa hpaga rai ni n dut n dang htaw shalet lu na re lam tsun ai hpe hpaji n rawng ai Myen Hpyendu ni kam lai wa sai re. Gaja wa gaw, dai hka gyip adawt malawng kau jang, Myitkyina pa gaw lagyawng hkaraw kaba byin mat na re. Karai Wa galaw da ai amu hpe jahten na galoi n myit ga. Shatsawm jahtap bau rem makawp na sha myit ga, nga ma ai rai.

Ka shana ai:- Mar Mar Kaw

MATUT HTI NA »

HKA LA YANG GAW GASAT

March (30) bat Manga
Wunpawng Mungdan Shanglawt Asuya Dap Ba (5) up hkang Ginra rai nga ai Hka La Yang kaw dai ni KIA myu tsaw share shagan ni hte myen hpyen hpung ni gasat lai wa sai lam shiga na chye lu ai. N dai zawn gasat ai hta myen maga na (1) hkrat nna du (2) hkala wa sai lam na chye lu ai.

MATUT HTI NA »

LANG JI U A MYU TSAW MYIT

MATUT HTI NA »

KRAW MADAI NINGSEN

1. Wunpawng sha ni hpe Mungga Myi Na jahpaw ya Karai Wa
Wenyi n-gun kahtap jaw rit.

2. Wunpawng sha ni hpe Hpaji byeng-ya jaw ya Karai Wa,
Myit hpaji jaw rit.

3. Wunpawng sha ni hpe sut masa jahting ya Karai Wa,
Awmdawm shalawt la rit.

4. Wunpawng sha ni shinggyim lai sa sharawt ya Karai Wa,
Galu kaba shangun rit.

5. Wunpawng sha ni hpe hkamja lam jaw ya Karai Wa,
Pawn ba garum la rit.

6. Wunpawng sha ni hpe Laili Htunghking jaw ya Karai Wa,
Ngangkang shangun rit.

7. Wunpawng sha ni hpe Mung masa myi jahpaw ya Karai Wa,
Padang lam jaw ya rit.

8. Wunpawng sha ni hpe tsawra myit jaw ya Karai Wa,
Myit hkrum shangun rit.

9. Wunpawng sha ni hpe tengman rap-ra myit jaw ya Karai Wa,
Shinggyim ahkaw ahkang jaw ya rit.

10. Wunpawng sha ni hpe shalan shabran myit jaw ya Karai Wa,
Matsan dum la rit.

11. Wunpawg sha ni a hpyen hpe shamyit kau ya Karai Wa,
shaden kau ya rit.

12. Wunpawng sha ni hpe garum jinghku jaw ya Karai Wa,
Kahtap shaman ya rit.

13. Wunpawng sha ni a hpyen hpe gasat kau ya Karai Wa,
Makawp maga la rit.

14. Wunpawng sha ni a gam maka shatsawm ya Karai Wa,
Ninghtoi jaw ya rit.

15. Wunpawng sha ni a sai hka myiprwi katsut kau ya Karai Wa,
shalan shabran la rit.

16. Wunpawng sha ni a hpyen hpe tsawra myit jaw ya Karai Wa,
Shagrit shanem shangun rit.

17. Wunpawng sha ni hpe hpu reng sutgan lamu ga jaw ya Karai Wa,
Bai gawgap tsit tsawm shangun rit.

18. Wunpawng myu tsaw share shagan ni hpe shagrau ya Karai Wa,
Myit n-gun atsam jaw ya rit.

19. Wunpawng tsin-yam ni hpe garum ya Karai Wa,
Lakawn lam woi la rit.

20. Wunpawng sha ni a akyu hpyi ningsen hpe na ya Karai Wa,
Kraw madai ningsen na ya rit Wa.

Bumwa Hkri Ma
30.3.2012

MATUT HTI NA »

HPA MAJAW

Hpat wat ra lata poi a matu mungdan ting n rau n htau rai nga ma ai. Kaja nga yang gaw ra lata poi ngu na hta n ra lata poi ngu yang grau jaw na kun? 2010 ra lata poi hpe yu ai shaloi, n ra lata poi ngu ai she grau jaw nga ai. Hpa majaw? Mung chying sha ni gadai mung n ra ai, kadai mung n madi shadaw ai, hpyen palawng raw ai ni kadai mung n ra ai ni hpe lata lu hkra lata la ai poi wa n rai i? Ya dai ni mung kadai mung n ra ai ni hpe lu hkra bai lata la na sha re. Rai yang Jinghpaw Wunpawng sha ni a matu hpa baw akyu nga na i? ngu san yang, “anhte gaw mung masha ni lata tawn ai dat kasa ni re majaw” ngu ai ga hpe kahtap htap nna tsun nga ai ni, anhte myu sha ni a matu dai ni hpa lu galaw nga ma ni? Ngu ai gaw mahtai rai na re. Jinghpaw Mungdaw a ninghkring ni re nga nna, myen wa a makau kaw tsap, baw gum nna, tsun ai yawng hpe yau, myen mai dang gumhpuk ya nna she shat lu sha nga na rai yang, n dai ra lata poi gaw anhte myu sha ni a matu hpa lachyum n pru ai. Ra lata me bang tim n bang tim anhte matu, akyu n pru ai sha n ga akyu naw yawm na re. Hpa majaw nga yang, anhte matu hpa n shai tim, myen wa galaw ai hpe madi shadaw ya ai hku re majaw, shi gaw amyat lu ai. Myen wa myi man lu na hpe ra ai ni rai yang bang mai ai.

Anhte Jinghpaw Wunpawng myu sha ni a matu gaw, kaga hpa rai n ra ai. Awng dawm ahkaw ahkang lu na sha ahkyak nga ai. Hpa majaw? Madu a Du hte madu a magam hte rai nga pra hkrat wa ai amyu sha ni re. Myen hpe hpyen sum nna, myen a kata dip sha hkrum nga ai ni nre. Munghpawm galaw ga ngu nna, masu hkrum ai majaw she myen a kata myen dip sha hkrum nga ai ni re majaw, shingyim masha langai a awng dawm ahkaw ahkang, myu sha langai a awng dawm ahkaw ahkang hpe anhte lu nan lu ra ai. Ndai ahkaw ahkang ni lu na matu n ra sharawng nna dingbai dingna jaw ai kadai hpe mung anhte hpyen hku masat nna, gasat nan gasat kau ra ai. Jinghpaw wunpawng mungdan hpe Jinghpaw Wunpawng sha ni up ai gaw mara n re. Kanu kawa myit rawng ai zawn zawn rai, mungkan de gaw simsa lam grai ra nna shakut nga ai zawn galaw, kata lam kaw gaw myu shamat masing hte sat nat zingri nga ai ni, gade lang bawng tim hkrum na lam nnga, n hkrum hkra nan galaw nga ai ni, simsa lam galaw ga, yawng wa marit mi a nga masu tim, sharaw hpyi hpun nna wa shaga ai hpa rai nga ai. Tsaw ra myit ngu ai kachyi mi pyi n lawm ai. Hkungga ging ai Jinghpaw Wunpawng myu sha ni e lai wa sai ten na hpe yu yu nna, du na ten hta dum hprang ra sai. Kalang mi bai masu n hkrum na matu sadi kaba hte sadi ra sai. Kalang sha masu hkrum ai shaning kru shi ning jan tsin yam htawng kaw na n mai lawt nga ai. Kalang bai masu hkrum jang gaw shu mashi ban de she du mat wa na re.

Kaga myu sha ni myen hte yawng simsa lam la ma wa masai, Hpa majaw? Shinggan kaw na yu yang she anya la ai zawn rai tim, shat sha ai hkrai re majaw, nau gaw n hpyang na ma ai. Kadai wa mi sharaw hte jinghku hku mayu na rai ta? Hprawng pru mai na hkat gaw ngam da na ma ai. Ya simsa lam la hpang wa nga ai SSA ni mung mai dang lahkum kaw pyi rai n lu dung yang, bai gaphkat ra wa masai. Kade a majaw rai? Hkun Htun Oo tsun yang mung myen hpe n mai kam ai lam, grai myit yu nna she kanawn ra na re lam tsun nga ai. Kayin ningbaw ni mung myu langai hpe sha simsa lam la nna, kaga ni hpe gasat na ngu ai gaw hkap la hpa n re, Simsa ai rai jang yawng hte simsa ra ai nga nga ma ai. Shaning kru shi jan shari yu sai re majaw, mala la U shoi shoi nna dun lu na daram re myu sha gaw myen mung hta nnga na sai.

Dai ni anhte myen hte simsa lam a matu bawngban nga ga ai. Hpa majaw? Majan hpe bawngban nna jasim ai lam gaw nnga ai. Raitim Mung masa bawngban ai majaw majan sim ai lam rai nga ai. Dai majaw myen hte n bawngban yang n mai ai i? Mai gaw mai ai raitim, myen gaw simsa lam grai ra ai hku nna, mungkan de madun mayu nga ai hta, anhte n bawngban mayu ai ngu ai hku nmai nga ai. N bawngban mayu ai ni hpe mungkan hku yu jang gaw, majan hpe ra sharawng ai ni, jahten sharun mayu ai ni, simsa lam hpe n ra ai ni ngu nna sawn la wa na re majaw, shanhte bawng ga nga jang gaw, bawng lawm ra ai. Bawng lawm ai gaw asum jaw na matu n re. Dai ni Wunpawng Mungdan Shanglawt Asuya woi awn nga ai lam hta Ninggawn mung masa ngu ai policy nga chyalu re ngu ai hpe chye na ai. Kade lang mi bawng tim dai Ninggawn mung masa hte hkrak bawngban sa wa ai hku rai jang, annau ni a matu hpa tsang na lam nnga na re hpe mu mada ai. Simsa lam Komiti ni a (three step) daw masum bawngban na hkrang gaw grai htuk manu ai hkrang rai sai ngu mu mada ai. Ndai hpe n shayawm kau ai sha ja ja manat let n dai hpe lu hkra bawngban sa wa jang gaw anhte myu sha ni a matu, awng dang ai lam kaba rai na sai. Raitim dai ni na myen gumshem a ladat gaw “lu wa ai hpe gaw jawm sha, wa ra ai hpe gaw kaga ga” nga ai ladat rai nga ai. Laika ka ai wa hku nna, shawng de “madu lahkawng rawng ai lungpu” ngu ai ga baw hte kalang shadum lai wa sai. Ya myen mung kaw atsu ya lahkawng rai nga ai hpe asan sha mu lu ai. Thein Sein gaw mung an a gumrawng gumtsa lu ai wa nga tim, law malawng gaw mung masa, maigan hte hku hkau matut mahkai lam, mungdan a galu kaba lam, mungchying sha lam ni kaw sha up hkang ai power nga nna, hpyen dap de gaw shi power nnga nga lu ai. Dai majaw, Shanglawt hpe n gasat na matu matsun ai, myu sha ni hpe simsa lam la na matu bawng ginrat ai lam ni galaw nga ai rai tim, hpyen dap kaw na shi tsun ai hpe n madat ai. Jinghpaw mung de hpyen n gun htu dik dik re, Sam mung de simsa lam la tim hpyen dap hku nna shara maden ai, Sam ni the bai gasat wa ai. Ndai zawn re lam ni a majaw, thing tsing atsu ya hte bawngban jahkrup lu ai rai tim, hpyen dap ni ra sharawng ai lam n rai yang gaw, gade lang bawng, gade yak nna bawng ai rai tim, aten shama, n bung shama sha rai na n hten? Ngu hpaji jaw mayu ai. Ya simsa la mat wa nga ai myu sha ni yawng mung anhte zawn katut sha nna, lani mi bai n htang wa na mara ai. Dai shani myen hte kachyi mi pyi n bawng ai sha, myen mung nga ai myu sha yawng hte myit gahkyin la nna, n gun kaba langai, myit mang langai ban dung langai hte myen hpyen hpe jawm gasat agrawp dat jang n dang na lam nnga ai. Dang nan dang nna, amyu sha ni yawng hpe Jinghpaw Wunpawng sha ni woi awn zinlum, kahpu kawa tai nna, ngwi pyaw dik ai munghpawm mungdan hpe gaw de sa wa na re. Dai shaloi myen gaw tai yin ta kaw n lawm ai majaw, mung hpawm ngu ai kaw mung n lawm mat sai. Shi maigan masha (foreigner) kaw lawm mat sana. Dai re majaw, “Kachin Kaley Nan Htai Ma Aye” n dai ga dik wa na re.

Myu sha ni yawng hpe hkung ga let
Agu Namti

MATUT HTI NA »

MYEN HPYEN NI N PAWN MARE NA NTA WAN NAT

March (29) bat Mali
Wunpawng Mungdan Shanglawt Asuya up hkang ginra rai nga ai N Pawn mare de myen hpyen asuya a hka-ma-ya (390) na hpyen hpung ni gaw March (28) ya shani hkying (4:45pm) ten hta laknak kaba ni gap sharu bun ai hte mare masha ni a n ta (4) tup hpe mung wan nat kau ya lai wa ai lam shiga na chye lu ai.

MATUT HTI NA »

EDIN MARE KAW GAP

March (20) bat Mali
Wunpawng Mungdan Shanglawt Asuya Dap Ba (5) Ginra rai nga ai Ban Dawng Yang makau, Edin mare hta March (28) ya shana de Dap Ba (5) na Du Kaba Kawn Awng woi awn ai KIA myu tsaw share shagan ni hte mye hpyen asuya a Hopin dajau aihka-la-ya (388) dap ni laja la na gap gasat lai wa sai lam shiga na chye lu ai.

MATUT HTI NA »

NAM SAN YANG KAW MYEN HPYEN NI NAT KAU YA AI

MATUT HTI NA »

GWI GWI SIT SA GA

Duwau U e nau hkum ngoi? Na ngoi nsen na shagu shingran katsi nga ai anhte buga bum maling ni grau she madai wa nga ai, majan salu wanhku wanyam bat ni a majaw Duwau U e nang mung hkrit kajawng nga ra sai. Myu shamyit ai chyasam ta katsing ni a jaw kajawng maja let tam sha ra nga sai. Chyahkrung katsing htu lup ai mung nang sakse hku nna mu ya nit dai, chyaba wawt sha ai namdan myetle kam hpa ai bala hpara naw ai ni hte naw kanawn yang mai na kun? Duwau U e.

1. Myu shamyit shamat masing.
2. Htunghking laili laika ga shamyit shamat masing.
3. Makam masham labau shamyit shamat masing.
4. Sutlu ngamai bawng ring shamyit shamat masing.

Lahta de na masing kaba jahkrat nna, gangwi gawng kya hkra ladat tam mahkyen jaw jaw, hkrang shapraw nga sai myen asuya a kata bungli hta yajang annau ni myi tut hkum tut hkam sha nga saga ai. Mare kahtawng nat ya ai, sutgan lu malu mu mamu yawng la ya ai, jahten sharun ya ai, magam yingam n'mai galaw sai, nga shara pyi tam shamat hkyen nga saga ai. Dai gaw labau hta prat dingsa maumwi zawn matsin hkaidan na tatut hkrum gatut nga ai. Chyahkrung gatsing htu lup kau ai nga maumwi zawn she na ga yu ai ya gaw tatut hkumtut hkrum sha saga ai. Hpa hta shatai na ta? Pra sa ai mungkan ndai hpe nju ai madaw ngu na sai kun? Myu tsaw mung tsaw hpunau ni e ja ja myit yu ra saga ai. Tinang myu sha ni hpe chyazai du sat zawn galaw nga ai ni hte naw pawng, naw bawngban chyai nga yang kaja na kun? Dusat myit sha rawng ai ni hte naw bawng jahta na kun?

Mung Masa Bawngban Na
1. Panglung ga sadi ahkyak ntawn sai.
2. 2008 gawda ai tara nmai gram ai.
3. BGF-lamu ga jarik sin dap gale shangun ai.
4. 2010 ra lata poi tinang Myu sha ni nmai shang hkra galaw sai.
5. Rapdaw nga ai shani bawngban ga nga ai.

Lahta de na mahkyen kata kaw sadi dung numshawn shaw galaw sa wa ai lam hpa n'nga ai hta n'ga majan hte annau ni hpe mahtai jaw wa sai. Dai ni gaw shamyit shagrawt chyahkrung htu lup ai madang she du sai. Ya dai ni lapran ra lata poi hta mung Mohgaung, Hpakant, Manmaw mare kaba ni hta hpyen masa simsa lam n'nga ai majaw n'mai galaw ai nga kalang bai annau ni hpe rapdaw n'mai du shang hkra maw lanyet shachyai ninghpai masu sai, ningren galu hte gabat hkrum sai. Nam lawm nna dumsi gamai ai ladat lang hkrum saga ai. U hka hpe u nsawn ai hpa, kalang masu hkrum yang naw tsamai ai 2 lang masu hkrum nna hkan galaw ai wa madaw mana kaba she rai sai.

Bawngban sa wa ai ten hta mung hpyen masa dawdan hparan lu ai ni n'lawm ai, ndai gaw hpa nsawn ai ma chyai chyai ai hte shabung hkrum ai, lama ta masat htu kau yang gaw htawng madun sha hkrum ai katut na sha re, myu sha yawng a matu kaja ai mahtai gaw pru na n re, agung alau htawng madun sha ai nhkrum hkra sadi ga. Hpunau dingdung, dingda sam ni hte simsa masat htu tim ya hkyak hkyak gap hkat nga ai hpe dum ga.

Mungkan rapdaw de shi tang tik tik, ninghkap n'gun madun tik tik, maigan du nga ai hpunau ni yawng mung madu du nga ai mungdan kaw n'gun madun tik tik, seng ang ai rung ni de laika pa shadu tik tik galaw nna KOI/KIA hpu shawng lam woi ni mung gasat tik tik rai, Padang hkrun lam masing hpe grau numshawn kaba shaw nna matut manoi lu ai atsam yawng hte hpyen man mung masa man hpaw nna nsim nsa gasat saga law. KNO mung n'gun kaba langai hkyen nna maigan du mungdan shagu na ta masat chyawm woi htu nna UN rung hte tinang nga ai mungdan na seng ang ai rung ni de annau ni mabyin hpe tang shawn ra sai. Mungdan shagu hta bang na laika hpe langai sha rai na hku KNO kaw nna lit la ya ai hte tang shawn yang tang du ai hte kaja na re ngu kam ai. Ya jang rawt saga law.

Tinang myu sha ni gatsing chyahkrung htu lup ai zingri zingrat hkrum ai hte hpa garai n'chye shi ai myit nsu shi ai annau ni a ma kaji ni hpe yu nna ja ja dating ninghkap gasat sa ga .
Prat htum tim labau galoi nsi na re, GASAT, GA GARAN MAI SAI.

Baren Numraw

MATUT HTI NA »

N-GUN MADUN POI LAMANG NDAU LAIKA ( JAPAN )

DE:
Japan Mungdan du Jinghpaw Wunpawng Amyu Sha Ni Yawng
Japan.

GINLAM: N-GUN MADUN NINGHKAP POI KABA NGA AI LAM

Hkawp hkungga let,
Japan Mungdan kaw du shajang nga ai Chyurum Jinghpaw Wunpawng Amyu sha share shagan manaw manang ni yawng hpe lahta de na ginlam hte maren, n-gun gang ga saw dat ga ai. Mungkan mungdan shara shagu kaw chyam bra shajang nga ai sai rum ai Chyurum Jinghpaw Wunpawng sha ni yawng, ( aten ahkying langai ) kaw sha Myen hpyen asuya ni hpe jawm ninghkap n-gun madun na lamang nga ai majaw, myu tsaw mung tsaw myit kaba hte laja lana jawm ninghkap shang lawm shajang na hpe ndau shabra dat ga ai law.

Ninghtoi : 2nd April, 2012 ( Bat 1 ya ).
Aten : 3:00 pm ~ 4:00 pm.
Shara : Myen Mung Sumtsan Salang / Hkanse Rung
Shinagawa, Tokyo, Japan.

MATSING;
Tianang a Htunghking bu hpun palawng ni bu hpun sa wa shajang ga.

Hkungga kam hpa let,
Mung Shawa Padang Hkrunlam
Woi Awn Kommittee.
Tokyo, Japan.

MATUT HTI NA »

UN GARUM NUMTUM HPUNG NI MAI JA YANG DE DU

March (28) bat Masum
Wunpawng Mungdan Shanglawt Asuya Dap Ba (3) Up hkang ginra rai nga ai Mai Ja Yang mare de UN kaw na garum numtum hpung ni mani March (27) ya shani du shang wa ai lam shiga na chye lu ai. UN garum numtum hpung ni kawn Mai Ja Yang kaw du nga ai hpyen yen tsim yam ni hpe shata mi na matu n-gu, jum, sau, shapre, family kid hte Nutrition ni hpe wa garum ya lai wa sai lam shiga na chye lu ai.

MATUT HTI NA »

KIO A RA LATA POI HTE SENG NNA NDAU LAIKA

MATUT HTI NA »

MYEN HPYEN NI WAN NAT AI NTA NI

March (28) bat Masum
Jinghpaw Mungdaw Myitkyina-Manmaw lam Nam San Yang mare hta March (25) ya shani myen hpyen hpung ni wan nat kau ya ai nta ni gaw lawu na hte maren re,

1. Jan Mali Hkawn Bu a nta
2. Slg. Mali Tawng a nta
3. Jan Ban Mun a nta
4. Slg. Gyung Dau a nta
5. Slg. Mali Tu Hke a nta,
6. Slg. Gawlu Brang Tawng a (အေမ့အိမ္) manam jarawp ni rai ma ai.

MATUT HTI NA »

MIWA HTE MYEN MUSE KAW BAWNGBAN NA

March (28) bat Masum
Miwa mung asuya hte myen hpyen asuya ni dai ni Sam Mung Muse mare kaw hkrum bawngban na re lam shiga na chye lu ai. Hpa baw gabaw hte bawngban sa wa na re hpe gaw hkra n chye lu shi ai. Hkrum bawngban na matu miwa salang ni dai hpawt daw hta Muse maga de rap mat wa sai lam shiga hpe mung na chye lu ai.
Ya ten hta Miwa mung kata myen mung masha ni hpe grai rim taw ai lam gaw Miwa mung Nshawn Pa maga de myen hpyen la (300) jan lagu rawng taw ai nga lam hpe Miwa asuya ni chye kau ai majaw re lam hpe mung na chye lu ai. Ya ten miwa mung kata du nga ai myen ni gaw Miwa balik ni hpe jawm a dup ai, mung masha ni kaw na lagu, gashun ai lam ni galaw ai majaw grau rim taw ai re hpe mung na chye lu ai.

MATUT HTI NA »

HKA LA KAW LAJA LANA GAP NGA

March (27) bat Lahkawng
Wunpawng Mungdan Shanglawt Asuya Dap Ba (5) Ginra rai nga ai Hka La bum kaw KIA ginjaw shim lam dap na myu tsaw share shagan ni hte myen hpyen asuya hpyen hpung ni gaw ya ten laja lana gap gasat nga ai lam shiga na chye lu ai.

MATUT HTI NA »

ZUPHPAWNG MATSING

Wunpawng Mungdan a mungmasa hpyenmasa hte seng nna maram masam zuphpawng hpe 2012 March 20 ya shani hta hpawng ai hpe Salang Puk Dun gaw lawu na hte maren ka matsing da wu ai.

LAGANG:- Shata kadun laman KIO kasa hte Myen kasa ni simsa lam 3 lang hkrum bawng wa ma ai rai yang hkrum bawng magang majan kaba wa magang rai wa sai. Maw lanyet nga ai Myen hte aten shama hkrum bawng chyai ai baw n rai sai. Prat chyanat madu wa ai tinang a mungdan hpe uphkang na matu gadai hte mung n bawng ra ai. Tsep kawp gasat di la nna uphkang sa ai gaw madung rai na re. Rai yang nde a ntsa e Salang Prangtai gaw gara hku mu ai law?

PRANGTAI:- Ntsa lam hku myit yu ga nga yang, ngai mung Salang Lagang a ningmu hpe madi shadaw ai. Raitimung hpaji rawng ai masha kaba ni tsun ai hku rai yang, grai kaba ai mungkan majan langai hte lahkawng hpe jasim la lu na matu hpang jahtum e hkrum bawng ai hte hpungdim dat la ma ai da. Awmdawm ahkaw ahkang lu wa ai mungdan hpe madu la lu na matu mung UN lawm nna hkrum bawng jahtuk la ra ai da. Ga shadawn, hpang jahtum shanglawt lu wa ai East Timor hte South Sudan mung dai hku jahtuk la wa masai, nga ai.

Raitimung ta tut bungli hta galaw wa ai kasi ni gaw langai hte langai n bung ai. Anhte Wunpawng Myusha ni hte byin nga ai manghkang gaw Myen asuya hte re. Dai majaw htap htuk ai ladat lang lu na matu gaw Myen asuya galaw sa ai akyang hpe sung sung hkaja ra na re. Ga shadawn:- Thein Sein asuya gaw 2011 March 30 ya shani lung wa ai kaw nna rawt malan hpung ni yawng hte gap hkat jahkring nna mungdan ting hta ngwi pyaw simsa hkra galaw na lam marawn wa sai. Dai ten hta KIO gaw gap hkat jahkring tawn ai 17 ning pyi rai wa sai. Raitimung 2011 June 9 ya shani kaw nna Myen hpyen dap gaw ma ja rai KIA hpyen hpung hpe shang gasat wa nhtawm kaga rawt malan hpung ni hte rai jang yawng hpe hkalem la nna gap hkat jahkring la nu ai.

Thein Sein gaw KIA hpe gasat nga ai kaw na dawm kau na matu shi a hpyendap hpe matsun magang, laja lana gasat wa magang rai wa sai. Mabyin hpe yu yang asuya hte hpyen dap lapran shada a matsun hpe n kaw hkat ai zawn byin pru nga ai. Lani mi Thein Sein gaw Indonesia kaw ASEAN zuphpawng sa lung nga yang shi laika sang lang poi galaw nga ai ten hta Myenmung na rawt malan hpung ni yawng hte gap hkat jahkring kau lu nna mungdan ngwi pyaw simsa nga sai lam tsun wu ai. Dai shaloi shi laika sara langai kaw nna, "Nang tsun ai gaw mungdan ting ngwi pyaw simsa sai nga ai. Ya yang KIA naw gasat nga ai hpe gara hku ngu na" nga nna san dat wu ai. Dai shaloi Thein Sein gaw shi a kraw kaw makoi da ai hpe ndum sha-ip nna marawn dat wu ai gaw, "KIA hpe lani laman shamyit kau na" nga nna mahtai jaw dat ai. Prat kau sai mayen hpe n mai ma-ut sai. Shing re ai majaw shinggan de gaw KIO hpe gasat nga ai kaw na dawm kau sai lam ndau shabra nna, ta tut kaw gaw laja lana gasat na matu matsun nga ai gaw asan sha dan dawng nga ai.

Kaga rawt malan hpung ni hte gasat jahkring tawn sai rai nna, dai ginra hkan e n-gasat ra ai sha majen je bang wa nna laknak hte malu masha ni hpe mung jahting tawn mat wa magang sai. Mungmasa hku nna Daw Suu hkaw tsun hkawm ai hpe aja awa hkan ninghkap ai lam, signboard ni jahten sharun kau ya ai lam, jahpyak ai lam amyu myu galaw nna, n-gup hku nna gaw NLD hpe ra lata poi kaw dang shangun mayu ai lam hkalem tsun nga ma ai. 2008 constitution kaw President gaw mungdan kaw tsaw htum ai power lu ai lam ka da nga ai. Maga mi hku rai jang gaw, hpyen dap gaw ra wa yang asuya hpe daru magam zing la mai ai power lu ai lam shanhte shada a lapran kaw nhti nhtang maw lanyet dan hkat nhtawm mungmasha ni hpe ra mi rai myakle madun chyai na matu mahkrun myu langai a hpang langai hkyen tawn magang ai lam rai nga ai.

PYILAN:- Tsun lai wa sai salang yan a ningmu ni gaw ram ram manu rawng ai re ngu hkam la ai. Sinna mungdan de myiman tam mayu nna "Myitsone dam hpe jahkring sai" nga ndau dat ai shaloi masha wunawng uwa kaw na madi shadaw wa ai shaloi maga mi de pawt sindawng wa ai Miwa hpe rai jang KIO hpe lu shamyit kau ai hte shanhte a project bai matut galaw shangun na, nga nna shanyam jaw ai rai na sai. Shing rai UN, EU, USA, ASEAN, China India zawn re ai in hpe langai hpe ladat amyu myu hku nna aten langai laman jahtuk tawn lu ai hta hkan nna Myenmung gaw tsawm htum ai Miss Universe hpe mungkan ting e myit jawm shang sha nga ai zawn re ai ten rai nga ai. Kaja sha nga yang, dai mungdan ni, dai uhpung ni gaw shim lam, sut masa lam, mungmasa lam gat lawk kashun hkat na matu Myen mung gaw strategic point ang nga ai lam madung rai nga ai. Hpraw san ai hte myit shang sha ai gaw n lawm na n hten! Shakut nna myit hpe galu ai hta aten shadawn sharam ai lam nga na re majaw dai ni na ten hta sharang lu ai atsam rawng tim hpang jahtum e manghkang pru wa na masa nga ai.

Wunpawng myusha yawng gaw myutsaw mungtsaw myit kaba nga ga ai majaw mungkan jut shagu kaw du nga ai hpu nau hkum dek shagu gaw tinang nan majan pa kaw nsa gasat lawm lu timung lu wa ai shabri shabrai kaw na n law htum shata shagu USD10 hte manu bung ai tinang du nga ai mungdan na currency hpe shagun ya nga ai hte garum jaw ai ni kaw na majan hta gara hku akyu jashawn nga ma ai lam chye mayu ai shiga na lu ai. Ndai ga san hpe mahtai jaw na matu Pyilan kaw lit n nga ai raitim, shara shagu lam jarit n ma, pyen hkawm nna sagawn la lu ai shiga hpe lawu na hte maren matut shalai dat ai.

USD10 gaw manu grai rawng ai. Maigan du nga ai myutsaw mungtsaw hpu nau ni gaw mun lam sen lam rai nga ai majaw n-gun kade kaba ai hpe maram la mai nga ai. Gat lawk hta hkan nna USD10 gaw pala kaji 10 grup yin mari mai nna, shingte chye ai atsam hta hkan nna tai hpyen ni hpe shagrawt kau lu nga ai. Kalang marang pala langai a atsam gaw Myen hpyen du kaba langai a asak hte galai la lu ai. Pala mari mai ai gat lawk gaw gara kaw rai ta, ngu yang, dai gaw tak la ai baw she re da. Myen hpyen la langai majan kalang gasat yang pala 30 gap kau nna 300 gap kau sai lam ntsa de tang madun dat ai shaloi gat lawk de pala 270 shalai dat mai ai da.

Dai majaw Myen hpyen daju de na du kaba ni grai jawp nga masai da. Dai daram re ai majan hta pala mun lam she ma na re. Raitim tang madun wa ai chyarang gaw wan kaba rai mat ai nga nna jawm mau nna jep sagawn nga ma ai da. Shing rai lani hte lani gat lawk n bung ai zawn manu mung n bung ai da. Dai majaw aten galu hta majan gasat wa lu ai gaw sumtsan de na myutsaw hpu nau ni shata shagu garum dat ai ja gumhpraw a ntsa e, hpyen man kaw du nga ai myutsaw share shagan hpyen du hpyen la ni a asak ap nawng let majan poi shang nga lu ai marang e, awngpadang shu la lu nga ai rai sai. Dai hta n-ga, malu masha, tsi mawan myu hkum sumhpa mari ai zawn re ai hta akyu jashawn nga ma ai lam na chye lu ai.

Wenyi lam yan hta woi awn nga ai KBC hku nna mung hpung masha ni garum ningtum ai alu ni hte hpyen yen dabang de du hkra sa nna bu hpun palawng, lusha, tsi mawan ni garan jaw ai sha n-ga hpyen yen ni myit daw hten ai lam n nga na matu mung wenyi lam yan hku nna Yehowa a mungga htawn shalai ai lam, kyu hpyi ai lam zawn re ni hpe aja awa ta tut shang lawm let ap nawng woi awn nga ma ai re.

PRANGTAI:- Salang Pyilan gaw jut shagu hkan e pyen du hkawm lu ai hta n-ga, hkum kaji nna zet tsang ai nga yang masha ni n hkan mu dat ai shara hkan du hkawm lu ai majaw kai chyan bungli hta grai hkik taw nga sai. Ndai zuphpawng hta garan kachyan galaw hkat ai ningmu yawng hpe ginchyum dat ai shaloi lu wa ai mahtai gaw, lai wa sai shata 10 laman KIO hku nna Myen asuya hte hkrum bawngban daw dan wa ai lam gaw amyu hte mungdan a shawng lam matu htap htuk manu rawng nga sai ngu mu lu ai rai nna, KIO/KIA Ningbaw Ninglaw ni woi awn sa wa nga ai mungmasa hpyenmasa yi-ngam hpe ndai zuphpawng kaw nna aja awa madi shadaw dat ai law.

Puk Dun

MATUT HTI NA »

MARE MASHA (5) HPE MYEN HPYEN NI JAHKRUNG HTU LUP

March (27) bat Lahkawng
Wunpawng Mungdan Shanglawt Asuya Uphkang Ginrai rai nga ai Myitkyina-Manmaw lam n tsa Nam San Yang mare makau na Ban Dawng Yang mare masha marai (5) hpe myen hpyen hpung ni March (26) ya shani jahkrung htu lup kau lai wa sai lam shiga na chye lu ai. N dai zawn htu lup kau ai hta la (2), num (3) re lam hpe mung na chye lu ai. Myen hpyen ni gaw mare masha ni a nta ni hpe mug wan nat kau ya ai majaw mare masha ni a nta ni mung n nga mat sai lam matut na chye lu ai.

ကခ်င္ျပည္နယ္ ျမစ္ၾကီးနား ဗန္းေမာ္လမ္း နမ္ဆန္ယန္ရြာ အနီး ဘန္ေဒါင္ယန္ရြာမွ ရြာသား (၅) ဦးကုိ ဗမာစစ္တပ္က မတ္လ (၂၆) ရက္ေန႕တြင္ အရွင္လတ္လတ္ေျမျမဳပ္သတ္ပစ္လုိက္ေၾကာင္းသတင္းရရွိပါသည္။ အရွင္လတ္လတ္ ေျမျမဳပ္ သတ္ျဖတ္ခံလုိက္ရသူမ်ားမွာ ဘန္ေဒါင္ယန္ရြာမွျဖစ္ျပီး က်ား (၂)ဦး၊ မ (၃)ဦး ျဖစ္ေၾကာင္းသတင္းရရွိပါသည္။ ဗမာစစ္စစ္တပ္ မ်ားသည္ ရြာသားမ်ားကုိ သတ္ျဖတ္ယံုသာမက ရြာသူရြာသားမ်ား၏ ေနအိမ္မ်ားကုိလည္း မီးရွုိ႕ဖ်က္ဆီး ခဲ့ေၾကာင္းသတင္းရရွိပါသည္။

MATUT HTI NA »

UN NI HPYEN YEN NI HPE GARUM LA

March (27) bat Lahkawng

Jinghpaw Mungdaw kata hpyen yen tsim yam ni hpe garum shingtau na matu UN garum ningtum hpung ni gaw Jinghpaw Mung de du shang wa sai lam shiga na chye lu ai. March (26) bat Langai ya shani Jinghpaw mung hte Miwa mung jarit rai nga ai Sadung Mare, jarit masat shadat (8) de du shang wa sai lam, hte dai mare na hpyen yen dabang hta shanu nga ai tsim yam ni hpe garum la lai wa sai lam mung na chye lu ai. Ya hten n ta dinghku (228) marai (1123) hpe garum ya lai wa sai hte matut nna mung naw garum taw nga ai lam na chye lu ai. N dai UN garum ningtum hpung ni gaw hpyen yen tsim yam ni shata mi lu sha a matu garum ya lai wa ai re lam, n dai garum ningtum hpung ni hta (UNOCHA), (UNICEF),(UNHCR) ni shang lawm garum lai wa ai re lam na chye lu ai. Yangon daju UN uhpu uhpawng a lit nga ai Dr. Moe Aung woi awn ai garum ningtum hpung ni mung gade nna yang Mai Ja Yang de du shang wa na re lam hpe mung na chye lu ai.

MATUT HTI NA »

DENMARK NI HPYEN YEN NI HPE GARUM

March (26) bat Langai

Denmark mungdan Aero mare hta shanu nga ai Jinghpaw Wunpawng myusha ni hte hpunau hkang myusha ni gum hpawn let Karai Kasang a chyeju san san a majaw sha jawm hpaw ninghtan da ai ( ACF) Aero Christian Fellowship Myanmar gaw, majan a majaw tinang dum n'ta ni hpe kau da let hprawng hkawn ra nga ai hpyen tsin yam hkrum jinghpaw wunpawng myusha ni a matu Denmark gumhpraw 5500 kr, Myen gumhpraw lap 700000 tup hpe March shata 25 ya laban shani hta garum jaw lai wa sai lam shiga na lu ai.

N'law la ai rai tim n'dai garum gumhpraw hpe gaw ( ACF) Aero Christian Fellowship Myanmar, hpung masha ni nan lit la let, grau na yak hkak jam jau nga ai tsinyam dabang ni de ading taw jaw garum mat wa na re lam matut na chye lu ga ai.

Ja gumhpraw hte n'lu garum la ai ten ni hta rai tim ( ACF) Aero Christian Fellowship Myanmar, hpung masha ni gaw tut nawng e Akyu hpyi ai hte garum shingtau nga ai hte du na ra ai ten ni hta mung dang di dang dep ai n'gun a tsam hte matut garum mat wa na re lam shiga na lu ai.

MATUT HTI NA »

CHYAM YU SAGA

Magam bungli masing langai mi hpe masing jahkrat hkrang gran tawn nna lamang mahkyen hte galaw sa wa yu ai shaloi awng dang ai hkrat sum ai, jaw ai n'jaw ai hpe maram yu nna matut galaw mai ai n'mai hpe mu chye chyalu rai nga ga ai. Shaning 60 ning jan wa galaw yu hkam sha lai wa yu saga ai. Ya dai ni mung masa bawng ban na matu mung shakut wa yu saga ai.

1-Mung masa bawngban ai.
Mung masa bawngban sa wa na hpe mung ngai hku na ndai hku dinglun maram yu lai wa sai re, shawng lang anhte bawngban yu ra ai, shaloi she myen asuya a manaw hte mahkyen hpe mungkan hte mung shawa gaw asan pra mu chye wa lu nna myen gaw kade ram manai makai masu magaw nga ai hpe mungkan de grau grau htawng madun wa lu na re hte kaja ai mahkyen nga ai, n'nga ai hpe yawng asan pra grau chye lu na re zawn grai n'bawngban ai ten hte bawngban ai hpang na mabyin hpe ta tut grau maram mu chye wa lu na re ngu mu ai.

2-Bawngban n ra sai.
Moi mung lang hte lang bawngban yu sai, myen a masa mahkyen masing gaw laklai wa ai lam n'nga ai hta n'ga grau pyi she hpyen masa shaja wa ai, grau she wa nyem roi galaw wa ai, mung masa bawngban na tara shang rapdaw nga jang bawngban na re nga maw lanyet shaw wa sai ya rapdaw nga sai kara kaw ta? Myen hpe mai kam na, ya dai ni annau ni myit galu galang hte masu ai myu re chye nga tim n'ju ndawng ai myit hpe shingdu tawn kau nna, bawnu salum pusin kan nrut nra ni hta n'kaja ai chye nga ninglen manam tim sharai shading ai myit, hkristan myit jasat hte manam puk na hkyen wa saga ai, rai yang annau ni hpe dang sha ai myu re, u shoi kya ai myu re nga sawn shadu nna grau pyi she sat shamyit wa ai lu lawm ai lam shinggyin ahkaw ahkang n'yu ai, grau she zingrut htu wa nga sai. Kara kaw ta mung masa bawngban na mahkyen, dai manaw sha naw shapraw dat ai hte akawng amyin wa garang nna grau she dakak nga sai.

Bawngban yu nna shaning galu maran yu wa saga ai, ya dai ni hkyak hkyak mung bawng yu sai byin mung byin hkrum hkra yu saga ai. Dai majaw myen asuya hku nna kaja nan hpyen masa shayawm nna myit san seng lam teng nga ai shanhte hku nna bawngban shaga wa yang pyi lapran Slg tai ya na maigan rapdaw langai kaw na n'lawm yang gaw kade lang mi bawng tim lachyum pru na nre. Rapdaw gaw mung masa bawngban ga nga tim hpyen dap kaw na gaw gasat tik tik rai nga ai gaw lahkawng pawng tim langai sha re lachyum pru nga ai, rapdaw hte hpyen dap gaw hkum shan langai zawn rai nga ai, hpa majaw nga yang hpyen hpyi galai tawn ai hpyen du ni hte gawda ai rapdaw re. Ya hkyak hkyak shaning 60 jan kalang mung simsa lam n'la ga yu ai hpu nau Kayin (KNU) ni hte simsa lam la lu ai gaw mungkan hpe htawngdan na myen a mung masa amyat kaba re zawn annau ni hpe gasu kabrawng hpung re nga grau nna madi madun na n'gun manaw rai nga malu ai. Kade ram kaja lu na ta? KNU yu ni kade ram hkam jan lu na kun? Maram yu ga.

Madu a myit ra ahkaw ahkang dawdan mahkret pa gaw tinang a matu ahkyak dik ai zawn myu sha yawng a matu mung ahkyak dik ai re, hpa majaw tinang myu hpe sat sharu shamyit nga ai ni a matu naw galaw ya mayu nga myit ta? Sutgan yawng ginlut hkrum nna matsan mayan jamjau jamhkaw byin nga ai tinang saidaw saichyen ni hpe yu nna ja ja myit yu ga, nang hpunau wa tinang myu a matu kade ram lu galaw ya lu na ta? Chye nga ninglen naw chyam yu na kun? Na hpu dik ai ten hpe dai zawn re kaw jai lang kau na sai kun?

Rai sa hpu nauwa rapdaw kaw U HKA hpung kaba hta nang hpunau wa U TAWNG tai nna gade ram shatsawm jahtap sharai shading lu na ta? [Tara n-lang ai ni a bawng ai hku hta n-hkawm, Yu bak kap ai ni a lam e n'tsap, Jahpoi ai ni a hpawng hta n-dung lawm ai sha. 1Shak 1:1] ndai Chyum mungga hpe nang hpu nau wa alang lang hti yu sawn yu na nit dai. Nang bang dat ai na manu dan dik ai ahkaw ahkang pa gaw chyasam ni bungli kaw arang bang dat yang nang kade amyat lu na ta? Madu myu sha ni yup n'pyaw, sha n'mu, nga shara garen rai n'ji nmu, jam jau hkrum nna hkrap myipwi pru yawn madai nga ai ten hte madu saidaw sai chye ni asak law law ap nawng nna majan pa hta saihka galwi nga ai, mare kahtawng law law nat hkrum nga ai, roirip hkrum nga ga ai le. Dai hpe hpa hte shatai nna myit jasat na ta? Jaw sai kun?

Moi shawng de Shanglawt ningnan hpang ai ten kaw na ga sadi la sai hte maren Karai mung chye sai masha mung chye sai hte maren Awmdawm Shanglawt sha n'lu dingsa gasat na nga nna ga shaka tawn da nna dai ni du gasat rawt malan sa wa saga ai dai hpe dai ni shadik shatup ra ai. Karai Kasang hpe sadi n'hpyen ga, kaji kawoi ni hpe sadi dung ga, myu a matu du baw law law hte hkala n'ba hkrum nna hkum hkrang law law sak jaw ai ni hte jam jau law law arang bang nga sai hpe dum nna langai sha ngam tim gasat ga. Garan saga. Mungkan mungdan law law mung dai hpe myit mada nga ai re.
Shanglawt sha nlu dingsa gasat ga.

Baren Numraw

MATUT HTI NA »

HPYEN YEN NI A N SEN

MATUT HTI NA »

DUM BANG BUM KAW GAP

March (25) Laban
Wunpawng Mungdan Shanglawt Asuya Dap Ba (5) grinra rai nga ai, Myitkyina-Manmaw lam Dum Bang Bum kaw KIA myu tsaw share shagan ni hte myen hpyen asuya a hka-la-ya (388) ni dai hpawt daw hta laja lana gap gasat lai wa sai lam shiga na chye lu ai. Myen tai hpyen hpung ni gaw Namsan Yang mare de laknak kaba ni hte gap sharu bun ai lam hpe mung na chye lu ai.

MATUT HTI NA »

LAGAT BUM POST HPE BAI LU ZING LA

March (25) Laban,
Wunpawng Mungdan Shanglawt Asuya Dap Ba (3) Ginra rai nga ai Lagat Bum Post hpe March (24) ya jahpawt daw hta myen hpyen hpung ni n gun kaba hte shang htim ai majaw gan yen kau ra ai lam na chye lu ai. Dai shana sha (March 24) ya shana maga KIA myu tsaw share shagan ni kawn n gun hte bai lu htim zing madu la sai lam shiga hpe mung na chye lu ai. Gasat majan kata lam shiga hpe gaw a tsawm hkrak rai n chye lu shi ai.

MATUT HTI NA »

MYEN DAP UP LANGAI HKRAT

March (25) Laban,
Wunpawng Mungdan Shanglawt Asuya Dap Ba (3) Ginra rai nga ai Mai Ja Yang hte Loi Je mare lapran kaw March (24) ya shani myen hpyen hpung ni hte KIA myu tsaw share shagan ni laja lana gap gasat lai wa sai lam shiaga na chye lu ai. N dai zawn gap gasat ai hte myen hpyen maga na tat-yin-mu (Dap Up) langai hkrat lai wa sai lam hpe mung na chye lu ai.

MATUT HTI NA »

JA PU HTE JA HTA KAW LAJA LANA GAP NGA

March (24) bat Kru,
Wunpawng Mungdan Shanglawt Asuya Dap Ba (5) npu, Dung (3) Ginra rai nga ai Ja Pu mare hte Ja Hta mare lapran kaw KIA myu tsaw share shagan ni hte myen asuya a hpyen hpung ni laja lana gap gasat nga ai lam shiga na chye lu ai. N dai majawn gaw ya ten du hkra matut manoi gap gasat nga ai lam shiga na chye lu ai. N dai zawn gap hkat ai hta tinang KIA myu tsaw share shagan maga na hka la hkrum ai ni lawm ai lam hte myen maga na law law wa hkala hkrum nga ai lam hpe mung na chye lu ai.

MATUT HTI NA »

KIO A MARCH 24 YA SHANI NA N DAU

MATUT HTI NA »

N PAWN BUM KAW MATUT GAP NGA

March (23) bat Manga,
Wunpawng Mungdan Shanglawt Asuya Dap Ba (5) Ginra rai nga ai N Pawn Bum hte Ziabru Hka makau ni hta KIA Ginjaw shim lam hpung ni hte Dung (23) na myu tsaw share shagan ni gaw myen hpyen asuya a hpyen hpung ni hte matut manoi gap gasat nga ai lam shiga na chye lu ai. Myen tai hpyen ni gaw Gang Dau Yang Mare kaw na laknak kaba ni hte majan ginra ni de gap sharu bun nga ai lam ni hpe mung na chye lu ai.

MATUT HTI NA »

SINLUM LAM DE GAP

March (23) bat Manga,
Wunpang Mungdan Shanglawt Asuya Dap Ba (3) ginra rai nga ai Manmaw-Loi Je lam Sinlum lam mayan de KIA Dap Dung (21) na Myu Tsaw Share Shagan ni hte myen hpyen asuya a tat-ma (88) na hpyen hpung ni gap gasat lai wa ai lam shiga na chye lu ai.

MATUT HTI NA »

JE YU JE TSAN AI HPA

Jeyu jetsan ai hpa, sumtsan pala hpa, n'dung lahkum hpa, nga nna naw kaji ai ten shada da gasan gahtai galaw tsun chyai lai wa sai hpe kalang mi bai ja ja myit dum shingran ai. Marit maroi nga ma prat na zawn galoi bai ngwi pyaw simsa lu na sai kun ngu shaning grai na hkra marit dik yu sai tim, myit mada ai gaw shingran hta pyi grai nmu shi nga ai hpa hta shatai nna pandung shadaw kam hpa marit shatai let n'gun dating na rai ta? Ni nga nna tsan ai zawn nga hkam sha ra nga ai hpe myit n'gut nngai. Ngwi pyaw simsa shim lum ai hpe chye hkam sha nna nlu hkam sha lu ai gaw hpa majaw ta? Kade majaw ta? Labau jaw ai amyu jaw ai prat a shingra maka lit hpe annau ni tinang lahpan tsap nna dawdan hparan sa wa yang she yawng marit ai simsa ngwi pyaw shim lum ai teng hkam sha lu na re.

Annau ni lamu ga de n'tara ai tawt lai shang kabye sha nga ai chyasam yawng hpe lawan chyawm gawt kau ra saga ai gaw yawng chye nga ai, dai gawt kau lu na n'gun gaw annau ni a myit hkrum gumdin ai n'gun hte chyahtum chyalai n'gun rawng ai Yehowa hpe kamhpa nna teng gasat yang gaw teng annau ni ra ai awmdawm ahkaw ahkang ten kadun hta lu nan lu na re. Myen hte hpa rai bawngban chyai nga na ta? Annau ni yawng KIO/KIA a lam woi ai npu de kara shara mi nga nga ya jang lawan wa nna n'gun jat ai hte lamu ga zing majan hpe baw ra sai. Shakre majan hpe hkyen gasat ra sai.galoi asum n'jaw ai magrau grang ai myit marai hte gasat yang gaw lamu madu aga madu Yehowa gaw na ya ai hte jaw chyalu re annau ni myit masin hpe yu nga ai. Shanglawt gaw lu chyalu re, shanglawt ai myit jasat myit marai n'rawng yang gaw hpa di na, mungdan mung lu chyalu re, mungdan lu na magam myit, madu myit n'rawng yang gaw hpadi na?

Myen gaw shanhte kata de hte mungkan hpe sha kaja hkra htawng dan galaw dan nga ai gaw yawng chye sai hkrai re tim annau ni mung madu hkum hpe masha ni yu yang hkum lawm hkra atsawm hpun magap tawn ra nga ga ai. Shinggyin ahkaw ahkang ntawt lai hkrup hkra grai shen yu dinglit yu nna galaw ra sai, teng man ai majan re majaw lam shagu hta teng man ra sai, tengman ai sakse kasi madun ra sai. Dam lada ai myit jasat myit masa, sari sadang rawng ai kyanglai len, madu myit rawng ai shawa bungli hte hkrat hkawm sa ra sai.masha ni a yu kaji kau na akye kabye kau na lailen masa ni hpe koi yen kau ga.

Mungkan mungdan law law gaw sutsu ai n'hprang rai hkum ai mungdan re majaw myi ju nga ai, dai hpe yu nna myen a ga manaw hpe nkam yau tim yau ya ra ai. Grit nyem dik ai masha ngasat ngasa hpe yu nna maigan mungdan law law gaw mayen ginyu hkumbai she kabya hpaga masa hpe yu nga ai ten annau ni tinang lamu ga na nhprang rai ni hpe ja ja ninghkap dan ra ai zawn dai masing ni hpe majan man langai hku masing jahkrat gasat shatsang sa wa ra ai.bungli galaw masha ni hpe nmai galaw hkra lu sha lam hpe ladat tam nna gasat ra sai.sinat hpai ai sha hpyen nmai shadu sai, ahkang nlu ai tinang lamu ga hta wa galaw sha nga ai hpaga hpung yawng hpe gasat ra sai, dai she grau ai hpyen kaba re.

Myen gaw annau ni hpe kasu kabrawng hpung jahten sharun hpung nga nna grau nna lu madi madun hkra shakut nga na sha re, Manmaw Myitjina lam hpe bai gram na nga ninghpai nna anhte hpe bawm kapaw ai lam mahkrai jahten ai kasu kabrawng hpung re nga tsun nan tsun chyalu re, mali hka madim yawng hte hpakan hpe pat nan pat kau ra sai. Tsaw ra hkungga ai Chyurum ai myu sha ni e Karai jaw ai ninghtoi gaw du nga sai, Madu lamu ga zing madu la ai majan shakre shagrawt majan gaw ya jang hpang wa sai re majaw lawan wan myu sha yawng n'gun gakyin shabawn n'gun dating gasat sa wa saga law.

Yup n'pyaw sha n'mu ai shani shana ni grai lai wa saga ai ya dai ni kaw na gaw yerihkaw bunghku run agrawp mat ai myit shingran Karai hpe kam sham kamhpa nna myu sha ni a jamjau jamhku nni n'hkri,yawn hkyen myi prwi katsu ai sai hka lwi nna arang bang lai wa sai hkrun lam galu majan hpe annau ni ban hta shakre kau lu hkra shakut sa wa ga.
Shanglawt gaw annau ni hpe la nga sai.

Baren Numraw

MATUT HTI NA »

MUNGDAN SHAMAT NA CHYINGHKA HTE SHALAWT NA CHYINGHKA

MYU HTE MUNGDAN HPE SHAMAT KAU NA CHYINGHKA (2) HTE MYU HTE MUNGDAN HPE SHALAWT LU NA CHYINGHKA (1)

Annau ni hta Myu hte Mungdan hpe shamat kau na chyinghka (2) nga ai. Ndai Chyinghka gaw grai hkrit tsang ra ai chyinghka re. Shang shut jang bai pru nmai ai chyinghka re. Ndai Chyinghka gaw Myen a n-gup kaw nna ga ngwi ga pyaw hte 1947 ning hta Bo Chuk Awng San wa hpaw dat sai re. Ndai Bo Chuk Awng San wa hpaw dat ai chyinghka ga baw hta gaw Amyu n-ginghka ai, Maren Rap Ra ai Ahkaw Ahkang a kata kaw, Madu Uphkang ai Mungdaw ni yawng jawm pawng nna jawm shakut na hku re da. Ndai grai madat pyaw ai ga baw hte hpaw dat ai chyinghka hta Anhte a hpushawng hpuba ni grai kam ai hte shang shut ai majaw Annau ni dai ni du hkra nlu pru shi ai naw chyat rawng taw nga ga ai re. Ndai gaw Myu hte Mungdan hpe shamat kau na matu hpaw dat ai chyinghka (1) rai nga ai.

Ya kalang mi bai Bo Chuk Awng San a kasha Awng San Suu Kyi gaw Democracy ga baw hte No-2 ngu na chyinghka kaba bai hpaw dat sai. Mi na chyinghka No-1 chyinghka kaw shang shut ai kaw nna pyi rai nlu pru shi ai ndai ten hta ndai No-2 chyinghka hta bai matut gahtap shanglawm jang gaw annau ni a Amyu hte Mungdan myen a kata kaw nna lawt pru lu na lam n-nga mat sai re hpe Wunpawng Sha ni yawng hkumtingdek dum ga, chye na ga.
Tsun mayu ai gaw annau ni a PANDUNG SHADAW gaw democracy lu nna sha rai n-ngut shi ai. Annau ni tsep kawp Awmdawm Shanglawt sha nlu yang gaw htawm hpang de lani mi na hta Amyu mung mat,Mungdan mung mat na re.

Awng San Suu kyi woi awn ai Democracy mung, Kawa Bo Chuk Awng San woi awn ai PANG LUNG GA SADI zawn rai mat na ra ai. Ndai ten hta Awng San Suu Kyi sat hkrum chye ai. Nsat hkrum hkra raitim shi si mat ai hpang gaw jet ai Democracy de mai byin na nre. Hpa majaw ngai ndai zawn tsun lu ai i? Ndai mungkan ga ntsa e Democracy a shingdu labau ni hpe yu ai shaloi Karai Kasang rai nga ai Madu Yesu hpe nlu la ai laga makam amyu ni hta jet ai democracy hpe nmu lu ai. Dai majaw madu Yesu hpe nlu la ai myen amyu ni woi awn ai democracy kaw tsep kawp nmai hkan nang ai. Tsep kawp nmai kam ai. Myen Amyu ni gaw shanhte naw ai, shanhte a karai kasang rai nga ai Hpunggyi hpe pyi maidang htawng ya. Baw ni bye ya nna majoi sat sharu kau ai ni rai ma ai. Dai zawn re myen amyu ni woi awn ai democracy kaw nmai hkan nang na re yawng dum ga.

Annau ni Awmdawm shanglawt lu jang Karai Kasang ra sharawng ai Democracy hpe gaw gap la mat wa na rai ga ai law. Myu hte Mungdan lawt pru lu na Chyinghka law law nnga ai. Daini Wunpawng Mungdan Shanglawt Asuya KIO/KIA gaw Myu hte Mungdan lawt pru lu na matu Karai Kasang lam woi nga ai re ngu ai hpe tsep kawp ga lahtum n shut kamhpa ai hte, ja ja myit hkrum ai hte jawm shakut ga law.
Ndai gaw Annau ni a Myu hte Mungdan lawt pru na chying hka No-1 nan rai nga ai law.

Sau Nan Du
Sweden

MATUT HTI NA »

SINLUM PANGMU KBC NAWKU JAWNG MYEN NI JAHTEN

March (23) bat Manga,
Jinghpaw Wunpawng Hkalup Hpung (KBC) a labau shang masat Manmaw Ginwang Sinlum, Pangmu mare na Nawku Jawng kaba (Dr. Ola Hanson Masat Nawku Htingnu) hpe myen hpyen ni gaw March (13) ya shani jahten shaza ya lai wa sai lam shiga na chye lu ai. Nawku Jawng na Hpung Masha jahpan laika buk ni yawng hpe mung wannat kau ya lai wa ai lam, Sinlum Pangmu Duwa Rev. Lahpai Zau Tu aru arat ni a Lahpai Du Nta kata Dawdap kaw Myen Hpyenla ni ndai zawn ayai aya hpya kau nna arung aria ni hpe mung shaw la kau ya ma ai lam shiga na chye lu ai.

MATUT HTI NA »

RESETTLED ETHNIC REFUGEES IN HTE US CALL GREATER ACION TO END SYSTEMATIC HUMAN RIGHTS ABUSESE AGAINST ETHNIC PEOPLE FO BURMA

Thanks to all who signed the petition! With the help of the resettled refugee communities from 67 cities in 29 states, we were able to gather nearly 5,000 signatures urging Ambassador Mitchell to use his position as the U.S. Special Representative and Policy Coordinator for Burma to pressure the Burmese regime to stop committing widespread and systematic human rights abuses against ethnic people.

MATUT HTI NA »

SHARA SHAGU GAP

Wunpawng Mungdan Shanglawt Asuya hte myen tai hpyen ni gaw Myitkyina lam ningmaw mayan hta, Namsan Yang e gap hkat ai; Manmaw, Daw Hpum Yang, Gangdau Yang de Myen hpyen n-gun ningnan dingyang matsut bang nga ma ai lam na chye lu ai. Bai Sinbo maga de ginra lahkawng hkan gap hkat ai. Seng Maw makau hkan Myen shawa ni hpyen yen hprawng hkawm ai lam byin nga ai hte Laknak n lang, mara n rawng ai kahtawng masawn shawa masha ni hpe matut nna zingri ai, gawt shapraw shachyut ai lam dingyang galaw nga ma ai lam, Ndai aten hta tinang maga hpyen hpung ni larau ladau rai gasat nga ai majaw Myen maga hkala n ba law ai lam hpe mung na chye lu ai.

MATUT HTI NA »

KIO HTE MYEN HPYEN NI LAJA LANA GASAT WA

March (22) bat Mali
Jinghpaw Mungdaw kata Wunpawng Mungdan Shannglawt Asuya KIO/A hte myen hpyen asuya ni ya ten laja laja majan byin nga ai lam shiga na chye lu ai. N dai zawn KIA hte myen hpyen ni gap gasat ai shara gaw, Myitkyina mare kaw na pyi bawm nsen myawk nsen ni na lu ai shara kaw re lam mung na chye lu ai. Myen hpyen asuya a hpyen dai ni dap ting nawng nawng arum ara si hkala sum jawng ai lam hpe mung na chye lu ai.

Buga de na myitsu salang langai tsun wa ai hta, "ya ten myen hpyen a masha ni gaw hpa n chye ai mare masha matsan mayan re ai ni hpe myit kahpra myit kaprau shangun na matu, n teng n man ai shiga ni shamawng bu nga ma ai. Dai gaw kaga n rai; "Laiza de Asuya dap ni shang lu sai," nga ai shiga masu rai nga ai. Thainghmu Zay Yar Aung ngu ai wa, Laiza de she manap shat wa sha sana, nga nna ndau shabra ai mung 100 lang n-ga sai. Ndai zawn n teng n man ai shiga masu ni tsun shamawng ai lam gaw, Myen ni shanhte maga sum machyi ai lam grai law wa sai kumla hpe shadan shadawng ai lam mahtang rai nga ai hpe chye htai la ra ga ai" nga tsun dan wa ai.

MATUT HTI NA »

HKAM LA AI MADANG

Lani mi na nhtoi hta Salang Lagang yan Salang Prangtai gaw Mali hka hku shara mi kaw hkrum shaga ma ai rai yang, shan gaw Myen asuya a ndau ga shaka masum rai nga ai:-
1. Pyi Htawng Tsu Mapyu Koi Ye,
2. Daing Yin Ta Tsi Lung Nyi Nyut Ye,
3. Achuk Acha Ana Ti Tan Hkaing Mye Ye, ngu ai lam htai lai hkat ma ai.

LAGANG:- Shawng de Mali hka hku dingyang hkan e simsa ai hte nga ngwi nga pyaw wa sai rai yang, lahta de na ga shaka masum ndau shabra dat ai hpang kaw nna gaw hka nu hka shi shagu hkan jak ni ngoi garu wa ai hta n-ga, hka kaw chemical amyu myu ru bang nhtawm shinggyim masha ni a akyu ara chyu tam wa ma ai majaw hka na dusat dumyeng ni gaw simsa ai lam n lu, gung lu hkrup sha hkrup nna asak si htum ma wa magang sai.

Kaja sha nga yang asuya kaw nna ndau shabra dat ai ga yan masum a lachyum gaw myusha yawng a matu hte mungdan ting nga ngwi nga pyaw na matu hkam dahka lam nga ai ga sadi rai sai, ngu nna kabu gara hkam la ai re. Pru wa ai mahtai gaw hka nu hka shi hkan e asak hkrung sa wa ai dusat ni si hkrung si htan nga yak wa sai. Grai kaja sai ngu hkam la ai ndau shabra a mahtai gaw hka kaw nga ai dusat dumyeng ni sha n rai, hkarang kaw nga ai dusat dumyeng ni hte shinggyim masha ni mung shanhte a asak lawt lu hkra shim ai shara de hprawng yen hkawm nga masai. Dai ndau shabra laika yan masum a lachyum hpe salang Prangtai gara hku chye na ai law?

PRANGTAI:- Satan tsun ai lachyum hpe nhti nhtang rai nna htai la ra na re. Myit yu ga le. Satan gaw Ewa hpe grai si mani ai ga ngwi ga pyaw hte hkalem dat ai shaloi Ewa gaw kalang ta myit shangsha ya nna satan a man kaw kataw kau nu ai. Dai hte maren lahta na satan a ndau ga yan 3 a lachyum hpe ngai chye na ai gaw:-
1. Anorahta prat, Bayinnong prat zawn mungdan kaw bum nga masha ni lawm tim shanhte a amyu mying n lawm hkra lajang na matu,
2. Bum nga masha ni yawng Myen amyu tai mat na matu,
3. Bum nga masha ni yawng hpe Myen amyu de gale kau lu ai hpang mungdan hpe ginjaw kaw nna tek jum ai lam ngang kang lu na matu, ngu ai re.

Satan tsun ai ga ni yawng gaw, agung alau re ai ga si ga ngau hkrai rai nga ai. Shing rai n htang hku ram ai ni hpe satan wa a lagaw lata shatai nna kayin gaye rai jahtuk lang dat ai marang e, satan wa dingtawk n lu jahten sharun ai rawt malan hpung ningbaw ningla ni hpe amyu shada sat hkat shangun wa masai. Lani mi hta satan wa a lagaw lata shatai tawn ai salang langai rawt malan Ginjaw de du wa ai shaloi, salang nkau gaw shi hpe ntsen ma ai raitim, salang langai tsun ai hta:- "Ngai gaw zen ai wa re majaw nye a makau kaw zen ai masha tawn ra ai", nga tsun nna dai satan a lagaw lata hpe shi a Personal Assistant shatai tawn wu ai. Shing re ai daw dan lam gaw Ningbaw Ningla hpung ting hpe shamyit kau na matu ahkaw ahkang shalat ya ai mahkrun rai wa sai.

Mungkan ga hpe hpan shalat dat ai shani kaw nna satan gaw hkan zauzang shalau hkawm nga sai. Dai majaw "Myanmar Atsa, Dagong Ka" ngu ai maumwi mausa majing hpe n hkap la ai, Myanmar Atsa Kaba U Ka" nga nna hkam la nga ma ai. Shing rai satan gaw Myen amyu ni hta sha sa shang nga ai n re. Mungkan ting na masha ni hta hkan shang shalau wa sai. Ja chyum mungga hpe azin ayang hkaja nna hpaji rawng ai masha ni hpe satan wa nlu gunglau nga ai. Satan wa hpe ninghkap lu ai ladat grai dam lada ai kaw na lakying langai a lam hkaja yu ga.

HKAJA LA GING AI KASI
Myit hpaji hta grai kung kyang ai hpaji ninghkring Dr. Ralph C. Smedley gaw shinggyim masha ni a hkam la ai hta gawngkya nga ai majaw satan wa gaw masha a kraw kaw aloi sha shang shalau lu ai lam asan sha mu wa sai. Masha law malawng hta hkam la ai lam gaw:- Tinang kamhpa ai wa tsun ai hpe aloi sha kam kau ya nna, tinang n ju n dawng ai wa tsun ai hpe n kam madat ya nga ma ai. Dai majaw satan gaw, masha ni hpe shi a atsam hte dingtawk n lu jahten sharun ai rai yang, shi jahten sharun mayu ai wa kam sham ai mahkrun hku sa wa ai hte awngdang lam lu wa ai hpe asan sha mu wa sai. Dai majaw Dr. Ralph C. Smedley gaw 1924 ning kaw nna California, Sata Anna mare kaw na ramma ni hpe:-
1. Grau kaja hkra madat u.
2. Grau kaja hkra myit u.
3. Grau kaja hkra tsun shaga u, nga nna sharin ya wa ai rai yang dai ni na ten hta mungdan 106 kaw Toastmasters International ngu ai uhpung hku nna manu jawm tawn let hkaja shaman nga masai.
Ga shadawn (1):- Masha langai shaga ai kaw, marai 3 jawm madat yang lachyum myu 3 lu wa chye ai. Hpa majaw nga yang, hkungga kamhpa ai jut hku madat ai, n ju n dawng ai jut hku madat ai, rap ra ai hku madat ai, ngu ai hta shai mat ai re. Dai majaw madat shaman ai hta gara de mung n shanang ai, tsun shaga ai wa a yaw shada ai lachyum hpe hkrak sha madat la nna, n shut n shai hkra myit sumru la ai hpang seng ang ai ni hpe grau kaja hkra tsun hparan dan ai marang e, mungmasha ni hta chye na ai lam hte hkam la ai lam bung wa nna kahkyin gumdin lam hta ngang kang wa ai rai nna, mungdan hta rawt jat wa ai lam lu wa ma ai.

Ga shadawn (2):- Thai mungdan kaw masha wan 65 daram nga ai raitimung, Toastmasters International club gaw dai ni na ten hta 32 sha naw nga ai. Asuya masha kaba ni hta na, Prime Minister Thaninkrai Vichian, Foreign Minister Thanat Khoman marai 2 sha naw nga yu ai majaw asuya shangwang kata kaw grau kaja hkra madat hkat na matu rai nbyin mai ai. Raitimung, mungmasha wan 5 grup yin sha nga ai Singapore mungdan kaw Toastmasters International club 170 daram nga ai majaw uphkang ai asuya masha kaba ni hte mungmasha hpan shagu ni hta, "Grau kaja hkra madat, Grau kaja hkra myit nna Grau kaja hkra tsun shaga ai masha law ai majaw Singapore masha ni gaw kahkyin gumdin ai hta ngangkang nna mungdan hpe gaw-gap ai hta rawt jat lawan ai hpe jawm mu nga ga ai.

Myenmung kaw mungmasha wan 55 grup yin rai ga ai raitim grau kaja hkra madat chye na matu kadai mung rai ntsun shapraw yu ga ai. Raitimung, anhte Wunpawng Myusha ni hta:-
1. Grau kaja hkra chye madat na matu,
2. Grau kaja hkra chye myit sumru na matu,
3. Grau kaja hkra chye tsun shaga na matu Ja Chyum Mungga gaw anhte hpe sharin ya nga sai.

Satan gaw KIO/KIA u hpung hpe shamyit na matu sha rai yang, chemical n lawm ai laknak hte sha gasat mai ai zawn, mungmasha ni hpe mung atsai awai sat nat na nre. Ya gaw KIA hpe chemical laknak hte gasat nga ai zawn, mungmasha ni hpe mung atsai awai shamyit nga ai hta n-ga, yellow rain laknak lang nna gasat nga sai. Madung gaw Wunpawng Myusha yawng hpe shamyit kau lu hkra shakut nga sai. Ndai zawn re ai ten hta, satan ra sharawng ai maga de tsap lawm nna hkan marawn nang ai lam n byin hkra sadi ra ga ai.

Mungmasa ngu ai gaw mungkan kaw dam lada htum ai baw re hpe jawm chye nga saga ai. Dai majaw dam lada ai ladat lang nhtawm tsun shaga woi awn sa wa nga ai Wunpawng Mungdan Shanglawt Hpung a Ningbaw Ningla ni tsun shaga sa wa nga ai hpe jawm chye na ya na matu ahkyak htum rai nga ai. Shing rai Yehowa jaw da ya ai machye machyang rai nga ai, Grau kaja hkra madat, Grau kaja hkra myit sumru yu ai marang e, shada a lapran kaw grau kaja hkra tsun shaga hkat ai hte satan wa a hkalem gunglau ai hpe dang kau lu nna, ngwi pyaw simsa ai Wunpawng Mungdan hpe teng teng gaw-gap la lu na ga ai law.

Puk Dun
22 March 2012

MATUT HTI NA »

GWI HKANG WA SHAMAT, MYEN A LADAT

Jinghpaw Wunpawng buga ginra ni hta, Chyurum sha ni a moi prat janat labau shang masat, tsun kajai hkrat wa ai hkang ni mahkra hpe shamat shaprai kau wa nga ai Myen satan hpyen a maw lanyet gaw, n hkam sharang lu na madang de du nga sai.

Mali hte Nmai mazup madim hpe dawm kau sai, ngu ai gaw tsep kawp masu ai sha re. Grau grau she shagreng wa nga dingyang rai malu ai. Sakse sakgan pra pra mu mada lu nga ai. Ndai lam hte seng nna ja ja matut ninghkap shaja ra nga ga ai.

Shaning 60 jan grin nga sai Karing Naw Sa-ra hpe mung zing la kau manu ai. Kade n na yang, gawngngu mung shadun na rai malu ai. Jinghpaw ni galaw da ai hkang mahkra shaprai kau ai lam rai sai. Htawm hpang de gaw, Jinghpaw ni a buga re, ngu ai labau pyi tam shamat na rai saga ai.

Shawng de Nbawn Lup ngu ai shara hpe, Shwezet ngu shamying galai kau sai. Dai gaw, Manhkring hte Kawa Hka lapran e rai nga ai. Nbawn Jasen Labang Duwa hpe lup makoi ai shara re. Jinghpaw du ni a labau shaprai kau na masing rai malu ai.

Kade n na yang, “JINGHPAW MUNGDAW” ngu ai hpe mying galai kau na mayun hkyen lajang nga masai. Jiwa ni tam da ai Jinghpaw Mungdan gaw, Jinghpaw Mungdaw madang de yu hkrat wa nhtawm, ya gaw mungdaw pyi bai shaprai kau na madang rai wa sai hpe, n kam hkum rai; loihkring she na kajawng na ga ai. Jiwa ni a lata amu mahkra Myen dangchyang ni shaprai kau ya wa sai. “Gwi hkang wa shamat” ngu ai baw nan rai sai.

Anhte a buga kata, kahtawng mying, mare mying, mahkrai mying, lam mying, dan dawng ai masat masa ni mahkra hpe Myen mying, Myen labau, Myen gawngngu hkrai shatai kau ma wa masai. Ndai zawn re ai n shawp dik ai Myen ni hpe kawa di shadu nna maidang hkan mata nang nga ai Jinghpaw ni mung naw nga taw nga ai. Tinang amyu hpe dut sha ai, tinang buga hpe hpya sha ai, amyu mungdan a ntsa e sadi run ai ni rai nga ma ai.

Majan ngu ai gaw, madat yang she pyaw ai; ta tut hta loi ai n re. Majan hpe kadai mung n ra ai gaw teng ai. Kade n ra sharawng tim, koi yen n mai ai sat lawat pru wa jang, majan gasat ra ai gaw shingra tara rai nga ai. Daini Jinghpaw Wunpawng sha ni gasat nga ai majan gaw, tawt lai roi rip dip gamyet shang wa ai maigan hpyen hpe gasat ai majan, tara ai majan rai mali ai. Myen ngu ai hpe n-gup aga hte tsun nna n lu ai. Myitsu ai kyang lailen madun nna n lu ai. Chye na la ai baw n rai ma ai. Gasat nan gasat nna gawt kau ra ai ni she rai ma ai. Jinghpaw Wunpawng sha ni a rawt malan majan gaw, tara ai majan re. Tara ai bungli hta Karai Wa lawm nga ai. Anhte a Awng Padang Yehowa Karai Kasang nan rai nga ai.

Loimye Bum
22/3/2012

MATUT HTI NA »

MYEN HTE BAWNGBAN AI LAM SHUT NGA AI HPE MU SAI N RAI NI?

Myen hte galoi mung n mai bawngban ai lam, myitsu salang ni law law wa lang hte lang tsun shadum nga dingyang re. Shanhte tsun shadum ai ga ni gaw, Karai wenyi shung ai myihtoi ga re, ngu tim n shut na shadu ai. Myen ngu ai ni gaw, Jinghpaw Wunpawng sha ni hte sha n-ga, htingbu htingbyen maigan mungdan gara hte mung, labau prat dingsa dingman hpraw san ai lam galoi n nga ai hpe mu lu ai. Daini ten na Jinghpaw Wunpawng sha ni a mabyin sat lawat hpe yu dat yang, Myen ni hte bawngban shagu grau grau sum machyi ai lam hkrai sha byin pru wa ai hpe mu lu ai.

Lai wa sai bat, March shata 8-10 ya laman, Myen hte Shanglawt ni simsa lam bawngban hkat ai hpe radio, TV, shi laika ni hta matut manoi mu lu, na lu, chye lu saga ai re. Ya ten na sat lawat gaw, Myen ni mahtang, hpyen luksuk n-gun, laknak n-gun myu magup hte anhte hpe dip gamyet roi rip dang sha nga ai ten rai nga ai. Jinghpaw Wunpawng sha ni chyawm gaw, tengman ai maga tsap let, Yehowa Karai Kasang hta sha shamyet shanat kamhpa nna, ninghkap gasat nga ai lam re.

Myen hte sa bawngban ai gaw, Karai Kasang karum la na hpe n kam ai myit a npawt re. Asan tsun ga nga yang, Satan gunglau hkrum ai lam re. Israela amyu sha ni hpe Egutu mung kaw na Mawshe woi shaw la na du sa yang, amyu sha ni law law wa Yehowa a atsam hpe n kam nna, Mawshe hpe dingbai dingna jaw lai wa sai re. Egutu mung na woi pru la lu ai hpang e mung, shawng lam de gaw, Nawnghkyeng hka pat taw nga; shingdu de gaw Hpara-u a hpyen leng ni shachyut nang wa yang, amyu sha ni law law wa Mawshe hpe mara shagun lai wa sai re.

Ya daini gaw, maga mi de simsa lam bawngban masu nna, maga mi de hpyen n-gun kaba hte htim ganaw tik tik rai nga ai hpe gwi du hkra mu chye nga sai re. Anhte n sum na ga ai. N hkrit n tsang kamsham ai myit hte gasat adawt ga. KIO hta lai nna anhte a hpa-awn shaje kaga n nga sai. Jinghpaw Wunpawng Mungdan hpe makawp maga na hta lai nna anhte a labau lit shaje kaga n nga sai. Yehowa Karai Kasang hta lai nna anhte a Madu shaje kaga n nga sai.

Mungkan ting chyam bra nga ai Jinghpaw Wunpawng sha ni yawng hte e, Myen wa gaw, anhte hpe myu shamyit masing hte gasat taw nga sai majaw, yawng nsen langai, manawng langai, myit mang shabawn langai, n-gun lagaw langai, myit hkrum ai lam langai, kamsham ai lam langai hta kahkyin gumdin saga law. Ngai hte n seng ai; ngai kaw n du ai nga nna n myit saga. Kadai mung kadai tinang hta rawng ai n-gun atsam ahkying aten, nyan hpaji, ja gumhpraw myu magup hte shang lawm daw jau saga. Karai Kasang Yehowa wa a padang dawnhkawn hpai let shawng de shanang sa saga law.

Dai re majaw, anhte a myit hkrum lam hpe lawu na ga baw masum hta maju jung shangang shakang da ga ngu saw lajin dat ai law.
1. Myen hte galoi mung bawngban ai lam n galaw na ga ai.
2. Yehowa Karai Kasang chyu sha anhte hpe karum lu ai Madu rai nga ai.
3. Anhte gaw awmdawm lu la ai shani du hkra gasat sa wa na ga ai.

Sumlut Naw
20/3/2012

MATUT HTI NA »

UNTOLD MISERIES

MATUT HTI NA »

KARING NAW HPE MYEN HPYEN NI MADU LA WA

March (20) bat Lahkawng
Jinghpaw Mungdaw Myitkyina mare kaba na Mali Hka kau na Mung Shawa masha a pyaw chyai, hkring sa chyai shara rai nga ai Karing Naw Sara makau hta myen hpyen asuya ni kawn myen asuya a hpyen du ni a hkring sa na shara galaw hpang wa nga sai lam shiga na chye lu ai. Ya ten hta hpyen du ni a hkring sa shara dum n ta ni galaw hpang wa nga sai lam hpe mung na chye lu ai.

MATUT HTI NA »

U RU SENG MAW HTA

March (20) bat Lahkawng

Myen asuya gaw, Buga Company ni a lung seng ga lawk ladaw htum ai hpe, ya na mung masa hpe jahpai nna ladaw bai jat na ahkaw ahkang n’jaw mat ai hte kaga ja gumhpraw arang law law lu ai ni, mayun kumhpa jaw ai ni hpe bai jaw kau ai lam ni galaw nga ma ai lam na chye lu ai. Dai hta n’ga Sut du Lahpai Hkun Sa (Panghuk Duwa) zawn re ai Jinghpaw sut du ni mung maigan amyu sha company ni hte gapyawn nna, dai buga company hte kaga Wunpawng amyu sha ni galaw lai wa ai (rai n’ngut kre shi ai majaw galaw nga dingyang, laisin ladaw htum mat ai majaw bai jat na galaw nga dingyang) lungseng ga lawk ni hpe Buga company hte loi sha pyi bawng jahkrup ai lam n’nga, Buga company a ahkang ladaw laman, ma ja n’gun dat, arang kaba shaw nna lunghkan du hkra galaw shakut da sai lung seng n’hkun ni hpe, Miwa amyu company ni hpe man tam let, ti nang a akyu hpe sha yu nna kashun galaw wa nga sai lam ni hpe na chye lu ai.

MATUT HTI NA »

NO. (30) NGU NA MYEN HPYEN A BALIK DAP

March (19) ba Langai

Jinghpaw Mungdaw Myitkyina Mare Kaba kata ta na Mali Yang lawt kaw Myen hpyen asuya kawn myen mung madang No. (30) ngu na balik dap kaba hpe hpaw tawn da lai wa sai lam shiga na chye lu ai. Ya ten n dai balik dap kaw myen balik ni hpe wunkat jaw nga ai lam, hte n dai balik da na ni gaw Jinghpaw Mung a shim lam hpe la na matu re lam hpe mung na chye lu ai. N dai balik dap hta sak ram ai dinghku rai n de ai myen ramma ni malawng rai nnan, n dai balik ni gaw Jinghpaw Wunpawng shayi sha ni hpe myen amyu shatai la na matu lit kaba jaw hkrum ai ni re lam hpe mung kata masha ni kawn na chye lu ai. Ya ten hta n dai balik ni gaw Myitkyina mare a lam n braw shagu hkan e mung shawa zawn bu hpun nna cycle ni hte mung masha ni a shamu shamawt ai lam hpe hkan yu nga ai lam shiga na chye lu ai.

MATUT HTI NA »

MARCH 19 YA NA SHIGA

March (19) ba Langai

Daini March 19 ya hta Myikyina Manmaw lam ntsa Npawn mare hte shalap hka lapran hta myen asuya hpyen hpung ni hte tinang Dap Ba (5) npu na pawng hpawn KIA hpyen hpung ni ya yang shana maga 4:00 pm ten kaw na laja lana gasat hkat nga ai lam na chye lu ai. Ndai majan gaw lahkawng maga na n-gun kaba hte gasat ai majan poi kaba re lam na chye lu ai. Mana March 18, 20012 (10:00pm) kaw na jahpawt maga du hkra mung laja lana gasat hkat lai wa sai lam na chye lu ai. Waimaw masha ni tsun ai hta hkala hkrum ai myen machyi masha hpring hpring htaw tawn ai myen mawdaw kaba 3 gaw Myikyina hkran de rap mat wa sai lam na chye lu ai. Ya yang Myen asuya gaw shata 5 daram pat tawn ai Myitkyina Manmaw lam hpe ndai shata rai nhtum shi yang hkrang hkra nga nna hpyen n-gun kaba hte shakut nga ai re lam na chye lu ai. Laiza grupyin hkan mung ndai laman majan kaba byin wa na re lam na chye lu ai.

MATUT HTI NA »

BAN NNAN NI A LATA HTA SHE

Moi shawng de gaw anhte Jinghpaw Wunpawng sha ni nat hpe nawku ai jijaw natjaw prat hku nga hkrat wa sai. San san seng seng n chye nga ai, tsi shakret hte abaw anaw nga ga ai. Laili laika n lu ai, hpaji n chye ga ai. Bum n hkrem hkan garet let yi sha galaw sha rai nga ai hte masha si yang luphka htu nna masha mang lup chye ga ai. Malut maya ai n gup grai hkyeng ai. Dai majaw masha amyu ni anhte Wunpawng sha ni hpe masha shazai ngu tsun nga ma ai. Ningsin nga yang ningsin kata hta rawng nga ai ni rai nga ga ai.

Raitim hkyela na ninghtoi gintawng gaw du wa na ni wa magang ra ai. Matsaw ningtsa na hpan ningtsang chye wa ningchyang Karai kasang gaw shi a lamukasa or American sasana ni hpe dat nna Jinghpaw ni hpe tam shangun dat sai. American sasana sara ni 1870 ning gupyin hkan hta Myen Mung lahta daw de tam a bram hkawm wa yang Gahkyeng du wa hte hkrum katut nna mying san yu yang Gahkyeng ni re ngu tsun dat ai kawn Kachin mying tai wa sai. Karai Kasang gaw anhte Jinghpaw W.P Amyu ni hpe Kachin ngu amying shingteng jaw daidaw la sai hku re. N dai gaw majoi n re Jinghpaw W. P sha ni a n tsa Karai Kasang a yaw shada lam lama ma nga ai majaw rai nga ai. Karai Kasang hpe anhte tam la ai n rai, shi mahtang anhte Jinghpaw W.P Amyum sha ni hpe tam la nna shi a amyu shatai la sai. Anhte amyu ni laika n lu ai majaw Jinghpaw laika hpe gin shalat ya sai, shi a mungga hte kashin nna W. P sha ni yawng hpe Christian shatai la sai. Shi a mungga rawng ai Chyoipra Chyumlaika hpe mung anhte a kaji kawa ni a lata hta ap da ya sai. N dai zawn anhte w.p sha ni hpe Kachin mying ai n pu e shi a amyu shatai la sai hku re. Moi gaw anhte ni nat a kashu kasha ni raitim ya dai ni gaw Karai ai kashu kasha ni tai mat sai.

Raitim mung anhte a kaji kawa ni Karai mungga hta maju n jung ai, Jinghpaw W.P or Kachin mying ai n pu e n kam nga ai. 1948 ning kawn tinang hte makam n bung ai ni hte mungdan rau jawm de kau sai, yu bak gaw n dai kawn hpang taw nga sai. Kaja nga yang karai anhte hpe ra ai gaw Kachin mying hte Chrisitian makam rawng ai Mungdan gawgap na shaman chyeju jaw da ngut sai. N dai hku yaw shada ai majaw she sinpraw de Miwa Buddha, Dingdung de Tibet Buddha, Sinna de Gala Buddha, Dingda de Myen Buddha ni a lapran anhte hpe tam la nna Christian amyu shatai Kachin mying jaw daidaw la ai rai nga ai. (Myen hte pawng nga jang gaw Kachin mying gaw mat mat nna Myen ni a mying Burma or Myanmar ngu ai hpe sha anhte shamying hkam ra ai, Mungkan Rapdaw hta mung Myen ni a mying hpe sha daidaw masat da ya ai majaw Myen ngu yang she chye na, Karai jaw ai Kachin mying gaw mat mat sai. )

Karai daidaw ai hpe shaprai kau nna Burma ngu ai n pu e rawng nga ga! Buddha makam rawng ai ni hte dinghku rau de ga! ngu galaw dat ai majaw Chiristian rai nga ai Kachin ni gaw awu asin byin mat sai. Yubak mung hkan nang nga sai.

Karai Kasang matsun ai n pu e Mawshe gaw Hkanan Mung hpe shang kasat zing la na matu Isarela Amyu lakung na ningbaw 12 hpe kin yu sa yu na shangun dat ai shaloi amyu lakung 12 na marai (10) gaw Hkanan Mung a masa ni hpe sa mu yu la n htawm bai wa tsun ai gaw Hkanan mung hpe gara hku mung kasat zing la lu na n re ngu shiga bai wa jaw ma ai, Yawshu hte Khaleb chyawm gaw lawan sa zing la saga anhte dang na re ngu shiga wa jaw ma ai. N dai zawn re n kam ai myit a majaw Karai Kasang gaw amyu lakung 10 a aru arat ni hpe nam mali kata e si jahtum kau sai, dai lakung 10 na Karai woiawn galaw ai hpe n kam ai ni htum mat ai shaloi she Karai Kasang gaw Isarela amyu ni hpe Hkanan Mung de shang shangun sai. N dai Isareal ni a maumwi zawn sha ya dai ni anhte Wunpawng sha ni hta mung Myen Buddha nawku ai ni hte pawng nga na sharawng ai ni hte Kachinland hpe kasat zing la na n gwi ai ni, myen hpe gara hku mung kasat dang na n re ngu myit ai ni htum mat ai shaloi she ngwi pyaw ai Awmdawm Shanglawt Lu W.P Mungdan de shang gabye bang wa lu na rai nga ai. Nnan prut pru wa ai ban nnan ni a lata hta she lawt na rai nga sai.

Naw Kham

MATUT HTI NA »